Read berom 1 Samwɛl 28 Bible Online

1 Samwɛl 28 - berom bible

1 Samwɛl 28

¹E jeng yane, BeFilisti ba tula bemât como mɛn, na be tó mɛ na BeIsrayɛl, ko Akish a yâng Davit, “A sé naka na hwo tɔk wɔgɔ, hwo tanga bemat mō, yin a rɔda sɛ̀ me wɔ̂ tô como.”

²Davit a toyo a yɛ, a ye, “A sé tyɛng, hwà rɔda di pyɛ de me, sam mō, ma tɔk ra.” Akish a yang ɛ, “A sé naka. Ma rɔda tɛ̀ o, na hwo tɛ́ o mwât gyeng hom mwa neken mō.”

³Samwɛl a ga kana ku, ko BeIsrayɛl mwa ba ga tosho sesin mɛ, ba ga lɛrɛ hɛ e repomo mɛ, e Rama. Ko Saul a ga ro bemât batô bes na bevwoshon yi e vwel o.

⁴BeFilisti kwong ba tula hɛn, ba wɔ̀ tɛ̀ bǔk como e Shunɛm. Saul arɔng a tula BeIsrayɛl mwa, yɛn a wɔ̀ tɛ̀ mɛn à bǔk como mo e bahwôl Gilbowa.

⁵Jeng de Saul a di bemât comô Filisti, nemi na gaba a yɛ e yey, ko a vow rebek sizɔng yaga bengyip.

⁶A rangâl Dagwi Darwey, ko Dagwi Darwey a toyo a yɛ na pyɛ cak wɛt, kɛ e ji negwi, kɛ yi na masa na Urim tanga Tumim, kɛ yi na bezarap Dagwi arɔng wɛt.

⁷Yaga ano, a yâng bemât badu mɛ, “Jāma hin a me hwā de a vɔk retô vyoshon, yaga na me wɔ na yɛ, na me rangal hɛ.” Ko bemât badu mɛ ba yang ɛ, “Di, hwā hwak a sé e repomô Ɛndɔr de a vɔk retô vyoshon.”

⁸Ano kwong, Saul a hwo sege berugu mɛ, na a tɛ́ ɛ sede mwat hwak, a jut bemat mɛ beba, a kyè mɛ, yɛn a wɔ̀ wul lɔ hwā mo naturuk. A yang ɛ, “Mara a me na retô vyoshon, na hwo vey a me na mwa mwat de ma rɔda kaba a hwo reza mɛ.”

⁹Ko hwā mo a yang ɛ, “Hwà tɔk, gbɔng gwɔ̀m a ga ro bemât batô bes na bevwoshon yi e vwêl Israyɛl. Yaga sɛ́ de hwó simo tɛ̀ me e segun, na be mɔrɔ me ɛ?”

¹⁰Saul a hwo sira a yɛ, a ye, “Sede remo de Dagwi Darwey a sé wo neken, ma sira me, vit a pyɛ de ya rɔda té na hwo!”

¹¹Hwā mo a hwo yang ɛ, “Hwó simo, me yila a hwo wɛ̌ mwat o ɛ?” A yang ɛ, “Yila a me Samwɛl.”

¹²Ras de hwā mo a di Samwɛl, ko a pɛl kun, a yâng Saul, “Yaga sɛ́ de hwà kwɛlɛng me, ko sɛ̌ hwà sé Saul arɛt?”

¹³Gbɔng gwɔ̀m o a yang ɛ, “Hwo kwon sap wɛt! Hwà di sɛ́ ɛ?” Hwā mo a yang ɛ, “Ma di wovuvwel hwak a sé turus vey yi e vwel.”

¹⁴Saul a rangal hɛ, “A sé sede wa ɛ?” Hwā mo a yang ɛ, “A sé mwakuk o, a tɛ̀ gworugu, a sé turus mɛ vey pom.” Saul kwong a vɛ̌ tɔk a sé Samwɛl, a hwo ye guduruk na bayis mɛ e vwel, na a nɔng ɛ nerey.

¹⁵Samwɛl a yang ɛ, “Yaga sɛ́ de hwà sé bɔrɔk me, na hwo toyo, na me vey ɛ?” Saul a toyo a yɛ, a ye, “Ma sé e ji rezot sizɔng, yaga BeFilisti ba sé tó como na me. Dagwi a ga nɔng me bama, e to toyo a me na ha wɛt, kɛ yi na bezarap mɛ, kɛ e ji negwi ayi. Yaga ano de ma sé yishi hwo, na hwo dura a me pyɛ de mê ra.”

¹⁶Samwɛl a yang ɛ, “Yaga sɛ́ de hwó rangal me, remo de Dagwi Darwey a ga nɔng o bama, na a tɛ́ ɛ wo repugu mō ɛ?

¹⁷Dagwi Darwey a ga ra a hwo tyɛng na pyɛ de a ga kana ha a hwo gyam yi e nu hom. A ga sey ɛ negwɔm yi e vwɔ mō, a ga nɔ̂ng mwat hwak, yɛ Davit.

¹⁸Yaga hwà kana kyɛ́ o nà wok fwɔ mɛ, na hwo wey na BeAmalɛk, na hwo fugut hɛn, yaga shom de a vɔk e ra yɛn. Pyɛ ma yane de ya tɛ̀, Dagwi Darwey a ra a hwo pyɛ yemo yunung.

¹⁹A kat mɛ, a rɔda nára hwo mwa na BeIsrayɛl e vwɔ̂ BeFilisti. Ko di, nahwol hwo tanga nèy mō yin a rɔda ba sè tanga me. Dagwi Darwey a rɔda nára bemât comô BeIsrayɛl e vwɔ̂ BeFilisti arɔng.”

²⁰Jeng de Saul a wok neha Samwɛl, bengyip ba vo ɛ ding-ding, ko a gaba e vwel, a dyɛng ɛ dɔɔlɔl, vit à yɛ na gap hak wɛt, yaga a ga ka re pyɛ cak tuk hane wɛt, a pere wɔ bak ɛ turuk.

²¹Hwā mo a vey na Saul, a sɛ̀ ɛ, a sé vow yaga bengyip, ko a hwo yang ɛ, “À da, di, ma ga wet betong na ha mō, ko ma ye waa a neken hom, na me ra pyɛ de hwà ha a me.

²²Ano arɔng, tik na hwo wok ha hom. Sǎ me nɔng o kepyɛ re. Re, na hwo sɛ̀ mɛ gap, na hwo de kyè mɛ.”

²³Ko Saul a kyɛ́ ɛ, a ye, “Wey, mê re pyɛ cak wɛt.” Ko bemat mɛ beba tanga hwā mo ba shonong e ra yɛ e ngyen. Ano a de wok ha mɛn, a sogo yi e vwel, a sangal e ra gwat.

²⁴Hwā mo a sogo ziri, a yɛrɛ kemus mɔ́sɔ de ba gyeng kɛ naka, a jut nemuk, a yong, a rangas mɛ kpam-tuk sana géy-sing.

²⁵A vey nɔ̂ng Saul na bemat mɛ, ko yɛn a re. E bama mo, yɛn a kaba gwong e ji turuk hane mo.