Read berom 1 Samwɛl 31 Bible Online

1 Samwɛl 31 - berom bible

1 Samwɛl 31

¹BeFilisti kwong ba hwo BeIsrayɛl na como e bahwol Gilbowa, ko BeIsrayɛl ba tele yi e nuyel mɛn, ba mɔbɔs BeIsrayɛl behak pyak.

²BeFilisti mo ba ró Saul na nèy mɛ, ba mɔbɔs besɔ mɛ, Yɔnatan, na Abinadap tanga Malkishuwa.

³Como mo ya fes, ba rɔnɔ Saul, bemât begbang behak ba tabas hɛ, ba pere wɔ̀ mǎ hɛ ding-ding.

⁴Saul a yâng mwat de e vɔkɔs a yɛ pyɛ̂ como, “Hwɔltɔ wal mō yi e fwâl wɛ, na hwo luga me mɛ, yaga na bemandul vemo be kwon luga me, be jut me, be té mɛ̀ pyɛ jɔgɔ wɛt.” Ko mwat o a kyɛ́ ɛ, yaga ê mɔrɔ gbɔng gwɔ̀m wɛt. Saul a vɛ̌ hwɔltɔ wal mɛ, a tɛ̀ wɛ, ko a gaba ɛ, a pere wɔ ku.

⁵Sede mwât vɔ̂k pyɛ̂ como mɛ a di Saul a ga ku, yɛ arɔng a tɛ̀ mwɛ a wal o, a gaba ɛ, ko a vɛ̌ ku tanga yɛ.

⁶Ano de Saul na nèy mɛ netat, tanga mwât vɔ̂k pyɛ̂ como mɛ tanga mwa bemat mɛ ba kushu tuk hining o.

⁷Jeng de BeIsrayɛl de ba sangal e gurâ nɛk Yɛzrɛɛl, na vemo de ba sangal e gurâ Yɔrdan ba di bemât comô Israyɛl ba ga tele, ko Saul tanga nèy mɛ ba ga kushu, ba vɛ̌ tele, ba hala bapomo mɛn. BeFilisti kwong ba vey sangal e ji mo.

⁸Jeng de BeFilisti ba nusu e het à gasi, na be vey hywɛrɛm vemo de ba mɔbɔs, na be hashe pyɛ́ mɛn, ko yɛn a pom, be sɛ̀ revîn Saul tanga vê nèy mɛ netat e bahwôl Gilbowa.

⁹Yɛn a pat ratô Saul, ba paa yɔ̀m como mɛ, ko ba tomo mɛ betom vɔk e yɛnɛ̂ vwêl BeFilisti, yaga na yɛn a wɔ̀ nɔng yɛgɛt yane vɔk na bedagwi mɛn e beduk rê fongol mɛn tanga vɔk na bemat mɛn arɔng.

¹⁰Yɛn a tik yɔ̀m comô Saul e ji duk rê fongôl dagwi mɛn hwā mo Astarte, ko ba wɔ̀ kagam revîn Saul e ra jwâ-pomô Bet-Shan.

¹¹Jeng de bemât repomô Yabɛsh e Gileyat ba wok pyɛ de BeFilisti ba ra a Saul,

¹²mwa besugâ como mɛn ba sogo, ba kyè, ba re nabwalak nane wɔ e Bet-Shan. Ba wɔ̀ jut revîn Saul tanga vê nèy mɛ yi e ra jwâ-pomo mo, ba vey mɛ e Yabɛsh, ko ba rangas vɛ e hwomo.

¹³Ba lɛrɛ bekup o e nɛ̂n retîn cɔgɔt matang e Yabɛsh, ko yɛn a tik rê pyɛ́ nepɔlɔ netaama.