Read berom 1 Samwɛl 30 Bible Online

1 Samwɛl 30 - berom bible

1 Samwɛl 30

¹Davit tanga bemat mɛ ba wɔ̀ wul Ziklak e tuk hê tat. E jeng de yɛn á sè vit e kwɔn o, BeAmalɛk ba ga kana wɔ̀ jugu bak batîn vwêl Yuda tanga Ziklak arɔng, ba ga tɛ̀ kya he re pomo mo hywiri.

²Ba hashe beha e jugu mwa na nèy, ba ka mɔrɔ ko gwining wɛt, ko ba kyè mɛ.

³Sede Davit tanga bemat mɛ ba pom, ba sɛ̀ kya ha ga re repomo mo, ko ba ga to hashe beha mɛn na nèy mɛn bewen na behwong, ba kyè mɛ.

⁴Ko Davit tanga bemat mɛ ba tosho, ba dak bèkun na gap sede bê tē nàt, ba tɔk to tosho wɛt.

⁵Ba hashe behâ Davit vane beba arɔng, Abinowam wo Yɛzrɛɛl tanga pwi mɛ Abigɛl hwâ kwɔ̌ Tɔ́n yi e Karmɛl.

⁶Davit a ga yel e tat, yaga bemat ba tɛ̀ shom, ba simo bomos hɛ na beta yaga nèy mɛn de ba ga hashe. Ko Davit a tɛ̀ gap mɛ e ra Dagwi Darwey, Dagwi mɛ, ko a to sɛ̀ gap.

⁷A hwo yâng Abiyatar Ahimɛlɛk, piris wɔgɔ, a vey a yɛ na radîng pyɛ̂ fwôm rangsâl Dagwi, ko Abiyatar a vey a yɛ mɛ.

⁸Davit a hwo rangâl Dagwi Darwey, a ye, “Me raa bemât jugu vane mo a? Ma rɔda wɔ̀ sɛ̀ ɛn a?” Ko Dagwi Darwey a yang ɛ, “Raa hɛn, hwà rɔda wɔ̀ sɛ̀ ɛn, hwà rɔda toyo na bemat mō de ba hashe.”

⁹Davit tanga bemat naga betyiimin (600) de ba sé na yɛ, ba sogo, yɛn a wɔ̀ wul Rɔt Bɛsɔr. E hwomo, ba hàla bemat naga beba (200) de ba ga ruru. Ko Davit a re nuyel tanga bemat naga benaas (400) ba raa bemât repugu mo.

¹¹Yɛn a sé kyè, ko bemat mɛ ba sɛ̀ mwât Misra hwak, ko ba vey na yɛ na Davit. Ba nɔng ɛ kpam-tuk, a re, ba to nɔng ɛ nshi, a sɔ,

¹²ko ba to nɔng ɛ cɛk regat nèy regwi de ba shumung ko ba mat nɛ, tanga nèy anap gushuk neba de ba shumung. E bama de a ga re, gap mɛ ha vɛ hɛ, yaga a ga kana tɛ̀ negasi netat na naturuk netat arɔng sana tɛ̀ pyɛ cak e nu.

¹³Ko Davit a rangal hɛ, a ye, “Hwà sé mwât wa? Hwà yi e gwa ɛ?” Mwat o a toyo a yɛ, a ye, “Ma sé WoMisra, ma sé sam WoAmalɛk hwak. Pɔlɔ hê tat a hemo de a kyè, a tik me, yaga me ro me.

¹⁴Wot á wɔ̀ jugu e bak vwêl BeKeretya e bak batîn vwêl Yuda tanga e bak vwêl lɔ Kalɛp, ko wot a tɛ̀ kya e repomô Ziklak arɔng.”

¹⁵Davit a yang ɛ, “Hwô tɔk wɔ̀ kyɔk me e kwɔ̂n regyɛng bemat o a?” Wen o a yang ɛ, “Ka sede hwà sira a me na Dagwi wɔgɔ, hwà rɔda mɔrɔ me, kɛ hwo nára me e vwɔ̂ dalɔ hom wɛt, ko ma rɔda wɔ̀ kyɔk o e kwɔn mɛn.”

¹⁶Davit a sira hɛ, ko wen o a wɔ̀ kyɔk ɛn e kwɔn o, ko ba sɛ̀ ɛn, ba bere hɛn e kahɛ kwɔn e hwomo, ba sé re, be sɔ, be feng, be rɛ̌ yaga yey pyɛ̂ng pyɛ́ pyak de ba hashe e jugu yi e vwêl BeFilisti tanga hê Yuda.

¹⁷Rwa hwol gasi, Davit a hwo e ra yɛn, a mɔbɔs hɛn vɔk e nahywegelek. Vit a mwat de a hywit ɛ sɛ̌ bewen naga benaas (400) de ba tele e ra bemaryat zɔng de ba wɔ̀ dal.

¹⁸Davit a to sey ɛ̀ kayɛ pyɛ de BeAmalɛk ba kana hashe, a to sey ɛ beha mɛ beba arɔng.

¹⁹Vit a pyɛ mɛn cak de ya vuru hɛ, nèy kɛ bemakuk, bewen kɛ behwong, kɛ pyɛ́ de ba hashe e jugu mwa, Davit a sɛ̀ kayɛ pyɛ.

²⁰A sey ɛ mwa vyēl na berɔndɔng yaga tó mɛ. Bemat mɛ ba tá yɛ̄ e yêl bwâng yas o,[27] ko ba ye, “Pyɛ́ de Davit a sey ɛ e como a yemo!”

²¹Jeng de Davit a wɔ̀ wul kwɔ̂n bemat vane naga beba de ba tik ɛn e Rɔt Bɛsɔr, yaga ba ga ruru, yɛn a wɔ̀ gyéng ɛ tanga bemat de ba sé tanga yɛ, ko Davit a kyul ɛn.

²²Ko bezɔ̂ng bemat de ba vɔk neves e ji vemo de ba sé tanga Davit ba ye, “Sede remo de yɛn a kyè tanga wot wɛt, wot a rɔda nɔ̂ng hwak e ji mɛn pyɛ cak arɔng wɛt, sɛ̌ kawɛ mwat a jut hwā mɛ na nèy mɛ zɔng, na a kyè mɛ.”

²³Ko Davit a hanat, a ye, “Yin kwon ra ano wɛt, à begwa hom, sede remo de Dagwi Darwey a ga nɔng ot pyɛ́ yemo, a to gyeng ot, ko a tɛ̀, wot a di wɛng e ra bemât jugu mot.

²⁴Beva de ba rɔda simo ha min hane mo ɛ? Ba rɔda gas pyɛ́ mo tyɛng mwa, bemat de ba sé e dem gyêng pyɛ́ na vemo de ba wɔ̂ como bê sɛ̀ tyɛng.”

²⁵Yi e tuk hane, ha mo ha pe tɛ́ ɛ redu e ji Israyɛl, e Davit de a yi na redu mo, ko be gyeng rɛ vey e yunung.

²⁶Jeng de Davit a toyo wɔ e Ziklak, a tomo pyɛ́ de ba hashe e como mo cak vɔk na bemakûk Yuda, vemo de ba sé besa mɛ, a ye, “Ma sé tomo a yin na nɔrɔ̂ pyɛ́ yemo de Dagwi Darwey a tɛ̀ ba sey ɛ yi na bemât repugu mɛ.”

²⁷A tomo na yɛ vɔk e bapomô Bɛtuwɛl,[28] na Ramɔt e bak batîn vwêl Yuda, na Yatir,

²⁸na Arower, na Sifmɔt, na Ɛshtɛmɔwa,

²⁹tanga Rakal, a to tomo vɔk e lɔ Yɛramɛyɛl, na vɔk e BeKeni,

³⁰na vɔk e bapomô Hɔrma, na Borashan, na Atak,

³¹na Hɛbrɔn tanga mwa nekwɔn de Davit tanga bemat mɛ ba kana kyě kyè ɛ.