Read berom 1 Samwɛl 22 Bible Online

1 Samwɛl 22 - berom bible

1 Samwɛl 22

¹Davit a tik hwomo, a kyè a wɔ̀ dal e fwara bagat na Adulam. Jeng de begwa mɛ tanga belɔ da mɛ ba wok ano, yɛn a wɔ̀ wuna hɛn na yɛ e hwomo.

²Mwa bemat de ba wok netâ sangal wɛt, kɛ vemo de be rangal hɛn badu, na vemo de vit a hɛn a yêy dyɛngɛ, ba wɔ̀ wuna hɛn na yɛ, ko a tɛ́ ɛ mwât nuyel mɛn. Bemat o bá sè sede naga benaas (400).

³Davit a yi e hwomo, a wɔ́ e Mizpa e vwêl Mowap, ko a yâng gwɔ̀m Mowap, “Ka hwo simo a me, na da hom tanga neng hom be sangal e ngamo tanga hwo, sɛ̌ ma tɔk pyɛ de Dagwi a rɔda ra na me.”

⁴Gwɔ̀m o a simo, ko Davit a tik ɛn e hwomo. Ba sangal tanga gwɔ̀m Mowap mwa jeng de Davit á sè sangal e kwɔ̂n dal.

⁵Ko Gat, zarap Dagwi, a yâng Davit, “Hwo sangal e kwɔ̂n dal wɛt. Sogo a remo, na hwo kyè vɔk e vwêl Yuda.” Davit kwong a sogo, a kyè, a wɔ̀ sangal e rehwôt Hɛrɛt.

⁶Tuhak, Saul á sè sangal e rahwôl Gibeya e tîn cɔgɔ̂t matang cak; a vɔk bare mɛ e vwɔ, ko bemât badu mɛ mwa ba tumal ba gwɔrɔ hɛ. Saul a wok, ba ga di kwɔn de Davit tanga bemat mɛ ba sɛ́ ɛ.

⁷Ko a yâng bemat mɛ, “Wok in, à BeBɛnyamin! Hwêy Yisai ha rɔda nɔ̂ng kawɛ e ji min cāp tanga bě anap arɛt? Kɛ hê tɛ̀ kawɛ e ji min a tɛ́ ɛ mwât nuyêl bemât comô gu gu na vê naga naga arɛt?

⁸Pyɛ ma yane de ya tɛ̀, yin a wuna nu min e ra me arɛt? Yaga vit a mwat de a ha a me wɔgɔ, hwêy tɔ́ hom ha ga wuna hɛ na sira tanga hwêy Yisai. Vit a hwak e ji min de a bare na me, kɛ a ha a me wɔgɔ, hwey hom ha ga tɔgɔs mwât fwom hom, na a wɛrɛm me, na a mɔrɔ, sede remo de a sé ra yunung.”

⁹Ko Dɔwɛk, WoƐdɔm, womo de á sè tumal e ji bemât badu Saul, a yang ɛ, “Ma di hwêy Yisai, ha wɔ́ na Ahimɛlɛk Ahitup e Nɔp.

¹⁰Ko Ahimɛlɛk a rangal a yɛ Dagwi Darwey pyɛ de ê ra, ko a to nɔng ɛ pyɛ̂ re e gwong, tanga wâl Gɔliyat WoFilisti.”

¹¹A vane ano, Saul a tomo be wɔ̀ yishi Ahimɛlɛk Ahitup, piris, tanga belɔ mɛ mwa, vemo de ba to sé bepiris e Nɔp. Mwa hɛn ba vey na yɛ.

¹²Saul a yang ɛ, “Wok, à hwo hwêy Ahitup”. Yɛ kwong a yang ɛ, “Ey, neken mō ne ros à darwey.”

¹³Saul a ye, “Yaga sɛ́ de hwo tanga hwêy Yisai, yin a wuna nu min e ra me ɛ? Yaga sɛ́ de hwà nɔng ɛ kpam-tuk na wal, ko hwà to rangal a yɛ Dagwi pyɛ de ê ra arɛt? Á womo, a ga doyo e ra me, a sé wɛrɛm me, na a mɔrɔ.”

¹⁴Ahimɛlɛk a toyo a yɛ, a ye, “Wa e ji bemât fwom mō de a sé mwât tsak o sede Davit ɛ! Yɛ de a sé sɔ mō, de a to sé gbɔng o wo bemât gyeng mō,[21] womo de be nɔngɔs hɛ nerey e ji lɔ mō.

¹⁵E yunung zɔng de ma hwo rangal a yɛ Dagwi a? Wey! Hwo kwon tɛ̀ a me kɛ belɔ hom renɛn wɛt, yaga me, sam mō, ma ka tɔk pyɛ cak e ra ha hemo ko tyɔng wɛt.”

¹⁶Ko gbɔng gwɔ̀m o a yang ɛ, “Gbing-gbing hwà rɔda ku, à Ahimɛlɛk, hwo tanga belɔ da mō mwa!”

¹⁷Ko a hwo yâng bemât gyeng mɛ de ba gwɔrɔ hɛ e tumal, “Rɔnɔ hin bepiris Darwey, na yin mɔbɔs hɛn, yaga yɛn a wuna hɛn na Davit. Yɛn a tɔk, a sé tele yi na me, ko yɛn a ha a me wɛt.” Ko yɛn a ka simo be ra bepiris Darwey na vwɔ mɛn wɛt.

¹⁸Ano kwong, gbɔng gwɔ̀m a doyo, a yâng Dɔwɛk, WoƐdɔm, “À hwo, ci wɔ hwo e ra bepiris o.” Ko Dɔwɛk a doyo, a hwo e ra yɛn, a mɔbɔs hɛn. Tuk hane a mɔbɔs bemat kuru rwit na vɛ betungun (85), mwa hɛn de ba wul na be tɛ̀sɛ berugû fwôm bepiris, yerê vemo de ba pɛngɛ pes.

¹⁹Ko Saul a tɛ̀ be wey na bwâng bemât repomô bepiris arɔng. Ba mɔbɔs beras na beha, nèy mwa na nèy-vɔ, ba to wey na berɔndɔng, na vyēl, tanga bemadung mwa kyuruk.

²⁰Ko Abiyatar, hwêy Ahimɛlɛk Ahitup, a hywit ɛ, a wɔ̀ sɛ̀ Davit.

²¹A ha a yɛ wɔgɔ, Saul a ga mɔbɔs bepiris Darwey.

²²Ko Davit a yang ɛ, “Tuk hane, jeng de ma di Dɔwɛk WoƐdɔm e hwomo, ma tɔk, vit a tô yey a rɔda wɔ̀ ha a Saul. Renɛ̂n mɔbɔs belɔ̂ da mō mwa ra sé e ra me.[22]

²³Sangal e ngamo na me, hwo kwon wok bengyip wɛt. Mwat de a sé jāma neken mō, a sé jāma nenang arɔng. Vit a pyɛ de yê té na hwo e vwɔ hom.”