Read berom 1 Samwɛl 16 Bible Online

1 Samwɛl 16 - berom bible

1 Samwɛl 16

¹Dagwi Darwey a yâng Samwɛl “Hwà rɔda re nuyel na wôk nemwishish Saul vɔk e yɛ̌ jeng ɛ? Ma ga kyɛ́ me hɛ na rê negwɔm e ra BeIsrayɛl. Jut ngwɛngɛ, na hwo tɛ̀ něy e ji gwɛ. Ma rɔda tomo hwo na Yisai, mwât Bet-Lɛhɛm, yaga ma ga kasa a to hom gwɔ̀m yi e ji nèy mɛ.”

²Samwɛl a toyo na há, a ye, “Mê wɔ e rɛ̌? Ka sede Saul a wok, ko a rɔda mɔrɔ me.” Ko Dagwi Darwey a yang ɛ, “Jut keshěp rɔndɔng, na hwo vɔk ɛ, ko hwà rɔda ye, ‘Ma vey nára a Dagwi Darwey nɔrɔ.’

³Tik na hwo rini Yisai, na a vey e kwɔ̂n narâ nɔrɔ mo, ko ma rɔda dura a hwo pyɛ de hwà rɔda ra. Mwat de má dura a hwo, ko hwô shushu hɛ na něy o.”

⁴Samwɛl a ra tyɛng na pyɛ de Dagwi Darwey a ha a yɛ, a wɔ́ e Bet-Lɛhɛm. Jeng de a pom, ko bemakuk repomo mo ba sey ɛ na vôw rebek, ba ye, “Tyang ano, à mwât bɛrɛng a?”

⁵A yang ɛn, “Ey, tyang zɔng. Ma vey nára a Dagwi Darwey nɔrɔ̂ yas. Tik in bato min jɛrɛ, na yin wuna hin na me.” A to há a Yisai na nèy mɛ bewen o, be tik bato mɛn jɛrɛ, na be vey e kwɔ̂n nára nɔrɔ mo.

⁶Jeng de yɛn a wɔ̀ wul kwɔn o, Samwɛl a di Ɛliyap, ko a ye e yey mɛ, “Mwin, mwat de Dagwi Darwey a ga kasa a womo e nuyel mɛ!”

⁷Ko Dagwi Darwey a yang ɛ, “Hwo kwon bɛrɛng nerât rebek na nelis mɛ wɛt. Di, ma ga kyɛ́ me hɛ, yaga me masa e gwong de mwasi e masa wɛt. Mwasi e bɛrɛng bek, ko Dagwi Darwey e bɛrɛng yey.”

⁸Yisai a yila hwey mɛ Abinadap, a tɛ̀ ɛ, a kwey e nuyêl Samwɛl. Ko Samwɛl a ye, “Wey, Dagwi Darwey a kasa womo arɔng wɛt.”

⁹Yisai a tɛ̀ Shama a kwey, ko Samwɛl a ye, “Dagwi Darwey a kasa womo arɔng wɛt.”

¹⁰Yisai a tɛ̀ nèy mɛ bewen o netaama na kwey e nuyêl Samwɛl, ko Samwɛl a yâng Yisai, “Dagwi Darwey a ka kasa hwak e ji vemo wɛt.”

¹¹A rangal hɛ, a ye, “Yɛnɛ̂ nèy mō bewen a nemo arɛt?” Yisai a toyo a yɛ, a ye, “Bwang swɛl o wo tala mo zɔng, ko wane mo a sé gyeng vyēl.” Samwɛl a yang ɛ, “Tomo, be wɔ̀ jut ɛ. Wot a rɔda sangal, na wot re wɛt, sɛ̌ a vey e ngyen.”

¹²Yisai a tomo, be wɔ̀ vey na yɛ. Á hwo ɛ́ mwat rwat, á to sè wɛ́kwɛk, ko bayis mɛ bá nɛp. Ko Dagwi Darwey a yâng Samwɛl, “Yɛ ma womo. Shushu hɛ na něy!”

¹³Samwɛl a hwo jut něy nane e ngwɛngɛ, a shushu hɛ mɛ e nuyêl begwa mɛ. Ko gabik Dagwi Darwey ha kaba Davit, ha sangal tanga yɛ yi e jeng yane vɔk e nuyel. Samwɛl kwong a sogo, a toyo hɛ vɔk e Rama.

¹⁴A remo de, gabik Dagwi Darwey ha ga gas ɛ na Saul, ko gabik ves yi na Dagwi Darwey ha hwo tak a yɛ reyɔm.

¹⁵Bemât fwôm Saul ba yang ɛ, “Di, à darwey, gabik ves yi na Dagwi ha sé tak a hwo reyɔm.

¹⁶Tik na wot wɔ̀ jāma mwat de a tɔk râ yom. Ko jeng de gabik o ha hwo tak a hwo, ko a rɔda ra a hwo yom, na hwo sɛ̀ netyang.”

¹⁷Saul a ye, “Ey, jāma hin mwat de a tɔk râ yom o, na yin vey mɛ.”

¹⁸Wen hwak yi e ji bemât fwom a yang ɛ, “Ma tɔk hwêy Yisai, mwât Bet-Lɛhɛm hwak, de ha tɔk râ yom kwo. Ha sé yi e lɔ ting, ha to sé sugâ como, ha vɔk relem ha, ha hwo ɛ́ mwat rwat, ko Dagwi Darwey a sé tanga hɛ.”

¹⁹Saul a hwo tomo betom vɔk na Yisai, a yang ɛ, “Tomo a me hwey mō Davit, wane de a sé gyeng vyēl.”

²⁰Yisai kwong a jut kpam-tuk, a lap e ra madung, a to vɔk ɛ kevyel shi tanga nshî anap e bura, a tomo mɛ hwey mɛ Davit wɔ̀ nɔ̂ng Saul.

²¹Davit a wɔ̀ wul lɔ Saul, a kaba fwom mɛ. Saul a tɛ̀ yey na yɛ tyɔng wɛt, ko a tɛ̀ ɛ, a sè mwât vɔ̂k pyɛ̂ como mɛ.

²²Saul a to tomo betom vɔk na Yisai na há, a yang ɛ, “Tik Davit a sangal na me, na a ra a me fwom. Yey hom ya pɛngɛ na yɛ.”

²³Kayɛ jeng de gabik ves yi na Dagwi ha hwo e ra Saul, ko Davit a ra a yɛ yom o. Gabik ves o ha gas ɛ na yɛ, ko Saul a wok neta, a sɛ̀ netyang.