Read berom 1 Samwɛl 19 Bible Online

1 Samwɛl 19 - berom bible

1 Samwɛl 19

¹Saul a tɔgɔs sɔ mɛ Yɔnatan tanga mwa bemât fwom mɛ wɔgɔ, be wey na Davit. Ko Yɔnatan a tɛ̀ yey na Davit sizɔng.

²Yaga ano, a ha a Davit, da mɛ e simo, na a mɔrɔ hɛ. A yang ɛ, “Hwo ba tē naka nahwol gasi, tik na hwo ba wɔ̀ lɛrɛ hwo e kwɔn hak, ko hwo sangal e lɛrɛ mo.

³Ma rɔda ba tumal bagat na da hom e cwɛl e kwɔn de hwà sé ɛ, ko ma rɔda ha a yɛ reha mō. Ko pyɛ de ma sɛ̀, ma rɔda ba ha a hwo.”

⁴Ano kwong, Yɔnatan a ha a da mɛ ha rat e ra Davit, a yang ɛ, “À da, hwo kwon lashe mwât fwom mō Davit wɛt, yaga yɛ arɔng a ga buru a hwo wɛt. Mwin, pyɛ́ de a ga ra mwa ya sé yaga gbɔng nerat mō.

⁵A ye waa à neken mɛ, a wɔ̀ mɔrɔ WoFilisti, ko Dagwi Darwey a nɔ̂ng BeIsrayɛl gbɔng wɛng. Hwo pyɛ mo hwá di, ko hwá vɔk yey pyɛng. Yaga sɛ́ kwong de hwó simo, hwo tɛ̀ banɛn e ra mwat de a ra pyɛ cak wɛt, na hwo mɔrɔ Davit sana tin arɛt?”

⁶Saul a hwo wet betong na ha de Yɔnatan a ha, ko a vɛ̌ sira hɛ, a ye, “Ma sira me na Dagwi Darwey, ba rɔda mɔrɔ Davit wɛt.”

⁷Ano kwong, Yɔnatan a yila Davit, ko a ha a yɛ pyɛ́ yemo mwa. E bama mo, a vey na yɛ na Saul, ko Davit a re nuyel na ra a yɛ̀ fwom sede raane.

⁸Como ya to sogo e tē mɛn na BeFilisti, ko Davit a nusu, a wɔ̀ to como mo. A re ɛn, a mɔbɔs hɛn ding-ding, yaga ano yɛn a tele yi e nuyel mɛ.

⁹E bama de a ga toyo yi e de como, ko Dagwi Darwey a to tɛ̀ gabik ves ha hwo e ra Saul jeng de á sè sangal e ji lɔ mɛ na bara e vwɔ mɛ, Davit kwong á sè ra a yɛ yom.

¹⁰Saul a hwo nára bara, na a toro mɛ̀ Davit, na a man ɛ na vwara, ko Davit a ye wek, bara mo wa pere wɔ̀ re vwara. Davit kwong a vɔk a hywit ɛ, a tele e turuk hane, a wɔ̀ dal.

¹¹Saul a hwo tomo betom wɔ e lɔ Davit, na be wɔ̀ sangal be wɛrɛm hɛ, na be bin mɔrɔ hɛ nagasi. Ko hwā mɛ Mikal a yang ɛ, “Ka hwà tele wɔ̀ lɛrɛ hwo nabwalak nemo wɛt, ko bê ba mɔrɔ hwo nagasi.”

¹²Ko a hwo gyira hɛ yi e repɔk duk, a vɛ̌ tele, a wɔ̀ dal.

¹³Mikal kwong a jut pyɛ sekwit de ba yong sede mwat, a lasha e ra gwat, a tɛ̀ á ratô yɛ setôt vyel shi, ko a vɛ̌ bang yɛ na gworugû Davit.

¹⁴Jeng de Saul a tomo betom wɔ̀ vo Davit, ko hwā mɛ a yang ɛn, “E ro hɛ.”

¹⁵Saul a to tomo betom o, na be wɔ̀ di Davit o pyɛ mɛn, a nɔng ɛn nu, a ye, “Vey in a me na yɛ e ra gwat o e ngamo, na me mɔrɔ hɛ.”

¹⁶Ano kwong, jeng de betom o ba pom — Àaa! — Ba sɛ̀ pyɛ sekwit yane de ba yong o e dyɛngɛ, na setôt vyel shi e ratô yɛ, e banga e ra gwat o!

¹⁷Saul a hwo yâng Mikal, “Yaga sɛ́ de hwà kwɛlɛng me ano, ko hwo tik mwât repugu hom a hywit ɛ a wɔ̀ dal ɛ?” Ko Mikal a hanat, a ye, “Davit a yang me, ka sede ma tik ɛ wɛt, ko a rɔda mɔrɔ me.”

¹⁸Davit a ga kana hywit ɛ, a tele, a wɔ̀ sɛ̀ Samwɛl e Rama, ko a misang a yɛ pyɛ̂ mwa de Saul a ga ra a yɛ. Ko yɛ tanga Samwɛl ba kyè, ba wɔ̀ sangal e bak bezarap Dagwi.[17]

¹⁹Ba ha a Saul wɔgɔ, Davit a sé sangal e bak bezarap Dagwi e Rama.

²⁰Ko a hwo tomo betom wɔ̀ vo Davit. Yɛn a pom, ba sɛ̀ regyɛng bezarap Dagwi, ba sé rɛ̌, ba sé tē lōm, ba sé ha buu, Samwɛl kwong, mwât nuyel mɛn á sè ɛ̀ e tumal e hwomo. Gabik Dagwi kwong ha hwo e ra betom Saul o, ko yɛn arɔng ba wuna hɛn, ba ra pyɛ jining o.

²¹Bemat behak ba wɔ̀ ha a Saul ha mo, ko a to tomo regyɛng bemat o rehak, ko rane ra to wɔ̀ wuna hɛ arɔng. Saul a to tomo regyɛng o re netat, ko rɛ arɔng ra to wɔ̀ wuna hɛ na bemɛn e ji rɛɛ tanga yis na ha buu mo.

²²E yɛnɛ mo, yɛ pyɛ mɛ a hwo sogo wɔ̀ e Rama mo. Jeng de a wɔ̀ wul e gbɔng kwâng nshi e Sɛku, a hwo rangal, “Samwɛl tanga Davit ba sé e gwa ɛ?” Mwat hwak a yang ɛ, “Di, yɛn a vane e bak bezarap Dagwi e Rama.”

²³Jeng de a sé kyè vɔk e Rama mo, ko gabik Dagwi ha hwo e ra yɛ. Yɛ arɔng a hwo rɛ̌, a tē lōm, ko a ha buu, a pere wɔ̀ wul mɛ̀ bak bemat o e Rama.

²⁴Yɛ arɔng a hwo paa berugu mɛ, a rɛ̌, a tē lōm, ko a yis na ha buu e nuyêl Samwɛl, a wosho, a ruru, a dyɛng warap pere wɔ̀ pɔl ɛ. Yaga ano, ba ye na cinât ha, “Saul arɔng a sé zarap Dagwi arɛt?”