Read berom 1 Samwɛl 21 Bible Online

1 Samwɛl 21 - berom bible

1 Samwɛl 21

¹Davit kwong a vo gwong, a kyè, ko Yɔnatan a toyo vɔk e ji repomo. Davit a kaba gwong vɔk e Nɔp, kwɔn de Ahimɛlɛk, piris a sangal ɛ. Ahimɛlɛk o a nusu na digis, a vey man na yɛ, a yang ɛ, “Ala de hwà sé nju mō ano, vit a mwat de a vey kyɔk o ɛ?”

²Davit a toyo a yɛ, a ye, “Gbɔng gwɔ̀m wɛ a tomo me vey ra fwom hwak, ko a yang me, me kwon ha a mwat hwak pyɛ cak e ra tomo de a tomo me, kɛ e ra fwom de a tɛ̀ me vey ra wɛt. Yaga ano, ma ga yong ɛ̀ na bewen behak, na wot wɔ̀ man e kwɔn het na het.

³Ko di, e sɛ́ de hwà vɔk e vwɔ mō a remo ɛ? Nɔng me bagat kpam-tuk batungun, kɛ kayɛ pyɛ de hwà vɔk zɔng.”

⁴Piris o a yang ɛ, “Ma vɔk kpam-tuk de bemat mwa be re wɛt, sɛ̌ womo de ba ga tik jaram yaga Dagwi, ko mwa ano, mê tɔk nɔng o wɛ̀, ka sede bewen o ba gyeng bato mɛn yi e beha.”

⁵Davit a toyo a yɛ, a ye, “Ey, bewen o be gyeng bato mɛn gyat kayɛ jeng de wot e kyè wɔ̀ gwɔrɔ como zɔng, ko tàga gwomo yerê gwo yunung arɛt?”

⁶Ano kwong, piris o a hwo nɔng ɛ kpam-tuk de ba tik jaram o, remo de vit a bwâng kpam-tuk o hwak, sɛ̌ wane de ba ga kana tik wɛ, ko ba ga jut wɛ yi e kwɔ̂n jɛrɛ, na be bin tik ɛ̀ pwep o tuk hane.

⁷Ko hwak e ji bemât nuyêl bemât fwôm Saul á sè e hwomo tuk hane, bá bang ɛ yaga negwɔn raà Dagwi Darwey, reza mɛ à Dɔwɛk; á sè WoƐdɔm, ko á sè mwât nuyêl bemât gyêng yas Saul.

⁸Ko Davit a yâng Ahimɛlɛk, “Hwà vɔk wal kɛ bara e ngamo wɛt bɛ? Ka hwà yâng nɔng me, yaga ma nusu sana vɔk wal hom kɛ pyɛ como cak, yaga tomô gbɔng gwɔ̀m o há sè ziri ding-ding.”

⁹Piris o a ye, “Wal Gɔliyat WoFilisti de hwá mɔrɔ e nɛk Ɛla wa sɛ́, ba hanas wɛ na rugu, ko wa sé e bamâ kerugû fwom. Ka sede hwó simo wɛ, ko hwo jut wɛ, yaga vit a hwak sɛ̌ wane mo zɔng.” Ko Davit a yang ɛ, “Nɔ́ng me wɛ; vit a hwak de wa to sé sede wane mo!”

¹⁰Ano, Davit a re nuyel na kwɛngɛl mɛ e tuk hane mo de a sé tele yi na Saul, ko a wɔ̀ wul e kwɔ̂n gwɔ̀m Akish wo repomô Gat.

¹¹Bemât badu gwɔ̀m o ba yang ɛ, “E Davit à womo, womo de a sé gbɔng gwɔ̀m vwêl Israyɛl wɛt a? E yɛ de beha ba ra lwɛlɛ na yɛ, ba rɛ̌, ba tē, ‘Saul a ga mɔbɔs bemât repugu mɛ gu, ko Davit a mɔbɔs bemɛ gu kuru!’ ”

¹²Há hane ha bɔrɔk Davit, ko a wok bengyip Akish, gwɔ̀m Gat, tyɔng wɛt.

¹³Yaga ano, a tē sede e tē how, ko jeng de be simo be kaba hɛ, a tē sede e lolong: a kyě wɔrɔ jɔt kpɛɛ e rwi repomo, a hala nu mɛ lɛ̀shɛk, ko betey be lusha hɛn vey e negyɛk mɛ lwàal.

¹⁴Akish a yâng bemât badu mɛ, “Di in mwat o, e lolong! Yaga sɛ́ de yin a vey a me mɛ̀ ɛ?

¹⁵Vit a me a bemât lolong e vwel hemo, de yin a vey na yɛ, na a vey ra a me pyɛ̂ lolong e ngamo arɛt? Me simo na a sangal e lɔ hom wɛt!”