Read berom 1 Samwɛl 5 Bible Online

1 Samwɛl 5 - berom bible

1 Samwɛl 5

¹Bama de BeFilisti ba ga sey ɛ Kundung Wuna-na-Sirâ Dagwi, ba kyè na gwɛ yi e Ebenezer, ba wɔ̀ tik e repomô Ashdot.

²Ba jut gwɛ, ba wɔ́ na gwɛ e ji duk rê fongôl dagwi mɛn Dagɔn, ko ba tik gwɛ bagat na pyɛ de ba yong de ya tasal Dagɔn.

³Bemât Ashdot ba nusu gasi bop, ba wɔ e duk rê fongol o, ba di pyɛ mo ya ga gaba gup e nuyêl Kundung Dagwi Darwey. Yɛn a jut yɛ, ba tɛ̀ yɛ cik e kwɔ̂n yɛ sede raane.

⁴Nusu hwol bop nagasi, yɛn a to wɔ̀ di, ba sɛ̀, ya ga to gaba gup e nuyêl Kundung Wuna-na-Sirâ Dagwi Darwey. Rato na vɔ yɛ mwa ba ga kwɔrɔs hɛn, ba sɛ̀ vɛ e rwi duk, ko gèy bek o zɔng de ha tɛt ɛ.

⁵A sé yaga ano de bepiris Dagɔn tanga bwâng bemat de be yeles e ji duk Dagɔn o, na be re a yɛ fongol, be bɔrɔ e ra rwi duk o wɛt vey e yunung.

⁶Dagwi Darwey a tɛ̀ rezot e ra bemât Ashdot, a tak a yɛn reyɔm na benot,[5] yɛn na bemat de ba gwɔrɔ hɛn.

⁷Jeng de yɛn a di ano, yɛn a ye, “Di, Dagwî BeIsrayɛl à womo a sé tak a wot reyɔm, wot mwa na dagwi mot Dagɔn o. Wot kwon re nuyel na vɔk Kundung Dagwi mɛn e ngamo wɛt!”

⁸Yɛn a tomo betom, be wɔ̀ yishi begwɔ̀m BeFilisti vane betungun, ba rangal hɛn, ba ye, “E sɛ́ de wot a rɔda ra na Kundung Dagwî BeIsrayɛl arɛt?” Begwɔ̀m o ba ye, “Tomo hin na gwɛ vɔk e Gat.” Ko ba tomo na gwɛ vɔk e Gat.

⁹Jeng de yɛn a ga vey mɛ na gwɛ e ji repomo mo, ko Dagwi Darwey a tɛ̀ a yɛn rezot, ko bemat ba vow yaga bengyip. A tomo na serɔ̂ benot, ba hwo e ra bemât repomo mo mwa bemakuk na nèy.

¹⁰Ko yɛn a tomo na Kundung Dagwi o vɔk e repomô Ɛkrɔn. Jeng de bemât Ɛkrɔn ba di ano, ba hwo tosho, ba ye, “Di, ba ga vey na Kundung Dagwî BeIsrayɛl e ngamo, na gwo vey mɔbɔs hot mwa na nèy mot!”

¹¹Yɛn arɔng ba hwo tomo a begwɔ̀m BeFilisti mwa, na be tula hɛn. Ba yang ɛn, “Toyo hin na Kundung Dagwi BeIsrayɛl e kwɔ̂n gwɛ! Gwo kwon mɔbɔs hot mwa na belɔ mot wɛt.” Bengyip reku ra se vos bemat e ji repomo mo zâ wɛt, yaga Dagwi Darwey a tɛ̀ a yɛn rezot sizɔng.

¹²Ko vemo de ba kushu wɛt, benot ba tó ɛn. Bemât repomo mwa ba tosho a bedagwi mɛn.