Read berom 1 Samwɛl 4 Bible Online

1 Samwɛl 4 - berom bible

1 Samwɛl 4

¹E jeng yane BeIsrayɛl ba nusu wɔ̀ tó como na BeFilisti, yɛn a tɛ̀ bǔk como mɛn e Ebenezer, ko BeFilisti ba tɛ̀ mɛn e Afɛk.

²BeFilisti ba yong ɛn, ba ngyɛrɛ hɛn kwara mo, ba hwo ɛn, ko como mo ya fes. Yɛn a ro BeIsrayɛl, ba re ɛn, ba mɔbɔs a yɛn bemat sede gu banaas (4,000) e hêy como mo.

³Jeng de bwâng bemât comô Israyɛl ba toyo hɛn vɔk e bǔk como mɛn, bemakuk mɛn ba rangal, ba ye, “Yaga sɛ́ de Dagwi Darwey a tɛ̀ BeFilisti ba re ot yunung e como mo arɛt? Tik na wot wɔ̀ jut Kundung Wuna-na-Sirâ Dagwi Darwey yi e Shilo, na a sè e tē mot, yaga na a sey ot yi e vwɔ̂ bemât repugu mot.”

⁴Yɛn a tomo bemat wɔ e Shilo, ba wɔ̀ jut Kundung Wuna-na-Sira de gwa sé kwɔ̂n sangâl Dagwi Darwey. Yɛ Dagwi Da Jey Mwa a sé sangal e tê pyɛ́ cen de ya vɔk bafabak, ko ba tɔk di ɛ na bayis wɛt. Nèy Ɛli neba Hɔfni tanga Pinehas ná sè e hwomo tanga gwɛ.

⁵Jeng de ba vey na kundung o e bǔk como, BeIsrayɛl mwa ba gbɔ na gbɔng fwɔ sizɔng, ko vwel ha digis.

⁶BeFilisti ba wok jɔngɔl gbɔ hane, ba yâng bemɛn, “Jɔngɔl sé a yane e ji bǔk comô BeIbrani ano ɛ?” Jeng de yɛn a tɔk, ba ga vey na kundung Dagwi Darwey e bǔk como BeIsrayɛl,

⁷yɛn a tɛ̀ bengyip, ba ye, “Dagwi a ga vey e bǔk como. Yaa kukuuk, gawey e ra wot! Wot a ga sang di ano wɛt.

⁸Gawey e ra wot! Wa a rɔda sey ot yi e vwɔ̂ Dagwi de a vɔk reto ɛ? E Dagwi á womo de a wey na BeMisra e ji hey wɛt arɛt?”

⁹Ko bemât nuyel mɛn ba ye, “Vɔk in yey ting, à BeFilisti, rɔgɔs hin, na yin tó como na yêy beras, ka ano wɛt, ko sɛ̌ wot a rɔda sè e vwɔ̂ BeIbrani, sede remo de yɛn a sé e vwɔ mot. Tó in yɛ na yey ting zɔng!”

¹⁰BeFilisti ba tó como, ko ba re BeIsrayɛl e como mo, ba ro ɛn vɔk e lɔ, ba mɔbɔs bemât comô BeIsrayɛl gu kuru batat (30,000).

¹¹Ko yɛn a sey ɛ Kundung Wuna-na-Sirâ Dagwi Darwey; ba mɔbɔs nèy Ɛli nane neba, Hofni na Pinehas arɔng.

¹²WoBɛnyamin hwak a tele yi e hêy como mo vɔk e Shilo, a hama berugu mɛ, a bungut rato mɛ na fongol yaga lashê yey.

¹³Jeng de a yel e ji repomo, a hwo bere reha mo, bemât repomo ba hwo tosho. Ɛli a sé e sangal e vwâ gwong, a tɛ̀ betong e gwong, ko yey mɛ ya beseng e ra kundung Dagwi.

¹⁴A hwo wok bèkun de bemat be dak, a hwo ye, “E gwojɔngɔl sɛ́ a gwomo ano ɛ?” Mwat o a yi ziri, a wɔ̀ há a yɛ.

¹⁵Ɛli mo a ga kana kwop, neshey mɛ na ga wul kuru shabatat na nɛ rwit (98), a to bɛrɛng wɛt.

¹⁶Mwat o a ha a yɛ, “Ma sé vey yi e hêy como a remo, ma tele yi e hwomo.” Ɛli a rangal hɛ, a ye, “Hey o ha sé e rɛ̌, à hwey hom ɛ?”

¹⁷Mwat o a yang ɛ, “Hey o ha sé pyɛ há wɛt, ba re bemat mot, ba tele yi e hey o, nèy mō neba Hofni na Pinehas na ga wey, ko ba to sey ɛ kundung Dagwi arɔng.”

¹⁸Jeng de mwat o a vo rezâ kundung Dagwi, ko Ɛli a vɛ̌ gaba kang-gang yi e ra pyɛ sangal mɛ e rwi duk rê fongol. Rèmo de mwakuk o a vɔk gwobek a pere wɔ̀ kwɔrɔ fwɔ, a ku. Ɛli mo á sè mwât nuyel tanga mwât râ shɔt BeIsrayɛl neshey kuru banaas.

¹⁹Hwâ sɔ mɛ Pinehas á vɔk jim, á kwɔ̂k tɔ. Remo de a wok rehâ sey ɛ kundung Dagwi na a to wok rehâ rekû dakwop mɛ, na re rwas mɛ mwa, a vɛ̌ ye ngyuk, a pere wɔ̀ tɔ, yaga nerakrâk rus na vo ɛ.

²⁰Jeng de a sé tala hɛ wɔ̀ ku, ko behâ sêy hwey o ba yang ɛ, “Vɔk yey ting! Hwà ga tɔ̀ hwey wen.” Ko a wet betong na ha mɛn wɛt, a toyo a yɛn na ha hak wɛt.

²¹Ko a bare na sey ɛ kundung Dagwi, na rekû dakwop mɛ tanga rwas mɛ mo zɔng. A ye, “Nerêy Dagwi na ga gas ɛn na Israyɛl, yaga ba ga sey ɛ Kundung Wuna-na-Sirâ Dagwi.” Yaga ano a vo a hwey o rezâ Ikabɔt, wɔgɔ, nerey na ga gas ɛn.