Read berom 1 Samwɛl 29 Bible Online

1 Samwɛl 29 - berom bible

1 Samwɛl 29

¹BeFilisti ba tula bemât como mɛn mwa e Afɛk, ko BeIsrayɛl ba tɛ̀ bǔk mɛn bagat na lwêl nshi e Yɛzrɛɛl.

²Jeng de begwɔ̀m BeFilisti betungun ba ta gwarwang na bagyɛng bemat mɛn, behak bá sè vê bemat naga naga, ko behak vê bemat gu gu. Davit arɔng a raa na regyɛng o remɛ e bama mɛn tanga gwɔ̀m Akish.

³Begbɔng bemât comô BeFilisti ba di ɛn, ba rangal wɔgɔ, “Ko BeIbrani vemo arɔng ɛ?” Akish a toyo a yɛn, a ye, “A sé e Davit womo de á kana sè mwât nuyêl Saul, gbɔng gwɔ̀m BeIsrayɛl, à wane. A sé sangal na me, a ga dal shey hining a remo, ko ma ga sang sɛ̀ keburu kehak na yɛ wɛt yi e tuk de a tele vey na me vey e remo.”

⁴Bemât nuyel o ba tɛ̀ shom na yɛ, ko ba yang ɛ, “Tɛ̀ mwat womo a to hɛ, tik ɛ a toyo vɔk e kwɔn de hwà nɔng ɛ, a sangal ɛ. Wot e simo, a kyè tanga wot wɔ̂ como mo wɛt, gyeng a rɔda doyo, a tɛ́ ɛ mwât repugu mot. Hwó tē kɛ gyeng a rɔda ra e rɛ̌, na a gang-nshi na dalɔ mɛ, ka sede a ra ano na batô bemat mot wɛt ɛ?

⁵Káa! E Davit womo de bá ra lwɛlɛ, bá rɛ̌, ko bá tē: “Saul a mɔbɔs bemât repugu gu, ko Davit a mɔbɔs bemɛ gu kuru!”

⁶Ano kwong, Akish a hwo yila Davit, a yang ɛ, “Sede remo de Dagwi Darwey, a sé wo neken, hwà sé mwat de be tó yey na hwo wɛt. Ma yâng simo, na me vɔk o e ji bemât como hom, yaga ma sang sɛ̀ kerenɛn kehak na hwo yimo tuk de hwà vey sangal tanga me wɛt. Ko bwâng begwɔ̀m BeFilisti be simo hwo wɛt.

⁷Yaga ano, toyo hwo tyang, hwo kwon ra pyɛ cak de yê lashe a begwɔ̀m o yey wɛt.”

⁸Davit kwong a yâng Akish, “À da, e sɛ́ de ma ra ɛ? E hɛ̌ nɛn de ba sɛ̀ na me yimo tuk de ma dura to hom e nuyel mō vey e yunung, hemo de hê dul me nà wɔ̀ tó como na bemât repugu mō, à darwey hom arɛt?”

⁹Akish a toyo a yɛ, a ye, “Ma tɔk, ma sey o na yey rining sede remo tom-lagwî Dagwi. Ko bemât nuyêl comô BeFilisti ba di, hwà rɔda wɔ̂ como mo tanga wot wɛt.

¹⁰Yaga ano, tik na hwo ba sogo bop nagasi tanga bemat mō de yin a yi na darwey mō Saul. Kyè in wɔ e kwɔn de ma nɔng o, yin sangal ɛ. Hwo wok shom wɛt, yaga me pyɛ hom, hwà jam a me.[26] Sogo bop nagasi, jeng de gasi ha ye gbey, ko yin kaba gwong.”

¹¹Ano kwong, Davit tanga bemat mɛ ba nusu bop nagasi, yɛn a toyo vɔk e vwêl Filisti, BeFilisti kwong ba re nuyel na kwɛngɛl wɔ̀ tut e Yɛzrɛɛl.