Read berom 1 Samwɛl 20 Bible Online

1 Samwɛl 20 - berom bible

1 Samwɛl 20

¹Davit a tele yi e bak bezarap Dagwi e Rama, a wɔ̀ sɛ̀ Yɔnatan, a yang ɛ, “E sɛ́ de ma ra ɛ? Renɛn hom à sɛ́ de ma ra a da mō, de e jāma, na a mɔrɔ me arɛt?”

²Yɔnatan a toyo a yɛ, a yang ɛ, “Dagwi a ro mɛ, hwà rɔda ku wɛt! Da hom e ra pyɛ cak wɛt kɛ ya sé ryey o kɛ shɛl o ayi. Yɛ a rɔda tɔk lɛrɛ a me ha hemo wɛt, ê sè tsak o wɛt!”

³Davit a toyo na ha, a ye, “Da mō a tɔk tsɛng-tsɛng, hwà sé sâ yey hom. Yaga ano, a simo a ha a hwo pyɛ de a yong ɛ mo wɛt, yaga ê kwon lashe a hwo yey. Ma sira a hwo, sede remo de Dagwi Darwey a sé wo neken, ko sede remo de hwà sé kwen arɔng, bwang o tyɔng ka ma ga ku.”

⁴Yɔnatan a yâng Davit, “Kayɛ pyɛ de hwà simo me ra, ko ma rɔda ra a hwo.”

⁵Davit a yang ɛ, “Di, nahwol a sé tûk pwɛl pwas, ko a sé gbing-gbing na me ba re pyɛ́ tanga gbɔng gwɔ̀m. Ko tik me wɔ̀ lɛrɛ me e ji cwɛl sɛ̌ gwaane nahywegelek.

⁶Ka sede da mō a di me wɛt, ko hwo yang ɛ, ‘Davit a ra won na me na me nɔng ɛ gwong, na a wɔ́ ziri e lɔ mɛ e Bet-Lɛhɛm, yaga yɛn a vɔk tulâ nára nɔrɔ̂ yas hê nesheneshey hê belɔ mɛn mwa.’

⁷Ka sede a ye, a sé naka, ko sɛ̌ ma rɔda dal; ko ka sede shom ya sogo a yɛ, hane hê dura, a ga yong ɛ, a rɔda wey na me.

⁸Gabɔk wɛt, ra a me pyɛ ryat, sede remo de hwà ga jut me, na wot wuna nesa na sira e nuyêl Dagwi Darwey. Ko ka sede hwà di, ma vɔk renɛn, ko nduga hwo mɔrɔ me pyɛ mō! Yaga sɛ́ de hwô wɔ na me na da mō, na a mɔrɔ me ɛ?”

⁹Yɔnatan a toyo a yɛ, a yang ɛ, “Hwo ha yerê ha hane wɛt! Ka sede ma tɔk, da hom a ga yong ɛ, na a mɔrɔ hwo, sɛ́ de yê dul me nà ha a hwo ɛ?”

¹⁰Davit a rangal hɛ, a ye, “Wa a rɔda ha a me, ka sede da mō a toyo a hwo há mo na shom ɛ?”

¹¹Yɔnatan a yang ɛ, “Tik wot nusu wɔ e hey.” Yɛn a nusu mwa hɛn,

¹²ko a to yang ɛ, “Ma sira a hwo e nuyêl Dagwi Darwey, Dagwî BeIsrayɛl: ma rɔda mɔktɔ da hom na ha e jeng yemo nahwol kɛ nagwaane, ka sede ha mo hê sè a hwo rat, ko ma rɔda tomo, be ha a hwo, na hwo tɔk.

¹³Ko ka sede da hom e simo, na a wey na hwo, ko ma tɔk, ko ma tik nà dura a hwo, na me tɛ̀ o e gwong, na hwo kyè wɔ̀ dal tyang, ko tik na Dagwi a teshe na me ves. Tik na Dagwi Darwey a sè tanga hwo, sede remo de a kana sè tanga da hom!

¹⁴Ka sede ma rɔngɔl kwen, jeng de hwô re negwɔm, ko dura a me yerê nerat ne Dagwi Darwey. Ko ka sede ma ga ku,[18]

¹⁵hwo kwon tik nà dura a belɔ hom nerat arɔng ko tyɔng wɛt, ka Dagwi Darwey a ka wey na bemât repugu mō hywiri yi e jey mwa.

¹⁶Ano de Yɔnatan a wuna hɛ na sira tanga lɔ Davit, a ye, tik na Dagwi Darwey a ra a nèy mō shɔt, na a tala hɛn pyɔlɔ mɛn, ka sede yɛn a gyeng sira mot wɛt.”[19]

¹⁷Ko a gwɛ̌ ha, a ye, sira a me, hwô ra pyɛ́ yemo mwa, yaga hwà tɛ̀ yey na me. Bare, hwà tɔk, ma tɛ̀ yey na hwo sede to hom pyɛ hom!

¹⁸Yɔnatan a to yâng Davit, “Nahwol a rɔda ba sè tûk pwɛl pwas, ko ba rɔda ba bidɛ hwo, yaga kwɔ̂n sangal mō e kwɔ̂n rê pyɛ̂ nzem ha rɔda ba sè hal.

¹⁹Yaga ano, nagwaane, kyè ziri vɔk e kwɔn de hwà kana lɛrɛ hwo ɛ raane, ko hwo sangal bagat na gwofwa Ɛzɛl.

²⁰Ko di, ma rɔda ba tabas ket tat vɔk e hagât gwofwa mo sede ma sé tabas pyɛ cak.

²¹Ko ma rɔda tomo wen, na a wɔ̀ jāma ket o. Sede ma yang ɛ, ‘Di, ket o bà sé vey e ngamo na hwo, wɔ̀ hashe vɛ’, ko hwo tɔk, vit a pyɛ de yê tē na hwo, hwà rɔda sè gyat. Dagwi Darwey a sé e tē mot.

²²Ko sede ma yila wen o, ma ye, ‘Di, ket o a vane e nuyel mō’, ko hwo kyè, yaga Dagwi Darwey a ga tɛ̀ o e gwong a rane.

²³Ko rehâ sirâ nesa de wot a ga ra na hwo, tik na Dagwi Darwey a sè wo nuha mot gbak-gbak.”

²⁴Ano de Davit a lɛrɛ hɛ e cwɛl. Jeng de pwɛl pwas gwa nusu, ko gbɔng gwɔ̀m a sangal e kwɔ̂n rê pyɛ̂ nzem.

²⁵A sangal e kwɔn mɛ de e sangsal ɛ, mā mɛ e vwarâ duk, Abnɛr a sangal bagat na yɛ, ko Yɔnatan a sangal e bak woro e bɛrɛng hɛ.[20] Ko kwɔ̂n Davit ha sè hal.

²⁶Saul a ka ye pyɛ cak tuk hane wɛt, yaga a bare, “Gyeng a ga pɔrɔk hɛ na rɔ̌ pyɛ, a rɔngɔl nà tɛ̀ tó mɛ jɛrɛ.”

²⁷Ko tuk he bâ pwɛl pwas o mo, kwɔ̂n sangâl Davit ha to sè hal gbak. Saul a hwo yâng sɔ mɛ Yɔnatan, “E sɛ́ de ya tɛ̀ hwêy Yisai ha nàra nà vey e de rê pyɛ́ nayos tanga yunung ɛ?”

²⁸Yɔnatan a toyo a yɛ, a yang ɛ, “Davit a shonong me, me simo a yɛ, na a wɔ́ e Bet-Lɛhɛm.

²⁹A ye, ‘Gabɔk wɛt, tík me na me wɔ, yaga belɔ hom ba sé ra nzem narâ nɔrɔ̂ yas vɔk na Dagwi e pomo mot, ko gwà hom a tɛ̀ na me wɔ. Dura a me nerat, na hwo tik me nára me yaang, na me wɔ̀ di belɔ hom.’ Pyɛ ma yane de ya tɛ̀, a sé vit e ngamo e kwɔ̂n rê pyɛ́ mō.”

³⁰Shom ya sogo a Saul tyɔng wɛt e ra Yɔnatan, a yang ɛ, “À hwo hwêy hwâ lolong! Di, ma tɔk, hwó raa bamâ hwêy Yisai. A sé pyɛ rekyen na hwo mwa na neng mō de a tɔ o warap!

³¹Mwâ jeng de hwêy Yisai ha sé ken, ko hwo na negwɔm mō na rɔda tumal wɛt. A remo, tɛ̀ be wɔ̀ vey na yɛ, gbing-gbing a ku!”

³²Ko Yɔnatan a toyo a da mɛ, a ye, “Yaga sɛ́ de bê mɔrɔ hɛ ɛ? E sɛ̂ pyɛ de a ga ra ɛ?”

³³Ko Saul a rene bara mɛ, na a toro hɛ mɛ, ko Yɔnatan a tɔk, da mɛ a ga tɛ̀ e yey mɛ, na a mɔrɔ Davit.

³⁴A sogo na shom, a ka re pyɛ́ mo wɛt — pyɛ̂ tûk pwɛl pwas hê ba mo. Yey mɛ ya lashe hɛ ding-ding, yaga sa mɛ Davit, ko yaga da mɛ a byɛs ɛ arɔng.

³⁵E nusu gasi, Yɔnatan a nusu vɔk e cwɛl, na a wɔ̀ man na Davit, sede remo de yɛn á yong ɛ̀, á sè tanga hwey wen hak wɔ̀ kyɔk ɛ.

³⁶A yâng wen o, “Tele wɔ e nuyel, na hwo wɔ̀ jut a me kwet gwane de mê ta.” Jeng de wen o a sé tele, ko a hwo ta kwet, gwa pere gyili hɛ.

³⁷Sede a wɔ̀ wul kwɔn de kwet o gwa wɔ̀ gaba ɛ̀, ko Yɔnatan a yila hɛ, a ye, “Hée è, kwet o gwa sé wɔ e nuyel mō!”

³⁸A to yila hɛ, a ye, “Ci ziri, hwo tumal wɛt!” Ano kwong wen o a wɔ̀ tula ket o, a vey mɛ̀ na dalɔ mo,

³⁹ko a ka tɔk pyɛ de ya sé tē wɛt, sɛ̌ Yɔnatan tanga Davit zɔng.

⁴⁰Yɔnatan a nɔ̂ng wen o pyɛ̂ como mɛ, ko a yang ɛ, “Jut, kyè mɛ vɔk e ji repomo.”

⁴¹Jeng de wen o a ga kyè, ko Davit a hwo nusu yi e kwɔ̂n lɛrɛ mɛ e rwa hwôl beta mo. A ye guduruk, a kyul Yɔnatan zang tat. E bama mo, yɛn a gunung bemɛn e ragey, ba vɛ̌ hwo tosho, Davit wɛ̀ a dal na tosho mo.

⁴²Ko Yɔnatan a yâng Davit, “Kyè tyang! Yaga wot beba wot a ga sira a bemot e ji rezâ Dagwi Darwey. Tik na yɛ a rɔda sè nuha e tē mot na hwo, na e tê yerê lɔ mo na ye lɔ hom gbak-gbak!”