Read berom 1 Samwɛl 2 Bible Online

1 Samwɛl 2 - berom bible

1 Samwɛl 2

¹Hana a ra won, a ye, “Dagwi Darwey a tɛ̀ yey hom ye pɛngɛ sedesi, ma sɛ̀ wɛng yi na Dagwi Darwey. Ma sé shɛgɛsh bemât repugu hom, ma vɔk yey pyɛng, yaga hwà sey me.

²Vit a mwat de a sé jɛrɛ tyɛng na Dagwi Darwey, ey mwin, vit a hwak de a sé sede yɛ, vit a hwak de ê tɔk dul ot sede Dagwi mot.

³Yin kwon re nuyel na dâk kaa wɛt, tík in neha dak ragey nane arɔng, yaga Dagwi Darwey a sé wo tɔk mwa, e to masa pyɛ́ mwa tɛk de mwat a ra.

⁴A kwɔrɔs gbang bemât gap, ko a nɔ̂ng bemat de ba sé gbɛrɛk gap.

⁵Vemo de bá vɔk pyɛ́ shɛrɛk, ba wɔ̀ ra a behak fwom, na be sɛ̀ mɛ pyɛ̂ re. Ko vemo de bá sè pɛ́ng-pɛng, ba to wok vyong wɛt. Di, sang-gwon a tɔs nèy netaama. Ko dê nèy a de bidɛ nemɛ mwa.

⁶Dagwi Darwey e tɛ̀ mwat a ku, ko e tɛ̀ mwat a sé kwen. E tɛ̀ mwat a wɔ́ na beda mɛ e vwel, ko e tɛ̀ mwat a sogo arɔng.

⁷E tɔk tɛ̀ mwat a sé pwɛng, ko e tɔk tɛ̀ mwat a sé darwey. E tɔk tɛ̀ a mwat nerey, ko e tɔk to jut nerey o arɔng.

⁸E tɛ̀ pwɛng cik yi e ji nepɛng mɛ, e pat mwât vyong yi e reyɔm mɛ. E tɛ̀ ɛn be sangal e tê bemat beting, e nɔng ɛn beta sangal e kwɔ̂n garang. Yaga jey mwa ya sé yê Dagwi Darwey, a tòro yɛ̄ e ra retis de ra sangal gak.

⁹E gyeng nekên vemo de be tɛ̀ gap mɛn e ra yɛ, ko bemat beves ba rɔda wey e ji lwīl; yaga vit a mwat de e di wɛng yi na gap mɛ pyɛ mɛ.

¹⁰Ba rɔda fugut bemât repugû Dagwi Darwey, yɛ a rɔda lulum gbara e ra yɛn yi e lagwi. A rɔda ra a bemât jey mwa shɔt, ko a rɔda nɔ̂ng gwɔ̀m de a kasa reto, a rɔda tɛ̀ ɛ, a sè wo wɛng.”

¹¹Ɛlkana ba toyo hɛn vɔk e lɔ mɛn e Rama. Ko ba tik hwey Samwɛl, na a sangal, a ra a Dagwi Darwey fwom e Shilo e vwɔ̂ Ɛli, gbɔng piris.

¹²Nèy Ɛli ná sè neves tyɔng wɛt. Yɛn á ka nɔ̂ng Dagwi Darwey nerey wɛt,

¹³kɛ bá raa badu e ra pyɛ́ de bepiris be sey yi na bemat arɔng wɛt. Ko a sé e jeng de mwat a vey nára nɔrɔ yas de be yɛt vɔk na Dagwi, jeng de ba sé kyé banama mo, ko mwât fwôm piris o a rɔda vey na kàm ngɛngɛ tat.

¹⁴A rɔda luga mɛ̀ nama e rwey e bapik, ko kahɛ nama de a luga hane ha rɔda tɛ́ ɛ hê piris. Ba ra a kawɛ WoIsrayɛl de a vey nára nɔrɔ mɛ ano e Shilo.

¹⁵A dal mɛ, jeng de ba rɔngɔl nà pat sebwep o na be rangas, ko mwât fwôm piris o a rɔda vey, ê ye, “Neme numo hê piris de bê rangas. Yɛ e simo hemo de ba ye puu yi na hwo wɛt, sɛ̌ ven o zɔng!”

¹⁶Ka sede mwat o a yâng mwât fwom o, “Ka tik, na wot pat sebwep de bê rangas e ngyen, na be de nɔng o.” Ko mwât fwom o ê ye, “Wey! Nɔng me a remo-remo! Ka sede hwà ró mɛ̀, ko ma rɔda vɛ na retek”.

¹⁷Banɛ̂n nèy Ɛli vemo ba sé baves tyɔng wɛt e nuyêl Dagwi Darwey, yaga yɛn a teshe na nenɔrɔ de be nɔngɔ̂s Dagwi.

¹⁸Samwɛl hwey o, ha sé ra fwom e nuyêl Dagwi Darwey, a tɛ̀sɛ kerugû fwom kepɛng kerat de ba tolo a yɛ.

¹⁹Ko kahɛ shey neng mɛ e tolo a yɛ kerugu kepas de e tɛ̀sɛ e jeng zɔng. E vɔk a yɛ kɛ jeng de e wɔ tanga rwas mɛ e de narâ nɔrɔ yas de be yɛt vɔk na Dagwi.

²⁰Ɛli kwong e tɛ̀sɛ a Ɛlkana tanga hwā mɛ nerat, e tē, “Tik na Dagwi Darwey a nɔng o nèy yi na hwā womo e tô hemo de yɛ a ga ra wôn hɛ, ko a to nɔ̂ng Dagwi Darwey. Bama mo kwong, yɛn a to ɛn vɔk e lɔ.”

²¹Ko Dagwi Darwey a tɛ̀sɛ a Hana nerat, a to tɔ nèy nehak netungun, bewen betat na behwong beba. Wen wane, Samwɛl, a ras, a sé ra a Dagwi Darwey fwom.

²²Ɛli a ga kana kwop ding-ding. A hwo wokos pyɛ́ de nèy mɛ ne ragas a BeIsrayɛl, na ne to dyɛngɛs na beha de be ra fwom e lalâ Bûk Sangâl Dagwi.

²³Ko a yang ɛn, “Yaga sɛ́ de yin e ragas pyɛ́ yemo ano ɛ? Bemat mwa be há a me yerê pyɛ́ vyes de yin e ragas.

²⁴Wey, à nèy hom! Tik in ragâs pyɛ́ yane! Me wokos rehâ pyɛ́ yane de bemat be ha, ko e sè a me rwat wɛt.

²⁵Ka sede mwat a ra a gwa mɛ mwasi banɛn, ko Dagwi ê tɔk yel e tē mɛn. Ko ka sede mwat a ra a Dagwi Darwey banɛn, wa a rɔda tɔk ra won, na be hala a yɛ vɛ ɛ?” Ko yɛn a wok hâ da mɛn wɛt, yaga Dagwi a ga kana yong ɛ, a rɔda wey na yɛn.

²⁶Hwey hane Samwɛl ha re nuyel na ras, ha jam a Dagwi Darwey, ko ha to jam a bemat arɔng.

²⁷Zarap Dagwi hwak a vey na Ɛli, ko a yang ɛ, “Wok reha de Dagwi Darwey a sé tomo vey na hwo. A ye, ‘Jeng de dâ beda mō Aharon na belɔ mɛ bá sè besam gbɔng gwɔ̀m Misra, má kana dura tó hom na yɛn.

²⁸Má kasa hɛ na lɔ mɛ yi e ji yerê BeIsrayɛl mwa. Má tɛ̀ ɛn, be tɛ́ ɛn bepiris hom, na yɛn a ra fwom e gàgbang rangâs yas de be yɛt vey na me, na be rangas ɛ pyɛ̂ nesang hyɔɔlɔl, na be tɛ̀sɛ radîng pyɛ̂ fwôm rangsal me mɛ arɔng. Ko ma to nɔng ɛn numo hê nenɔrɔ̂ pyɛ̂ rangas mwa de BeIsrayɛl ba vey me na me, na be vɔk arɔng.

²⁹Yaga sɛ́ kwong de yin e byɛs nenɔrɔ̂ yas de be yɛt mwa na pyɛ̂ rangas de ma nɔng nu, na be vɛsɛ a me mɛ e kwɔ̂n sangal hom ɛ? Ko hwo, à Ɛli, hwó nɔngɔ̂s nèy mō nerey ne dal nemo de hwó nɔngɔs me! Hwà tik ɛn be mɔsɔ na cɔ̌ pyɛ́ yemo de bemat hom BeIsrayɛl be vɛsɛ a me mɛ.

³⁰Ma kana sira a hwo wɔgɔ, nèy, na nèy nèy mō vɔk e nuyel na rɔda sè bepiris hom nesheneshey. Ko di a remo, a rɔda se ano ko tyɔng wɛt! Mwa vemo de ba nɔng me nerey, ma rɔda nɔng ɛn nerey arɔng, ko vemo de ba byɛs me, ma rɔda byɛs ɛn arɔng. E me Dagwi Darwey, Dagwi wo BeIsrayɛl, de ma ha ha hemo.

³¹Di, jeng ye kyè vey de ma rɔda kwɔrɔ gap mō na hê lɔ da mō. E ngamo nuyel yin a rɔda kushu beven, hwak a rɔda kwop wɛt.

³²Ko yin a rɔda bɛrɛng rìshish, na yin masa bayis e ra pyɛ̂ neta mwa de ma rɔda nɔ̂ng bwâng BeIsrayɛl. Ko vit a mwat e ji lɔ mō de a rɔda to kwop.

³³Ko di, ma rɔda tik ɛ̀ hwak yi e lɔ mō, na a ra fwom e nuyel hom. Ko yɛ[4] a rɔda tɛ́ ɛ́ buga, a rɔda bɛɛ yɔɔm, ko bwâng belɔ mō ba rɔda kushu beven.

³⁴Nèy mō neba Hɔfni na Pinehas nà rɔda kushu tuk hining. Hane ha rɔda tɛ́ ɛ pyɛ dura wɔgɔ, kayɛ pyɛ de ma ha ya rɔda sila hɛ.

³⁵Ma rɔda kasa piris hom womo de ê man ɛ na me, de ê ra pyɛ́ tyɛng na simô yey hom. Ma rɔda nɔng ɛ cáng yemo de ya rɔda ra fwom kayɛ jeng e nuyêl womo de ma kasa.

³⁶Ko bwâng mwat de a tɛt ɛ e ji lɔ mō na neken, a rɔda ba gaba e nuyel mɛ, na a ra wôn rɔ̌ dyam kɛ cɛ̌k kpam-tuk. A rɔda ye, “Nɔt me rɔ̌ fwom hwak gwô piris, gyeng na me sɛ̀ mɛ pyɛ̂ re.” ’ ”