Read berom 1 Samwɛl 27 Bible Online

1 Samwɛl 27 - berom bible

1 Samwɛl 27

¹Davit a hwo bare e yey mɛ, a ye, “Tuhak, ma rɔda ba wey e vwɔ̂ Saul. Pyɛ de ya dal, na me ra, ma rɔda tele, me wɔ̀ dal e vwêl BeFilisti. Sede Saul a di me wɛt, ko a rɔda ye bam, a tik jama hom e vwêl Israyɛl, ko ma rɔda hywit me yi e vwɔ mɛ.”

²Ano kwong, yɛ tanga bemât raa mɛ naga betyiimin (600) ba kyè, ba wɔ̀ wuna hɛn na Akish, hwêy Mawɔk, gwɔ̀m repomô Gat.

³Yɛ na bemat mɛ ba sangal e hwomo e Gat, kawɛ e ji mɛn a sangal tanga belɔ mɛ, Davit arɔng tanga beha mɛ vane beba, Abinowam wo Yɛzrɛɛl tanga Abigɛl, hwâ kwɔ̌ Tɔ́n yi e Karmɛl.

⁴Jeng de ba ha a Saul wɔgɔ, Davit a ga tele vɔk e Gat, a to re nuyel na raa mɛ wɛt.

⁵Tuhak, Davit a yâng Akish, “Ka sede a jam a hwo na me, ko tik na hwo nɔng me kwɔn e kerepomo kehak e jey, na me sangal ɛ. Yaga sɛ́ de me, mwât fwom mō, ma rɔda sangal tanga hwo, gwɔ̀m, e ji gbɔng repomo mō ɛ?”

⁶Tuk hane mo, Akish a hwo nɔng ɛ repomô Ziklak na a sangal ɛ. Yaga ano de repomô Ziklak ra tɛ́ ɛ rê begbɔng begwɔ̀m Yuda vey e yunung.

⁷Davit a sangal e yɛnɛ̂ sevwêl BeFilisti shey hining na pɛl naas.

⁸E jeng yane mo, Davit tanga bemat mɛ, be sangal be nunus wɔ̀ jugû BeGeshur, na BeGirzi tanga BeAmalɛk, bemât vwarâ yerê Yuda, vemo de ba sangal e bebak vane yi e Tɛlɛm[25] vɔk e hêy gbingiring hê Shur pere wɔ̀ wul mɛ vwêl Misra.

⁹Sede Davit a wɔ̀ jugu bemât bebak wane mo, e wey na yɛn mwa, e ka tɛt ɛ rwas kɛ hwā wɛt, ko e hashe berɔndɔng, na vyēl, na bemadung, na bemaryat tanga berugu. Kayɛ jeng de a toyo vey na Akish,

¹⁰ko e rangal hɛ, “Hwà wɔ̂ jugu mo e gwa yunung ɛ?” Ko tuhak Davit e yang ɛ wɔgɔ, a yi e bak batin e vwêl Yuda, tuhak e yang ɛ, a yi e bak batin e vwêl BeYɛramɛyɛl, tuhak arɔng e yang ɛ, a yi e bak batin e vwêl BeKeni.

¹¹Davit e tɛt ɛ mwat hwak kwen, na a vey na yɛ sam de ba vo e como wɛt, yaga sam o ê kwon ha e Gat hâ pyɛ́ de Davit a ra. A ragas netsitsɛng nane mwa jeng de á sangal e vwêl BeFilisti.

¹²Ko Akish a tɛ̀ gap mɛ e ra Davit. A bare, e yey mɛ wɔgɔ, Davit a ga tɛ̀, bemat mɛ BeIsrayɛl ba kyɛ́ ɛn hɛ; yaga ano ê tɛ́ ɛ mwât fwom mɛ mwa neken mɛ.