Read berom 1 Samwɛl 18 Bible Online

1 Samwɛl 18 - berom bible

1 Samwɛl 18

¹Bama de Davit a yɛnɛ ha na Saul, ko yêy Yɔnatan ya vɛ̌ man ɛ na yê Davit. A tɛ̀ yey na Davit sede yɛ pyɛ mɛ.

²Yi e tuk hane, Saul a vɛ̌ vɔk Davit e lɔ mɛ, a to tik ɛ a toyo vɔk e lɔ da mɛ wɛt.

³Yɔnatan kwong a wuna nesa na sira na Davit, yaga a tɛ̀ yey na yɛ sede yɛ pyɛ mɛ.

⁴Yɔnatan a pat gworugu mɛ tanga wap gèy mɛ, a nɔ̂ng Davit, a to nɔng ɛ wal mɛ na gbang mɛ, mwa na gyindi mɛ.

⁵Kahɛ kwɔn de Saul a tomo Davit, ko e wɔ̀ di wɛng, ko Saul a vɛ̌ tɛ̀ ɛ a tɛ́ ɛ mwât nuyêl bemât como mɛ. Pyɛ yane ya jam a bemât como mwa na vê nuyel arɔng.

⁶Jeng de bemât como ba sé toyô vɛ hɛn, ko Davit a sé toyo yi e de mɔrɔ̂ WoFilisti, beha ba nusu yi e ji bapomo Israyɛl mwa vey gyeng Gbɔng Gwɔ̀m Saul e gwong, bá sè ra lwɛlɛ, ba sè rɛ̌, ba raa be ra ɛ̀ bejàgawaga tanga yōm.

⁷Bá sè ra lwɛlɛ̂ remo besuga, ba tē: “Saul a mɔbɔs bemât repugu gu, ko Davit a mɔbɔs bemɛ gu kuru!”

⁸Saul kwong a tɛ̀ shom sizɔng, yaga ha hane ha jam a yɛ ko tyɔng wɛt; a ye, “Ba nɔ̂ng Davit gu kuru, ko ba nɔng me gu zɔng! E sɛ́ de ya pɔl a yɛ kwong ɛ̀, sɛ̌ negwɔm zɔng da?”

⁹Yi e tuk hane Saul a hwo bɛrɛng Davit wɛɛl na repugu.

¹⁰Het à gasi, Dagwi a tɛ̀ gabik ves ha hwo e ra Saul, a hwo lolong e ji lɔ, ko Davit a ra a yɛ yom sede remo de a ga tɔ́k ɛ́ mɛ̀. Yɛ̀ Saul o á vɔk bara e vwɔ mɛ,

¹¹a rene, na a toro mɛ̀ Davit, na a man ɛ na vwara, ko Davit a ye wɛ́kwɛk zang ba.

¹²Saul a hwo wok bengyip Davit, yaga Dagwi Darwey a sé tanga yɛ, ko a ga gas ɛ́ na yɛ̀ Saul o.

¹³Yaga ano, a pat Davit yi e bayis mɛ, ko a tɛ̀ ɛ́ a sè mwât nuyêl bemât como gu rining. Davit kwong a nunus na yɛn vɔk e de como.

¹⁴Kayɛ jeng Davit a dopse bɛrɛng wɛng e ji pyɛ́ de a ragas, yaga Dagwi Darwey á sè tanga yɛ.

¹⁵Jeng de Saul a di Davit e bɛɛ wɛng e de fwom mɛ, ko a gwɛ̌ tɛ̀ bengyip mɛ.

¹⁶Mwa BeIsrayɛl tanga BeYuda ba tɛ̀ yey na Davit, yaga á sè wo nuyel mɛn de be bɛɛ wɛng e como yi na yɛ.

¹⁷A vane ano, Saul a yâng Davit, “Di, hwóng hom kunat, Merap, ma rɔda nɔng o hɛ e weneng, ko hwo arɔng, hwà rɔda tɛ́ o sugâ como hom, na hwo tó como yaga Dagwi Darwey.” Saul a bare, yɛ e simo na a mɔrɔ hɛ na vwɔ mɛ wɛt, ko tik na a wey e vwɔ̂ BeFilisti e negya.

¹⁸Davit a toyo a yɛ, a ye, “Ma sé wà? Cang hom ya sé beva, lɔ̂ da hom ha sé lɔ wà e ji Israyɛl de ma rɔda tɛ́ me sɔ̂m gbɔng gwɔ̀m ɛ?”

¹⁹Sede jeng ya ra de ba rɔda rɔgɔs a Merap, hwông Saul, weneng na Davit, ko ba vɛ̌ jut ɛ, ba nɔ̂ng Adriyɛl wo Mahola e weneng kwong.

²⁰Ko Mikal, hwông Saul, a tɛ̀ yey na Davit. Jeng de ba misang a Saul ha mo, ko ha jam a yɛ.

²¹A bare e yey mɛ, a ye, “Ma rɔda nɔng ɛ hɛ e weneng, na a bin tɛ́ ɛ segun na yɛ, yaga na BeFilisti be bin mɔrɔ hɛ.” Yaga ano, a yâng Davit, “A remo, hwà rɔda sɛ̀ sɔ hom kē.”

²²Saul a misang a bemât fwom mɛ, a ye, “Ha in na Davit e bak gwining, yang in hɛ, ‘Di, gbɔng gwɔ̀m a vɔk yey pyɛng na hwo, ko bemat mɛ mwa be simo hwo arɔng, ê sè naka na hwo ra wenêng hwóng mɛ mo.’ ”

²³Sede bemât fwôm Saul ba ha a Davit ha hane, ko Davit a toyo a yɛn, a yang ɛn, “Yin e bɛrɛng sede a sé pyɛ jɔgɔ na mwat a sè sɔ̂m gbɔng gwɔ̀m arɛt? Me de ma sé pwɛng, vit a me na nerey nehak.”

²⁴Bemat o ba toyo a Saul na ha de Davit a ha,

²⁵ko yɛ a to yang ɛn, “Há in a Davit ngan: Gbɔng gwɔ̀m e simo yas hwā cak na hwo wɛt, sɛ̌ hwo wɔ̀ vey a yɛ na bahwô bedulûs BeFilisti naga zɔng, yaga na hwo tala a yɛ̀ mɛ̀ pyɔ̌n e ra bemât repugu mɛ.” Saul a bare, tik na BeFilisti be mɔrɔ hɛ.

²⁶Jeng de bemât fwôm Saul ba ha a Davit ha hane, ko ha mo ha jam a yɛ de ê tɛ́ ɛ sɔ̂m gbɔng gwɔ̀m. Gyam na jeng de ba tɛ̀ mo ye kwey,

²⁷Davit a nusu na bemat mɛ, ba wɔ̀ mɔbɔs BeFilisti naga beba, a vey na bahwô bedulus o, a bara a gbɔng gwɔ̀m vɛ, yaga na a bin tɛ́ ɛ mɛ̀ sɔm mɛ. Yi ano, Saul a nɔ̂ng Davit hwóng mɛ Mikal e weneng.

²⁸Sede Saul a di, Dagwi Darwey a sé tanga Davit, ko Mikal, hwóng mɛ, a tɛ̀ yey na yɛ arɔng,

²⁹a gwɛ̌ tɛ̀ bengyip mɛ. A re nuyel na tɛ́ ɛ mwât repugû Davit vɔk e jeng reku mɛ.

³⁰Begwɔ̀m BeFilisti ba nunus vɔk e de como, ko kayɛ jeng Davit e re wɛng e ra yɛn a dal mɛ bwang bemât nuyêl comô Saul. Yaga ano, reza mɛ ra nusu jey ding-ding.