Read berom 1 Samwɛl 3 Bible Online

1 Samwɛl 3 - berom bible

1 Samwɛl 3

¹Hwey hane Samwɛl há sè ra a Dagwi Darwey fwom e vwɔ̂ Ɛli. E jeng yane mo reha yi na Dagwi rá mâk vɛsɛ yɛt wɛt, ko bemat bá to bɛrɛng pyɛ́ na negwi-ywey yɛt wɛt arɔng.

²Naturuk hak Ɛli, de bayis ba to bɛrɛng yɛt wɛt, a sé e dyɛngɛ mɛ.

³Samwɛl arɔng a sé dyɛngɛ e ji duk rê fongôl Dagwi Darwey, kwɔn de Kundung Dagwi gwa sé ɛ, ko kywa-kya gwa sé rɔngɔl nà rimi hɛ.

⁴Dagwi Darwey a yila Samwɛl, Samwɛl a simo a yɛ a ye, “Me à womo.”

⁵Ko a sogo, a tele wɔ na Ɛli, a yang ɛ, “Me à womo, ma wok hwà yila me.” Ko Ɛli a toyo a yɛ a yang ɛ, “Ma yila hwo wɛt, toyo hwo wɔ̀ dyɛng.” Samwɛl kwong a toyo wɔ̀ dyɛng.

⁶Dagwi Darwey a to yila Samwɛl, yɛ kwong a to sogo, a wɔ́ na Ɛli, a yang ɛ, “Me à womo, hwà ga yila me.” Ko Ɛli a yang ɛ, “À hwey hom, ma yila hwo wɛt, toyo na hwo wɔ̀ dyɛng.”

⁷E jeng yane Samwɛl a ga kana tɔ́k ɛ na Dagwi Darwey yɛt wɛt, ko neha yi na Dagwi arɔng na ga hwo vɛsɛ na yɛ wɛt.

⁸Dagwi Darwey a to yila Samwɛl, yila hê tat. Samwɛl a sogo, a to wɔ́ na Ɛli, a yang ɛ, “Me à womo, hwà ga yila me.” Ɛli kwong a de tɔk, e Dagwi Darwey wɛ de a sé yishi hwey o.

⁹Ko a yang ɛ, “Toyo, kyè wɔ̀ dyɛng, ko ka sede a to yila hwo, ko hwo yang ɛ, ‘Hā, à Dagwi Darwey, sam mō a sé wet betong.’ ” Samwɛl kwong a toyo wɔ̀ dyɛng.

¹⁰Dagwi Darwey a vey tumal e hwomo, a yila sede raane, “Samwɛl! Samwɛl!” Samwɛl kwong a yang ɛ, “Hā zɔng, ma sé wet betong, à Da.”

¹¹Ko Dagwi Darwey a ye, “Di, mê kwɔ̂k rá pyɛ e ji Israyɛl yemo de kawɛ mwat de a wok, ko betong mɛ ba rɔda tosho.

¹²E tuk hane ma rɔda ra a Ɛli mwa pyɛ́ de ma kana ha yi e susu mo vɔk e yɛnɛ mo. Ya rɔda té e ra yɛ na belɔ mɛ.

¹³Ma ga ha a yɛ, ma rɔda gang belɔ mɛ na shɔt sana yɛnɛ, yaga ha ves de nèy mɛ na ha e ra me. Ko Ɛli a tɔk ano, ko a ka tabak nɛ wɛt.

¹⁴Yaga ano, ma sira me mwin, vit a nɔrɔ̂ yas de be yɛt vɔk na me de ha rɔda fugut banɛ̂n lɔ Ɛli.”

¹⁵Samwɛl a dyɛng vɔk e gasi. Jeng de a sogo, a wunta ri duk Dagwi. Ko a sǎ yuu, a ha a Ɛli pyɛ cak wɛt, yaga a wok bengyip.

¹⁶Ɛli a yila hɛ, “À Samwɛl, hwey hom.” Samwɛl a yang ɛ, “Ey, me à womo.”

¹⁷Ɛli mo a rangal hɛ, a ye, “Hā a me, e sé de Dagwi Darwey a há a hwo ɛ? Hwo lɛrɛ a me na pyɛ cak jining e ji pyɛ́ de hwà wok yi na yɛ wɛt. Ka sede hwà lɛrɛ pyɛ jining, ko Dagwi Darwey a rɔda ra a hwo tabak ves.”

¹⁸Samwɛl kwong a ha a yɛ pyɛ̂ mwa, a ka lɛrɛ na pyɛ cak jining wɛt. Ɛli a ye, “Yɛ a sé Dagwi Darwey; a rɔda ra pyɛ de ya sé tyɛng e di mɛ.”

¹⁹Samwɛl a ras, ko Dagwi Darwey a sé tanga yɛ, yaga ano hâ Samwɛl ha tɔk gaba e vwel wɛt.

²⁰Bemat mwa yi e vwêl Dan e rwa rak vɔk e repomô Bɛɛr-Sheba e rwa batin ba pere tɔk, yɛ a sé zarap Dagwi wo mwin o.

²¹Dagwi Darwey a re nuyel na dura tó mɛ e Shilo, kwɔn a hane de a hwo dura reto mɛ na Samwɛl yi na ha mɛ.