Read berom 1 Samwɛl 23 Bible Online

1 Samwɛl 23 - berom bible

1 Samwɛl 23

¹Ba vey ha a Davit wɔgɔ, BeFilisti ba sé tó como na bemât Keyila, ba hashe pyɛ́ mɛn e begàzu.

²Ko Davit a rangâl Dagwi Darwey, a ye, “Me wɔ̂ to como na BeFilisti mo a?” Dagwi Darwey a yang ɛ, “Ci, wɔ̀ tó como na yɛn, na hwo sey BeKeyila mo.”

³Ko bemât Davit ba yang ɛ, “Káa! Wot e ka wokos bengyip pep e ngamo e Yuda, ko tàga wot to wɔ̀ man tô como na BeFilisti e Keyila, ko gwo de sè a wot e rɛ̌ kwong ɛ?”

⁴Yaga ano, Davit a to rangâl Dagwi Darwey, ko Dagwi o a to yang ɛ, “Gyirik ziri vɔk e Keyila, yaga ma rɔda nɔng in wɛng e ra BeFilisti mo.”

⁵Ano kwong, Davit tanga bemat mɛ ba kyè wɔ e Keyila, ba wɔ̀ to como na BeFilisti. Ba re ɛn, ba wey na yɛn zá wɛt, ko ba hashe berɔndɔng mɛn. Yi ano, Davit a sey bemât Keyila mo yi e vwɔ̂ BeFilisti.

⁶Jeng de Abiyatar Ahimɛlɛk, à tele wɔ na Davit e Keyila, a vɔk ɛ̀ radîng pyɛ̂ fwôm rangsâl Dagwi.

⁷Ba hwo ha a Saul wɔgɔ, Davit a ga vɛ hɛ e Keyila, ko a hwo bare, a ye, “Ey yaa! Dagwi a ga vey tɛ̀ a me hɛ e vwɔ hom! A ga vey gaba e segun na tó mɛ e ji repomo de ba gwɔrɔ rɛ na jwâ-pomo de be bangas ri mo na bewɔ́rɔ dyam.”

⁸Saul a yishi bemât como mɛ mwa, na be nusu wɔ̀ to como e Keyila, na be wɔ̀ rɔnɔ, be tɛ̀ Davit na bemat mɛ e tē.

⁹Jeng de Davit a wok, Saul a sé yong gwong de ê wɔ̀ mɔrɔ hɛ, a hwo ha a Abiyatar, piris, a vey na radîng pyɛ̂ fwôm rangsâl Dagwi.

¹⁰Ko Davit a hwo rangâl Dagwi, a ye, “À Dagwi Darwey, Dagwî Israyɛl, ma ga wok, Saul a sé yong ɛ, na a vey e Keyila, na a ba wey na repomo mo yaga me, sam mō.

¹¹Bemât Keyila ba rɔda nára me e ji vwɔ̂ Saul arɛt? Saul o a rɔda gyirik vey, sede remo de ma wok a? À Dagwi Darwey, Dagwî Israyɛl, gabɔk wɛt, ha a me!” Ko Dagwi Darwey a ye, “Ey, a rɔda vey.”

¹²Davit o a to gwɛ̌ rangal, a ye, “Sɛ̌ bemât Keyila mo bê nára me tanga bemat hom e vwɔ̂ Saul arɛt?” Ko Dagwi Darwey a toyo a yɛ, a ye, “Ey, ba rɔda ra ano.”

¹³Yaga ano, Davit a vɛ̌ sogo tanga bemat mɛ sede naga betyiimin (600), ba kyè yi e Keyila dey-dey, ko ba kyě gǎ e bebak vane mo. Jeng de Saul a wok, Davit a ga hywit ɛ yi e Keyila, ko a vɛ̌ to ɛ kwong.

¹⁴Davit kwong a sangal e nekwɔn dál e tê hey, e bak berahwol bagat na repomô Zif. Saul a dopse jāma hɛ kayɛ jeng, ko Dagwi a nára Davit o e vwɔ mɛ wɛt.

¹⁵E jeng cak Davit a kana sè sangal e Hɔrɛsh e hey bagat na Zif, ko a hwo wok, Saul a ga nusu, e kyě jāma hɛ, na a wey mɛ.

¹⁶Yɔnatan, hwêy Saul, a wɔ́ na Davit e Hɔrɛsh o, ko a ha a yɛ ha de hê gwɛ̌ a yɛ yey ting wɔgɔ, Dagwi ê sɛlɛ hɛ.

¹⁷A yang ɛ, “Hwo tɛ̀ bengyip wɛt! Da hom a rɔda sɛ̀ o, na a tɛ̀ vwɔ mɛ e ra hwo wɛt. Hwà rɔda tɛ́ o gbɔng gwɔ̀m BeIsrayɛl, ko me ma rɔda tɛ́ me mwât sɛlɛ mō. Da hom pyɛ mɛ mwa a tɔk ano.”

¹⁸Yɛn beba ba to wuna hɛn na sira na bemɛn e nuyêl Dagwi Darwey. E bama mo, Yɔnatan kwong a to ɛ vɔk e lɔ, ko Davit a re nuyel na sangal e Hɔrɛsh.

¹⁹Bemât Zif behak ba wɔ́ na Saul e Gibeya, ba ha a yɛ, ba ye, “Davit à wane e lɛrɛ e nekwɔn dál e vwel mot, e Hɔrɛsh, e rahwôl Hakila de wa sé e rwa batin na hêy Yuda.

²⁰Yaga ano, à gbɔng gwɔ̀m, vey na wot kayɛ jeng de hwó simo, ko wot ê ra gwong de wot ê nára a hwo hɛ e vwɔ mō.”

²¹Saul a toyo a yɛn, a ye, “Tik na Dagwi Darwey a tɛ̀ nerat mɛ e ra yin, remo de yin a di nemwishish hom!

²²Kyè in, na yin wɔ̀ gwɛ̌ tɔk kwɔn o. Tɔk in kwɔn de a sangal ɛ tɛk, na mwat de a di ɛ e kwɔn o, yaga ba ha a me, a vɔk netsitsɛng neves tyɔng wɛt.

²³Wɔ̀ ngyɛgɛt hin, na yin tɔk nekwɔn de e lɛsɛ hɛ ɛ, ko sede yin a ga tɔk nɛ tɛk, ko yin toyô ba ha a me. Ma rɔda kyè tanga yin, ka sede a sé e bak vwel wane mo, ko ma rɔda jāma hɛ e ji mwâ câng Yuda.”

²⁴Yɛn a sogo, ba vo gwong ziri vɔk e Zif, ba tānga kyè e nuyêl Saul. Davit kwong tanga bemat mɛ ba sé e ji hêy Mawon e kwɔ̂n gbingiring hak e bak batin na hêy Yuda.

²⁵Jeng de Saul tanga bemat mɛ ba sogo, ba sé jāma hɛn, ko ba ha a Davit ha mo. A gwɛ̌ kyè, a wɔ̀ sangal e kwɔ̂n dál e raku, e hêy Mawon. Sede Saul a wok ano, a kyè vɔk e ji hêy Mawon o e de jamâ Davit o.

²⁶Saul tanga bemat mɛ bá sè kwey e bak raku mo womo, ko Davit na bemɛ à bemat bá sè kwey e bak o woro arɔng. Davit á sè tē ngyɛ́k na a hywit ɛ yi na Saul, ko e jeng o Saul na bemat mɛ ba tē ngyɛ́k na be gwɔrɔ a BeDavit nu, na yɛn a vo ɛn.

²⁷E ji jeng yane, tom hwak a hwo vey, a yâng Saul, “Vey ziri! BeFilisti ba ga vêy jugu e vwel o!”

²⁸Saul kwong a hala rô Davit, ko a kyè wɔ̀ man como na BeFilisti. Yaga ano de ba vo a kwɔn hane rezâ Raku Gas Ɛn.

²⁹Davit kwong a kyè yi e hwomo, a wɔ̀ sangal e nekwɔn dál ne Ɛn-Gɛdi.