Read berom 1 Samwɛl 15 Bible Online

1 Samwɛl 15 - berom bible

1 Samwɛl 15

¹Samwɛl a hwo yâng Saul, “Dagwi Darwey a ga tomo me, na me shushu hwo na něy, na hwo tɛ́ o gwɔ̀m bemat mɛ BeIsrayɛl. Ko di, a remo, tik na hwo tɛ̀ betong, na hwo wok pyɛ de a rɔda ha a hwo!

²Dagwi Darwey, Dagwi Da Jey Mwa, a ye, yɛ e simo, na a tala BeAmalɛk pyɔ̌n pyɛ de bedabeda mɛn ba kana ra a BeIsrayɛl e gwong, jeng de yɛn à sè kyè vey yi e Misra.

³Kyè, na hwo wɔ̀ hwo e ra BeAmalɛk o. Wey na yɛn, na hwo fugut hɛn tanga kayɛ pyɛ mɛn mwa! Hwo tɛt ɛ hwak e ji mɛn wɛt, ko hwo mɔbɔs hɛn beras na beha, nèy mwa na nemo de ne ngas, na berɔndɔng, na vyēl, na bemaryat, tanga bemadung arɔng!”

⁴Saul a yishi bemât como mɛ, ba tula hɛn e Tɛlɛm. A bɛrɛng hɛn e hwomo, bá sè gu naga baba (200,000) yi e bak Israyɛl, ko yi e bak Yuda bá sè gu kuru (10,000).

⁵Yɛ na bemat mɛ ba kyè vɔk e gbɔng repomô BeAmalɛk, ko yɛn a wɔ̀ dyɛng e waba e kwɔbɔrɔng hwak.

⁶Saul a tomo á BeKeni wɔgɔ, “Nusu hin, na yin gas in na BeAmalɛk, yaga mê wey na yin tanga yɛn! Jeng de BeIsrayɛl mwa bà kana kyè e gwong yi e Misra, ko bedabeda min ba ra a yɛn pyɛ́ ryat.” BeKeni kwong ba vɛ ba nusu yi e hwomo.

⁷Saul a re BeAmalɛk e como yi e hwomo e Havila vɔk e Shur e rwa rak na Misra.

⁸Ba vo Agak, gwɔ̀m mɛn, ba vɔk ɛ kwen, ko bwâng bemat mwa ba wey na yɛn, ba fugut hɛn.

⁹Ko Saul tanga bemat mɛ ba tik Agak kwen. Ba to kasa pyɛ́ ryat e ji berɔndɔng, na vyēl, de ya mɔsɔ, na vyēl byot o, tanga kayɛ pyɛ de ya vɔk nerat. Ko yemo de ya sé yapyi kɛ ya vɔk nerat nehak wɛt, ba wey na yɛ hywiri.

¹⁰Dagwi Darwey a ha na Samwɛl, a ye,

¹¹“Ma lashe yey de ma tɛ̀ Saul a tɛ́ ɛ gwɔ̀m, yaga a ga doyo a me bama, a ra pyɛ de ma nɔng ɛ nu wɛt.” Ha hane kwong ha bɔrɔk Samwɛl, ko a tosho a Dagwi Darwey, a pɔl cik naturuk nane.

¹²A tulu bop nagasi, na a wɔ̀ man na Saul. Ko ba ha a yɛ, “Saul a ga kyè vɔk e repomô Karmɛl, a ga lɔk a tó mɛ gwopyɛ gwohwak sede mwasi, na a nɔ̂ng tó mɛ mɛ̀ reza, a ga to kwey vɔk e Gilgal.”

¹³Samwɛl a wɔ̀ sɛ̀ ɛ, ko Saul a yang ɛ, “Neken mō ne ros! Dagwi Darwey a tɛ̀ nerat e ra hwo! Ma ga yɛnɛ râ pyɛ de Dagwi Darwey a tɛ̀ me ra.”

¹⁴Samwɛl a yang ɛ, “Ko toshô yi yɛ̌ vyēl na berɔndɔng à hemo de ma sé wɔkɔs ɛ?”

¹⁵Ko Saul a toyo a yɛ, a ye, “Bemât como ba vey na yɛ̄ yi na BeAmalɛk. Ba kasa vyēl ryat o tanga berɔndɔng berat o yaga nɔrɔ̂ yas de be yɛt vɔk na Dagwi Darwey, Dagwi mō. Bwang o mwa wot a ga wey mɛ, wot a ga fugut yɛ̄ vit.”

¹⁶Samwɛl a yang ɛ, “Sǎ yuu! Mê ha a hwo pyɛ de Dagwi Darwey á ha a me naturuk.” Saul a yang ɛ, “Ey, ko ha!”

¹⁷Samwɛl a yang ɛ, “Hwó bɛrɛng rato mō sede hwà sé mwat zɔng. Ko di, e hwo wɛ de hwà sé mwât nuyêl yére BeIsrayɛl! Dagwi Darwey a tɛ̀, ba shushu hwo na něy, na hwo tɛ́ o gwɔ̀m e ra Israyɛl.

¹⁸A tomo hwo sede tom, a yang o, ‘Ci, na hwo wɔ̀ tó BeAmalɛk, bemat beves vane, e como, na hwo wey na yɛn, hwo fugut hɛn mwa.’

¹⁹Yaga sɛ́ de hwà kyɛ́ o nà raa badu Dagwi Darwey ɛ? Yaga sɛ́ de hwà yel e ji hashê pyɛ́, na hwo ra pyɛ́ vyes yemo e bayîs Dagwi ano ɛ?”

²⁰Saul a ye, “Ko di, ma ga ra pyɛ de Dagwi Darwey a tomo me wɔ̀ ra: Ma ga vo Agak, gbɔng gwɔ̀m BeAmalɛk, ma vey mɛ kwen, ko ma ga wey na bwâng BeAmalɛk, ma ga fugut hɛn mwa hywiri.

²¹Ko bemat ba kasa vyēl na berɔndɔng, berat o e ji pyɛ́ de ba re e como. Ba tik yɛ̄ jaram, na be nára a Dagwi Darwey, Dagwi mō mɛ nɔrɔ e ngamo e Gilgal.”

²²Ko Samwɛl a yang ɛ, “E yɛ̌ pyɛ de Dagwi Darwey a dal na simo ɛ? Be raa reha mɛ, kɛ be nása a yɛ nenɔrɔ̂ yas de be yɛt tanga pyɛ̂ rangas ɛ? Wôk ha mɛ ha dal nɔrɔ̂ yas de be yɛt vɔk na yɛ, vɔ̂k ha mɛ ha dal sebwêp beturuk.

²³Yaga kyɛ́ ɛ wôk há ha sé renɛn tyɛng na vyoshon, tɛ̂ rato kashalang a sé pyɛ vyes tyɛng na râ sekwit. Sede remo de hwà kyɛ́ o nà raa rehâ Dagwi Darwey, yɛ arɔng a ga kyɛ́ ɛ, na hwo re negwɔm.”

²⁴Ko Saul a yâng Samwɛl, “Ey, ma ga ra a Dagwi Darwey banɛn. Ma kyɛ́ me nà raa redu mɛ tanga basa mō arɔng. Ko ma wok bengyip bemât como, yaga ano ma raa ha mɛn.

²⁵A remo kwong, ma sé ra won, na hwo hala a me renɛn hom! Toyo tanga me, na me wɔ̀ re a Dagwi Darwey fongol.”

²⁶Ko Samwɛl a yang ɛ, “Ma rɔda toyo tanga hwo wɛt, yaga hwà ga kyɛ́ o rehâ Dagwi Darwey. Yɛ arɔng a ga kyɛ́ ɛ, na hwo re negwɔm Israyɛl.”

²⁷Jeng de Samwɛl a sé doyo, na a kyè, ko Saul a kaba nû gworugu mɛ, ko gwa vɛ̌ hanta hɛ.

²⁸Ko Samwɛl a yang ɛ, “Di, yunung Dagwi Darwey a ga hama negwɔm Israyɛl yi na hwo. A ga nɔng nɛ e vwɔ̂ mwat de a dal o.

²⁹Dagwi wo gbɔng nerey wo BeIsrayɛl e ra bɔs kɛ e sege ha mɛ wɛt, yɛ arɔng a sé mwasi de e sege ha mɛ wɛt.”

³⁰Saul a toyo a yɛ, a ye, “Ey, ma ga ra renɛn. Ko mwa ano, nɔng me nerey e nuyêl bemakuk, na e nuyêl bemat hom BeIsrayɛl. Toyo tanga me, na me wɔ̀ re a Dagwi Darwey, Dagwi mō fongol.”

³¹Ano kwong, Samwɛl a toyo a raa hɛ, ko Saul a wɔ̀ re a Dagwi Darwey fongol.

³²Samwɛl a ye, “Vey in a me na Agak, gbɔng gwɔ̀m BeAmalɛk, e ngamo!” Agak a kyè bɛs vey na yɛ, a ye e yey mɛ, “Ma ga hywit me yi e reku.[16]

³³Ko Samwɛl a ye, “Sede remo de hwà tɛ̀ beha, be tɛ́ ɛn vit a nèy yi na gbɔng wal mō, ano de neng mō a rɔda tɛ́ ɛ vit a hwey arɔng.” A vɛ̌ tow Agak na wal e nuyêl gàgbang rangâs pyɛ́ vɔk na Dagwi Darwey e Gilgal.

³⁴Samwɛl a toyo vɔk e Rama, ko Saul kwong a tut vɔk e lɔ e repomo mɛ e Gibeya.

³⁵Samwɛl a to di bayîs Saul wɛt, vɔk e reku mɛ. Ko á sè a yɛ mwishish yaga Saul o, yaga Dagwi Darwey a di a sé naka de a tɛ̀ Saul, a tɛ́ ɛ gbɔng gwɔ̀m BeIsrayɛl wɛt.