Read berom 1 Samwɛl 26 Bible Online

1 Samwɛl 26 - berom bible

1 Samwɛl 26

¹A vane ano, bemât Zif behak ba wɔ́ na Saul e Gibeya, ba ha a yɛ, ba ye, “Davit à wane e lɛrɛ e rahwôl Hakila, wane de wa sé e rwa batin na hêy Yuda.”

²Saul a hwo sogo ziri tanga bemât como mɛ gu batat (3,000) de a kasa yi e Israyɛl mwa, vɔk e hêy Zif, na be wɔ̀ jāma Davit.

³A wɔ̀ tɛ̀ buk mɛ e gwông rahwôl Hakila. Davit kwong á sè na sangal e hey. Jeng de a wok, Saul a ga raa hɛ vɔk e hwomo,

⁴a tomo bemât wɛrɛm, ko ba ha a yɛ wɔgɔ, mwin, Saul a ga wɔ̀ wul e hwomo.

⁵Remo-remo, a sogo vɔk e kwɔn de Saul a tɛ̀ ɛ bûk como mɛ, ko a di kwɔn de Saul tanga Abnɛr Nɛr, mwât nuyêl bemât como mɛ, ba dyɛng, ba wɔ́ ɛ nevwa. Saul a wɔ́ nevwa e tê bemât como mɛ, yɛn a rɔnɔ hɛ.

⁶Davit a hwo rangâl Ahimɛlɛk WoHiti tanga Abishai, gwà Yowap de neng mɛn a Zɛruya, a ye, “Wa e ji min a rɔda wɔ̀ kyɔk me vɔk e ji bûk comô Saul ɛ?” Abishai a ye, “Ma rɔda wɔ tanga hwo.”

⁷Ano kwong, jeng de nabwalak na vey, Davit tanga Abishai ba hwo sogo wɔ e ji bûk comô Saul. Ba wɔ̀ sɛ̀ Saul e de nevwa e tê buk o, a tòro bara mɛ e vwel bagat na rato mɛ. Abnɛr tanga bwâng bemât como ba dyɛngɛs, ba gwɔrɔ hɛ.

⁸Abishai a yâng Davit, “Dagwi a ga nɔng o mwât repugu mō e ji vwɔ mō yunung. Tik na me luga hɛ na bare mɛ, na me man na vwel; ma rɔda toro hɛ ba wɛt.”

⁹Davit a yang ɛ, “Hwo mɔrɔ hɛ wɛt. Wà a rɔda tɛ̀ vwɔ mɛ e ra womo de Dagwi Darwey a ga kasa, ko a sè hal nà renɛn ɛ?”

¹⁰Tsak o mwin, e Dagwi Darwey pyɛ mɛ de a rɔda rusu hɛ a mɔrɔ, kɛ jeng reku mɛ yê vey kɛ bê mɔrɔ hɛ e de como ayi.

¹¹Dagwi Darwey a ro mɛ, na me tɛ̀ vwɔ hom e ra womo de Dagwi a kasa! Jut bara tanga gacɔ̂ng nshî sɔ zɔng, na wot kyè mɛ.

¹²Ano Davit a jut bara tanga gacɔ̂ng nshî sɔ de ya sé bagat na rato mɛ, yɛn a vɛ̌ kyè nedem mɛn. Vit a mwat de a sene, na a di kɛ a wok, mwa hɛn ba nàra e ji nevwa sede ba kushu, yaga Dagwi Darwey a tɛ̀ nevwa na vo ɛn.

¹³Davit kwong a kyè wɔ e gura hwak, a wɔ̀ tumal e rahwol de wa sé yikyik tyɔng yi e hwomo, tyɛl ya kyé ya sé gbey tyɔng e tē mɛn.

¹⁴Davit a hwo yila bemât como tanga Abnɛr Nɛr na gbɔng fwɔ, a ye, “À Abnɛr! Hwà rɔda simo a me wɛt a?” Abnɛr a toyo a yɛ, a ye, “Hwà sé wa de hwo gbɔ ano, na hwo shina gwɔ̀m ɛ?”

¹⁵Davit a yang ɛ, “Hwà sé suga wɛt arɛt? Wà de a to sé sede hwo e ji Israyɛl ɛ? Yaga sɛ́ de hwà gyeng nekên darwey mō gbɔng gwɔ̀m wɛt ɛ? Mwat hwak á vey, na a ba wey a hwo na darwey mō gbɔng gwɔ̀m.

¹⁶Pyɛ de hwà ra ya sé naka ko tyɔng wɛt! Ma sira a hwo na Dagwi Darwey, hwà jam ka be mɔrɔ hwo, yaga hwà gyeng nekên darwey mō womo de Dagwi Darwey a kasa wɛt. Di, bara tanga gacɔ̂ng nshi de gbɔng gwɔ̀m a tik bagat na rato mɛ, ya sé e gwa a?”

¹⁷Saul a pere wɔ̀ tɔk fwɔ̂ Davit, a rangal, a ye, “E fwɔ mō a gwane, a hwey hom Davit a?” Davit a toyo a yɛ, a ye, “Ey, e nwáng, à darwey hom.”

¹⁸A to ye, “Yaga sɛ́ de hwo, darwey hom hwà se raa me, sam mō ɛ? E yɛ̌ pyɛ vyes kɛ rirɛ̌ renɛn de ma ra arɛt?

¹⁹À darwey, tik na hwo wok ha hom. Ka sede e Dagwi Darwey de a tɛ̀ o, na hwo vɔk repugu na me, ko tik na wot gang-nshi na yɛ, na wot nára a yɛ nɔrɔ̂ yas de be yɛt. Ko ka sede e bemat à vɛ, tik na Dagwi Darwey a kyini hɛn. Yɛn a ga ro me yi e vwêl Dagwi Darwey vɔk e vwel duk, kwɔn de he tɛ̀, me re a bedagwi beduk fongol!

²⁰Hwo kwon tik, be mɔrɔ me e vwêl bemat beduk yikyik yi na Dagwi Darwey wɛt. Yaga sɛ́ de hwo, gbɔng gwɔ̀m Israyɛl, hwà nusu, na hwo kyě jāma me, kengyanâ vu kining, sede mwat de e ra jāmâ rip e berahwol ɛ?”

²¹Ko Saul a hwo ye, “Ma ga buru. Toyo, à hwey hom Davit! Mê to ra a hwo pyɛ cak de yê wey na hwo wɛt, yaga yunung hwà tɛ̀ neken hom na sé pyɛ simo tyɔng wɛt. Ey, ma ga ra fwôm netɔn! Ma ga buru ding-ding.”

²²Davit a toyo a yɛ, a yang ɛ, “À darwey hom, bāra mō a wot. Tomo wen hwak, a vey sey wɛ.

²³Ko bàre, Dagwi Darwey a rɔda tala kawɛ mwat tyɛng na negwɔn mɛ de na sé cik tanga nemo de ne bana hɛ arɔng. A ga nɔng me hwo e ji vwɔ hom yunung, ko ma ka tɛ̀ vwɔ hom e ra hwo womo de Dagwi Darwey a ga kasa wɛt.

²⁴Di, sede remo de ma tik o kwen yunung, yaga neken mō na sé pyɛ simo e nuyel hom, ano arɔng, tik na neken hom ne se pyɛ simo e nuyêl Dagwi Darwey, na a pat me yi e ji karɛ reyɔm!”

²⁵Saul kwong a yâng Davit, “Tik na Dagwi a tɛ̀ nerat e ra hwo, à hwey hom Davit! E ji kayɛ pyɛ de hwà rɔda ra, hwà rɔda di wɛng!” Davit kwong a kyè kwɛngɛl mɛ, ko Saul arɔng a toyo hɛ vɔk e lɔ mɛ.