Read berom 1 Samwɛl 24 Bible Online

1 Samwɛl 24 - berom bible

1 Samwɛl 24

¹Bama de Saul a toyo yi e de rô BeFilisti, ba ha a yɛ, Davit à wane e berakû Ɛn-Gɛdi.

²Saul a kasa bemât como gu batat (3,000) yi e sevwêl Israyɛl mwa, ko a sogo mɛ wɔ̀ jāma Davit na bemat mɛ e bak beraku de vyēl shi yê hey ya sé ɛ.

³A hwo wul e kwɔ̂n kara tyīmit bagat na gwong. Kwɔn hane ha vɔk gbɔng fwara, ko a hwo yel, na a nú-jey, ko Davit na bemat mɛ, yɛn a sé sangal e hwomo e ji fwara mo, e ma here.

⁴Bemat mɛ ba ha na yɛ show-show, “Di, jeng a yemo de Dagwi Darwey a ga kana ha a hwo, ê nɔng o mwât repugu mō e ji vwɔ mō, ko hwô tɔk ra pyɛ de hwà di ya jam a hwo na yɛ.” Davit a hwo sogo, a kyè yaang yaang, a wɔ̀ yɛrɛ cɛ̂k tîn rugû Saul.

⁵E bama mo, yêy Davit ya gang ɛ na shɔt, yaga pyɛ de a ga ra.

⁶A yâng bemat mɛ, “Dagwi Darwey a ro mɛ, na me tɛ̀ vwɔ hom e ra darwey hom, de a kasa hɛ, na a sè gbɔng gwɔ̀m!”

⁷Na há hane Davit a dul mɛ̀ bemat mɛ, a tɔk simo a yɛn, na be hwo e ra Saul wɛt. Saul a sogo, a nusu yi e fwara mo, a kaba gwong, a kyè pyɛ mɛ.

⁸Davit arɔng a sogo, a nusu, ko a moklo Saul, a ye, “À darwey, gbɔng gwɔ̀m!” Saul a doyo, a di bama mɛ. Davit a ye guduruk na bayis mɛ e vwel, na a nɔng ɛ nerey.

⁹A yang ɛ, “À dagwɔ, e sɛ́ de ya tɛ̀, hwo wéres betong na neha bemat de be tang o, Davit e jāma na a wey na hwo arɛt?

¹⁰Yunung hwà tɔk di, Dagwi Darwey a ga nɔng me hwo e vwɔ hom e ji fwara. Bemat behak ba yang me, me mɔrɔ hwo, ko ma wok nemwishish mō, ma ye, ma rɔda tɛ̀ vwɔ, na me mɔrɔ darwey hom, de Dagwi Darwey a kasa hɛ wɛt.

¹¹Di, à da, di cɛ̌k rugu mō à yet e vwɔ hom! Ka ma yâng mɔrɔ hwo, ko mwa ano, ma de yɛrɛ cɛ̌k rugu mo zɔng! Tik na hwo tɔk, me simo me ra a hwo nengyas, na me to kyɛ́ me nà raa hwo wɛt. Hwó ra jàma hom, na hwo mɔrɔ me, mwa ano de ma ra a hwo renɛn ko tyɔng wɛt.

¹²Tik na Dagwi Darwey a sè mwât shɔt e tē hom na hwo, ko tik na yɛ a tala a me pyɔ̌n e ra hwo. Ko di, me ma rɔda ra vwɔ hom e ra hwo wɛt.

¹³Sede remo de bemât raane ba ye na cinat ha, ‘Nengyas ne yi na bemât nengyas.’ Ko me ma rɔda ra vwɔ hom e ra hwo wɛt.

¹⁴À gbɔng gwɔ̀m BeIsrayɛl, hwà nusu e ra wa arɛt? Hwó rɔ́ wa arɛt? Hwó raa revîn vu kɛ kengyanâ vu arɛt?

¹⁵Tik na Dagwi Darwey a sè mwât shɔt, na a gas há e tē hom na hwo. Tik na a wok ha hom, na a sey hɛ, na a to sey me yi e vwɔ mō.”

¹⁶E bama de Davit a ga yɛnɛ ha a Saul neha nemo, ko Saul a rangal, a ye, “E fwɔ mō a gwane, à hwey hom Davit arɛt?” Ko a hwo tosho na gap.

¹⁷A yâng Davit, “Hwà dal me na nerat, hwà ga ra a me pyɛ́ ryat, ko me ma ga ra a hwo pyɛ́ vyes.

¹⁸Ko hwà ga to gwɛ̌ dura a me pyɛ ryat yunung, yaga Dagwi Darwey a ga nɔng o me e vwɔ mō, ko di, hwà ka mɔrɔ me wɛt.

¹⁹Ka sede mwat a sɛ̀ mwât repugu mɛ, ko a rɔda tik ɛ kwen arɛt? Tyɔng tyɔng wɛt! Ko tik na Dagwi Darwey a tala hwo na pyɛ ryat de hwà ga ra a me yunung.

²⁰Di, ma tɔk, hwà rɔda tɛ́ o gbɔng gwɔ̀m BeIsrayɛl, segwɔm o sa rɔda tumal e ji vwɔ mō.

²¹Tik na hwo sira a me na Dagwi Darwey, hwà rɔda wey na cáng hom wɛt, ko hwà rɔda to yishing reza hom yi e lɔ da hom arɔng wɛt.”

²²Ko Davit a sira a yɛ. Saul kwong a to ɛ vɔk e lɔ, ko Davit tanga bemat mɛ yɛn a tút vɔk e kwɔ̂n dál.