Read berom 1 Samwɛl 17 Bible Online

1 Samwɛl 17 - berom bible

1 Samwɛl 17

¹A vane ano, BeFilisti ba tula bemat mɛn yaga tô como, yɛn a tula hɛn e Soko, repomô yerê Yuda, yɛn a tɛ̀ bǔk como mɛn e Ɛfɛs-Damim, e tê Soko na Azeka.

²Saul tanga bemât comô Israyɛl ba tula hɛn, ko ba tɛ̀ bǔk como mɛn e nɛk Ɛla. Yɛn a ngyɛrɛ hɛn, na be man gèy na BeFilisti.

³BeFilisti ba tula hɛn e rahwol hwak, ko BeIsrayɛl ba tula hɛn e hwak à rahwol o arɔng, bé bɛrɛng bemɛn, ko nɛk wa sè e tē mɛn.

⁴Sugâ como hwak a nusu yi e ji bǔk comô BeFilisti, reza mɛ à Gɔliyat, á sè mwat yi e repomô Gat, á sè lwis o, nelis mɛ na wul mita betat.

⁵A tɛ̀ bong dyam pama e rato mɛ, na rugu mo e rebek mɛ, nedirîk rugu mo na dal kilo kuru batungun (50).

⁶A tɛ̀ necàshak dyam pama e bol mɛ, a to gana gbɔng tom de ba yong na dyam e rasanat mɛ.

⁷Netîng shɛ bara mɛ na sé sede hwêy rúm, ko nedirîk dyam bara mo na wul sede kilo betaama. Mwat de e vɔkɔs a yɛ̀ ruga mɛ e kyesem e nuyel mɛ.

⁸Gɔliyat a hwo nusu a tumal, ko a yila bemât comô Israyɛl na gbɔng fwɔ, a yang ɛn, “Yaga sɛ́ de yin a ba ngyɛrɛ hin yaga como arɛt? Yin a tɔk, ma sé sugâ comô BeFilisti, ko yin a sé bemât fwôm Saul wɛt arɛt? Kasa hin mwat gwining e ji min, na a vey man gèy na me.

⁹Ka sede a tɔk tó como na me, na a mɔrɔ me, ko wot a rɔda tɛ́ ot besam min. Ko ka sede ma dal ɛ, na me mɔrɔ hɛ, ko yin a rɔda tɛ́ in besam mot, na yin ra a wot fwom.”

¹⁰Ko a to ye, “A remo, à yin BeIsrayɛl, pat in mwat gwining, na a vey man gèy na me, na be di mwat de ê dal mumwɛ!”

¹¹Jeng de Saul tanga mwa BeIsrayɛl ba wok ha de WoFilisti wane a ha, bengyip ba vo ɛn sizɔng, ko a vɛ̌ yang ɛn gbɛrɛk.

¹²Davit kwong á sè hwêy Yisai, WoƐfrat, mwât Bet-Lɛhɛm e ji Yuda. E jeng negwɔm Saul, Yisai o a ga kana kwop, a ga tɛ́ ɛ dâ bemat, ko a vɔk nèy bewen rwit.

¹³Nèy mɛ nekinat o netat nà ga kana raa Saul vɔk e de como, baza mɛn a vet ngan, wò yel o à Ɛliyap, wò neba à Abinadap, ko wò netat o à Shama.

¹⁴Davit á sè tashal mɛn. Bekinat o betat ba ga kana sɛ̀ Saul vɔk e de como.

¹⁵Davit e sangsal na Saul, ko e jeng cak e wɔ̀ gyeng vyêl da mɛ e Bet-Lɛhɛm.

¹⁶Gɔliyat a dopse ragas BeIsrayɛl kahɛ gasi na nahywelek, nepɔlɔ kuru banaas.

¹⁷Ano kwong, tuhak Yisai a yâng hwey mɛ Davit, “Jut alkama womo e gwopey de ba ga halang, tanga bagat kpam-tuk vemo kuru, na hwo wɔ̀ nɔ̂ng begwa mō e buk ziri.

¹⁸Ko hwo to jut bagat àwara vane kuru, na hwo vɔk a mwât nuyêl regyɛng como mɛn. Di a wot netyang mɛn, ko hwo vɔk ɛ pyɛ cak yi na yɛn de yê dura a me, yɛn a sé tyang.”

¹⁹Saul, na begwa mó, tanga mwa BeIsrayɛl bá sè e nɛk Ɛla, e de como na BeFilisti.

²⁰Nusu hwol Davit a tulu bop nagasi, a tik mwat hwak a bɛrɛng a yɛ vyēl o, a jut pyɛ́ yane, a kyè mɛ tyɛng sede remo de da mɛ a ha a yɛ. A wɔ̀ wul tyɛng e jeng de bemat ba sé nusu, ba sé rèmo hɛn vɔk e kwɔ̂n tô como.

²¹BeIsrayɛl na BeFilisti ba ngyɛrɛ hɛn yaga tô como mo, be bɛrɛng bemɛn.

²²Davit a tik pyɛ́ de a yi mɛ mo e kwɔ̂n mwât bɛrɛng pyɛ́, ko a pere na setele wɔ e durâ como, na a wɔ̀ kyul begwa mɛ.

²³Jeng de a sè rɔ̌ ha na yɛn, ko a di gwomwat Filisti, gwomo de rezâ gwɛ̀ à Gɔliyat, gwa nusu yi e ji regyɛng como mɛn, gwa hwo ha yerê ha hê raane, ko Davit kwong a wok.

²⁴Jeng de BeIsrayɛl ba di gwomwat o, bengyip ba hwo ɛn, ko yɛn a tele hɛn gwɛ.

²⁵Ba sè tâng bemɛn, “Di in, gwosa gwomo de gwó sǎ e de nunus, na gwo vɛ̀sɛ hwosom BeIsrayɛl na yol. Ka sede mwat hwak a mɔrɔ gwɛ, ko gbɔng gwɔ̀m a rɔda nɔng ɛ yas pyak, a rɔda to nɔng ɛ hwóng mɛ na a ra weneng o, ko a to hala belɔ da mɛ washak sana tala dyâm vwel.”

²⁶Davit a hwo rangâl bemat vane e tumal bagat na yɛ, “E sɛ́ de ba rɔda ra a mwat de a mɔrɔ WoFilisti womo, na a pat byɛs yi e ra BeIsrayɛl arɛt? E wɛ̌ mwat a mandûl WoFilisti womo de a sé byɛs regyɛng bemât comô Dagwi wo neken ɛ?”

²⁷Ko ba ha a yɛ tyɛng pyɛ de ba rɔda ra a mwat de a mɔrɔ hɛ.

²⁸Jeng de gwà mɛ kunat Ɛliyap a wok de a sé ha na bemat vane, ko shom ya sogo a yɛ, a hwo ye, “Hwà vêy sé e ngamo ɛ? Hwà tik nevyel nane e tê hey na wà ɛ̀! Bé bidɛ hwo e dem wɛt, ma tɔk tôs to mō! Hwà vey, yaga na hwo ba bɛrɛng tô como!”

²⁹Ko Davit a toyo a yɛ, “Ma ga ra sɛ́ arɔng ɛ? Ma sé rangal zɔng kô!”

³⁰A doyo yi na yɛ vɔk na mwat o hwak, a to rangal yerê rangal hining o, ko ba toyo a yɛ na yerê ha hining o.

³¹Bemat de ba wok ha de Davit a ha ba wɔ̀ misang a Saul, yɛ̀ kwong a tɛ̀ ba yila hɛ.

³²Davit a yâng Saul, “Mwat hwak a kwon wok bengyip WoFilisti mo wɛt! Ma rɔda wɔ̀ man gèy na yɛ.”

³³Ko Saul a yâng Davit, “Kée kàa, hwô tɔk wɔ na WoFilisti wane, na hwo tó como na yɛ wɛt! Hwà rɔngɔl kewen zɔng e ngyen, ko yɛ̀ a sé mwat de e tó como yimo yɛ wen.”

³⁴Davit kwong a toyo a yɛ, a ye, “Di, me sam mō, ma sé kyě gyeng vyêl da hom. Ka sede gukum kɛ beyar ba vey vo cak e ji kwarâ vyēl o, ba sé kyè mɛ,

³⁵ko me tɔk ro wɛ, me ra yol na wɛ, ko me to sey ɛ kevyel o yi na wɛ. Ko ka sede wa doyo na yol vey hwo me, ko me kaba gatîs wɛ̀, me vɛ̌ rusu wɛ vɔk e vwel, me vɛ̌ mɔrɔ wɛ.

³⁶Ma ga mɔbɔs gukum mwa na murum, ko mandûl WoFilisti womo a rɔda to raa hɛn arɔng, yaga a ga byɛs regyɛng bemât comô Dagwi wo neken!

³⁷Dagwi Darwey de a ga séy me yi e bekɛn gukum na ve murum, a rɔda sey me yi na WoFilisti womo arɔng.” Saul a yang ɛ, “Ko ci, tik na Dagwi Darwey a sè tanga hwo.”

³⁸A vane ano, Saul a hwo tɔrɔ Davit na yɔ̀m como mɛ, a tɛ̀ a yɛ bong dyam pama e rato mɛ, ko a rɔgɔs a yɛ wap gèy.

³⁹Davit a gana wâl Saul e ra yɔ̀m como mo; a ye e mara kwɛngɛl na yɛ̄, ko a kyɛm wɛt, yaga a ga tɔ́k ɛ́ na yɛ̄ wɛt. Ko a yâng Saul, “Me tɔk kyè na yɛ̀ wɛt, yaga ma ga tɔ́k me na yɛ̄ wɛt.” A to pat yɛ̄.

⁴⁰Ano kwong, a hwo jut gwelê gyeng vyēl mɛ, a pere tɔ́ng neta netungun de na sé hyul-hyul e ji rɔt, a tɛ̀ e ji rabâk gyêng vyēl mɛ, ko yɛ̀ na negazik mɛ e vwɔ a kyè mɛ wɔ̀ man na WoFilisti mo.

⁴¹Gɔliyat kwong a hwo kyè vey man na Davit, mwât vɔ̂k ruga mɛ a sè kyè e nuyel mɛ.

⁴²Jeng de a di Davit, kedɔ̄lɔ̂k kewen, kerat e bɛrɛng, ko a vɛ̌ byɛs ɛ.

⁴³WoFilisti mo a yâng Davit, “Káa, ma sé vu de hwó kyè vey sɛ̀ me na begele arɛt?” A hwo ha hâ gawey e ra Davit e ji bazâ bedagwi mɛ,

⁴⁴ko a to yang ɛ, “Vey e ngamo, ko ma rɔda nɔ̂ng benon, na ngyāma banama mō.”

⁴⁵Ko Davit a toyo a yɛ, a ye, “Hwó kyè vey man na me, hwà vɔk wal, na bara tanga tom-bara. Ko me ma sé kyè vey na hwo e ji rezâ Dagwi Darwey, Da Jey Mwa, yɛ Dagwî regyɛng bemât comô BeIsrayɛl; e yɛ wɛ de hwà byɛs ɛ.

⁴⁶Di, yunung womo Dagwi Darwey a rɔda nára hwo e ji vwɔ hom! Ma rɔda mɔrɔ hwo, ko me tùt to mō. Ma rɔda nɔ̂ng benon na ngyāma banamâ regyɛng BeFilisti! Yi ano, bemât jêy mwa ba rɔda tɔk, BeIsrayɛl ba vɔk Dagwi de a vɔk reto.

⁴⁷Ko mwa regyɛng bemat vemo de ba tula hɛn ba rɔda tɔk, Dagwi Darwey e nɔng wɛng sana wal kɛ bara. Yaga como mo ya sé ye Dagwi Darwey, yɛ̀ kwong a rɔda nára hin e ji vɔ mot.”

⁴⁸Jeng de Gɔliyat a hwo gwɛ̌ sek bagat vey sɛ̀ ɛ́, ko Davit kwong a ye kyùk-kyuk vɔk e nû durâ comô BeFilisti, na a man na yɛ.

⁴⁹Davit a vɛ̌ tɛ̀ vwɔ mɛ e ji rabak, a jut keta kining, a tɛ̀ kɛ e negazik mɛ, ko a zigma wɛ. A nára keta mo, ko ka fala WoFilisti mo e ratili mɛ, paak, ka pere wɔ̀ ye pyɔp e ji mo, ko a vɛ̌ gaba gup.

⁵⁰Ano de Davit a di wɛng e ra Gɔliyat, a mɔrɔ hɛ na negazik na keta zɔng, vit a wal e vwɔ mɛ!

⁵¹A vɛ̌ tele, a tumal e ra WoFilisti mo, a hwɔltɔ gbɔng wal mɛ yi e fwal o, a mɔrɔ hɛ, ko a to pat mɛ rato mo. Jeng de BeFilisti ba di gbɔng suga mɛn a ga ku, ba vɛ̌ hwo tele.

⁵²BeIsrayɛl, na BeYuda, ba nusu na newawa como, ba raa hɛn, ba vɛ̌ ro BeFilisti, ba kyè mɛ̀ vɔk e gwonɛk, wɔ̀ tut mɛ̀ e rwi repomô Ɛkrɔn, BeFilisti vemo de ba mǎ hɛn, ba kyě gabsa ba kushu e begwong vɔk e Shaarayim, wɔ̀ tut mɛ̀ e Gat na Ɛkrɔn.

⁵³Bama de BeIsrayɛl ba toyo yi e de rô BeFilisti, ba vey hashe pyɛ́ e buk mɛn.

⁵⁴Davit kwong a jut ratô Gɔliyat, a vey mɛ̀ e Yɛrusalɛm, ko pyɛ̂ comô Gɔliyat o a tik e ji buk mɛ.

⁵⁵Jeng de Saul a di Davit a sé kyè wɔ̀ man gèy na Gɔliyat, ko a rangâl Abnɛr, mwât nuyêl como mɛ, a ye, “À Abnɛr, e hwêy wà à wen womo ɛ?” Abnɛr a toyo a yɛ, a ye, “Neken mō ne ros, à gbɔng gwɔ̀m, ma tɔk wɛt.”

⁵⁶Ko Saul a yang ɛ, “Rangal a me, e hwêy wà à wen womo mo arɛt?”

⁵⁷Jeng de Davit a toyo yi e kwɔ̂n mɔrɔ̂ Gɔliyat, ko Abnɛr a jut ɛ́, a wɔ́ mɛ̀ na Saul, yɛ a sè rɔ̌ vɔk tô WoFilisti mo e vwɔ mɛ.

⁵⁸Saul a rangal hɛ, a ye, “Hwà sé hwêy wà à hwey hom ɛ?” Davit kwong a toyo a yɛ, a ye, “Ma sé hwêy sam mō Yisai yi e Bet-Lɛhɛm.”