Read berom 1 Samwɛl 25 Bible Online

1 Samwɛl 25 - berom bible

1 Samwɛl 25

¹A vane ano, Samwɛl a ku, ko BeIsrayɛl mwa ba tula hɛn, na be tosho sesin mɛ, ko ba lɛrɛ hɛ e lɔ mɛ e Rama. Davit kwong a sogo, a gyirik a kyè yikyik vɔk e rwa batin e ji hêy Paran.

²Darwey hwak á sè e repomô Mawon, reza mɛ a Nabal, wɔgɔ, Tɔ́n[23] wo lɔ Kalɛp. Cap mɛ ya sè e Karmɛl bagat na Mawon; a vɔk tyīmit gu batat (3,000) na vyēl shi gu rining (1,000). Rezâ hwā mɛ a Abigɛl. Hwā mo a vɔk netsitsɛ̂ng bare ciwil, a to sè rwat e bayis tyɔng wɛt, ko sa mo á sè gbàrak, a to se mwât shom. E jeng yane, Tɔ́n a se hwon tôt tyīmit mɛ mo e Karmɛl.

⁴Davit a sè e ji hey hane, ko a wok, Tɔ́n a sé hwon tôt tyīmit mɛ.

⁵A hwo tomo bewen kuru wɔ na yɛ, a yang ɛn, “Tút in wɔ e Karmɛl, na yin wɔ̀ kyul a me Tɔ́n.

⁶Yê show de yin ê ye, a het ngan: Tik na Dagwi a tɛ̀ netyang e ra hwo na belɔ mō vɔk e shey de he kyè vey, na a tɛ̀ yas mō ye mara!

⁷Ma wok, hwà sé hwon tôt tyīmit mō. Ma simo me bare a hwo, bemât gyêng tyīmit mō ba kana sè e ngamo tanga wot, ko wot a ra a yɛn pyɛ cak wɛt, vit a pyɛ mɛn cak de ya ka vuru hɛ mwa jeng de yɛn á sè e Karmɛl.

⁸Rangal hɛn, ko yɛn ê tɔk ha a hwo. Gabɔk, sey bewen de ma tomo hwo na yey rining, sede remo de jeng yemo ya sé ye nzem. Nɔt ɛn tanga me, hwey mō Davit, pyɛ de hwà di ya jam.”

⁹Jeng de bewên Davit ba wɔ̀ wul, ba ha a Tɔ́n neyɛnɛ̂ pyɛ̂ mwa de Davit a ha, ko ba sangal be gyeng.

¹⁰Tɔ́n a toyo a yɛn na ha, a ye, “E wa de be tang ɛ a Davit ɛ? E wa à hwêy Yisai arɛt? Ma tɔk ɛ wɛt. Besam ba sé kpɛɛ a remo de ba tele yi na bedanelɔ mɛn!

¹¹Mê hwo jut kpam-tuk na nshî sɔ hom, tanga banamâ vyēl de ma yɛt a bemât hwôn tyīmit hom, na me nɔ̂ng bemat de ma tɔk kwɔn de ba yi ɛ wɛt a?”

¹²Bemât Davit o ba toyo, ba wɔ̀ ha a yɛ kayɛ pyɛ de Tɔ́n a ha.

¹³Davit a hwo yang ɛn, “Gana hin bewal min!” Kawɛ mwat a gana wal mɛ, Davit kwong a gana mwɛ, ko a kyè tanga bemat mɛ sede naga benaas (400), bwâng bemat naga beba (200) ba sangal e de gyêng pyɛ́.

¹⁴Hwak e ji bemât Tɔ́n a ha a Abigɛl, hwā mɛ, “Hwà wok a? Davit a ga tomo betom mɛ yi e tê hey, na be vey kyul dalɔ mot, ko yɛ a dusa hɛn.

¹⁵Ko di, bemat o bá dura a wot nerat tyɔng wɛt! Yɛn a ra a wot pyɛ cak wɛt, pyɛ mot cak ya ka vuru hɛ wɛt mwa jeng de wot á sè e hey tanga yɛn.

¹⁶Yɛn a tɛ́ ɛn a wot sede ruga de wa dul ot naturuk tanga nagwi, mwa jeng de wot á sè gyeng tyīmit mot e hey.

¹⁷Yaga ano, bare na hwo bin di pyɛ de hwà rɔda ra, yaga wot e bɛrɛng, sede ba rɔda ra a dalɔ mot tanga belɔ mɛ mwa nengyas. Yɛ a sé yerê mwat vwes hwak tyɔng wɛt, vit a mwat de e tɔk ha a yɛ, na a wok.”

¹⁸Remo-remo, Abigɛl a hwo ra ziri, a tula bagat kpam-tuk naga beba (200), na nshî anap e beburâ vyēl beba, na banamâ tyīmit tyungun de ba ga yong, na alkama de ba halang e gwopey, na nèy anap gushuk de ba shumung naga (100), tanga nèy regwi de ba shumung, ko ba mát nɛ bagat o naga baba (200). A tɛ̀ pyɛ́ mo mwa e ra bemadung,

¹⁹ko a yâng bewen lɔ mɛ, “Ci in mɛ e nuyel hom, me à wane mê raa hin vey.” Ko a ka ha a rwas mɛ wɛt.

²⁰A sé kyè e ra madung mɛ wɔ̀ gyirik, a wɔ̀ wul mâ raku, ko ras de a di Davit tanga bemat mɛ ba sé gyirik, ba vɛ̀ be man.

²¹Davit a ga kana ye, “Ko sɛ̌ a sé fwôm zɔng de ma ra, de ma gyeng a sa womo yas mɛ e ji hey! Vit a pyɛ de ya ka vuru hɛ e ji yɛ. Ko di, a sé tala me na pyɛ́ vyes e ra pyɛ́ ryat de ma ra a yɛ.

²²Tik na Dagwi a wey na me,[24] ka sede ma tik rwas gwining e ji bemat mɛ na neken gyam gasi he ye gbey!”

²³Jeng de Abigɛl a di Davit, remo-remo a hwo gyirik yi e ra madung mɛ, a gaba guduruk e vwel,

²⁴a gaba e cât bol mɛ, a ye, “À da, tɛ̀ nɛn hane mo e ra me zɔng! Gabɔk wɛt, à darwey, simo a me na me hanat, me ra won, na hwo simo, na hwo wok reha hom.

²⁵À da, hwo kwon tɛ̀ tong na hâ Tɔ́n gwarap wane wɛt. Yɛ a sé tyɛng na za mɛ, ko e rá pyɛ̂ netɔn arɔng. Di, ma kana di bewen de hwà tomo mo wɛt, yaga ma kana sè e kwɔn o wɛt.

²⁶A remo, à da, e Dagwi Darwey de a ga ró o nà mɔrɔ mwat, na talâ pyɔ̌n na vwɔ mō pyɛ mō. Ma sira a hwo, sede remo de Dagwi Darwey a sé wo neken, ko sede remo de hwà sé kwen arɔng, tik na bemât repugu mō tanga mwa vemo de be jāma be ra a hwo nengyas, be tɛ́ ɛn sede Tɔ́n wane.

²⁷Gabɔk, à da, sey nɔrɔ hemo de ma vey nɔng o, na hwo nɔ̂ng bewen de ba sé na hwo.

²⁸Gabɔk, hàla a me de ma tɛ̀ yey ting, ma dul o. Dagwi Darwey a rɔda tɛ̀ o, hwo sè gwɔ̀m, ko negwɔm o na rɔda nàra e lɔ mō gbak-gbak, yaga hwó to como yaga yɛ. Ba rɔda sɛ̀ pyɛ vyes cak e ji mo ko tyɔng wɛt mwa jeng de hwà rɔngɔl kwen.

²⁹À darwey, ka sede mwat hwak a simo, a wey na hwo, ko Dagwi Darwey a rɔda dul neken mō sede remo de mwat a sé gyep pyɛ ryat mɛ. Ko a rɔda werek bemât repugu mō, sede ba werek gwofwa yi e ji negazik.

³⁰Jeng de Dagwi Darwey a ga yɛnɛ ra a hwo mwa pyɛ́ ryat de a ga kana sira a hwo, na a to tɛ̀ o, hwo se gwɔ̀m Israyɛl,

³¹hwà rɔda ba tɔk ye tɔgɔ, yaga hwà mɔrɔ mwat sana tin o, kɛ hwà tala pyɔ̌n e ra pyɛ de mwat a ra a hwo wɛt. Jeng de Dagwi Darwey a ga dura a hwo nerat mɛ, gabɔk à da, hwo kwon ye bam a me wɛt.”

³²Davit a yâng Abigɛl, “Óoo, ma feng a Dagwi Darwey, Dagwî BeIsrayɛl, de a tomo hwo, na hwo vey man na me yunung!

³³Dagwi a tɛ̀ nerat e ra hwo yaga netsitsɛng de hwà vɔk, de hwà dul me nà ra nɛ̂n mɔrɔ̂ mwat, na me to tala pyɔ̌n na vwɔ hom yunung.

³⁴Mwin, me sira me na Dagwi Darwey, Dagwî BeIsrayɛl, de a dul me nà wey na hwo yunung, ka sede hwà kana ra ziri vey man na me wɛt, ma yâng ka tɛt a Tɔ́n ɛ wen gwining, na a wul gasi wɛt!”

³⁵Ko a hwo sey pyɛ́ yane de a vey nɔng ɛ, ko a yang ɛ, “Kyè tyang vɔk e lɔ mō. Di, ma ga wok won mō, ma to sey ha mō.”

³⁶Jeng de Abigɛl a toyo vɔk e lɔ, a pom, a sɛ̀ Tɔ́n a sé ra nzem rê pyɛ́ yere ne begwɔ̀m, a sé wok yey pyɛng, a sé feng tyɔng wɛt. Yaga ano, Abigɛl a ha a yɛ pyɛ cak wɛt sɛ̌ gasi ha ye gbey.

³⁷Nusu hwol o, jeng de siring wa ga hàla hɛ, hwā mɛ a hwo ha a yɛ pyɛ̂ mwa de ya té, ko yey mɛ ya vɛ̌ tùt ɛ, a pere wɔ̀ tɛ́ ɛ gbɛrɛk sede revin.

³⁸Bamâ sede nepɔlɔ kuru, Dagwi Darwey a vɛ̌ rusu hɛ, a pere wɔ̀ ku.

³⁹Jeng de Davit a wok, Tɔ́n a ga ku, ko a ye, “Áaa à gwi, ma feng! Dagwi Darwey a ga tala a me pyɔ̌n, yaga Tɔ́n womo a bomo a me ha, ko Dagwi a ga dul me, mwât fwom mɛ, yi e neves, a ga tɛ̀, nengyas Tɔ́n na ga toyo e ra to mɛ.” E bama mo, Davit a tomo, be wɔ́ a yɛ pyâp Abigɛl, na a tɛ́ ɛ hwā mɛ.

⁴⁰Jeng de betom o ba wɔ sɛ̀ Abigɛl e Karmɛl, ba ha a yɛ, Davit a tomo hɛn na yɛ, na be wɔ̀ jut ɛ, na a tɛ́ ɛ hwā mɛ.

⁴¹Remo-remo, a ye guduruk e vwel, ko a ye, “Me à womo, mê se sam mɛ, mê yóng me, na me kus bol bemât fwom mɛ.”

⁴²Ano, a hwo yóng ɛ ziri, a tút e ra madung, ko a vɔk ɛ behwông fwom mɛ betungun. A hwo raa betom Davit, a vɛ̌ wɔ̀ tɛ́ ɛ hwā mɛ.

⁴³Davit o a ga kana to jut Abinowam wo Yɛzrɛɛl; mwa hɛn ba tɛ́ ɛn beha mɛ.

⁴⁴Saul kwong a ga kana jut hwóng mɛ Mikal, hwâ Davit wo mɛsɛng, ko a nɔ̂ng Palti, hwêy Layish, de a sé yi e Galim.