Read berom 1 Samwɛl 6 Bible Online

1 Samwɛl 6 - berom bible

1 Samwɛl 6

¹Kundung Wuna-na-Sirâ Dagwi Darwey gwa sangal e vwêl BeFilisti pɛl taama.

²Ko BeFilisti ba hwo tomo be yishi bepiris tanga bevwoshon mɛn, ba rangal hɛn, ba ye, “Wot ê ra e rɛ̌ na kundung Dagwi Darwey ɛ? Há in a wot, wot ê wɔ̀ kyɔk gwɛ e kwɔ̂n gwɛ na sɛ́ ɛ?”

³Yɛn a toyo a yɛn, ba ye, “Ka sede yin ê tomo Kundung Dagwî BeIsrayɛl, yin kwon tomo gwɛ vɔ sǎn wɛt. Ko a sé gbing-gbing na yin tomo na pyɛ râng-to yaga banɛn vɔk na yɛ. Ka sede yin a tɛ̀ tyang, ko yin ê tɔk pyɛ de ya tɛ̀, e tak a yin reyɔm.”

⁴BeFilisti mo ba rangal, “E yɛ̌ pyɛ râng-to de wot a rɔda nɔng ɛ mo ɛ?” Yɛn a toyo a yɛn, ba ye, “Yong in benot dyam shinang betungun, tanga cū tyungun yê dyam shinang arɔng tyɛng na nepyak begwɔ̀m BeFilisti, yaga e yerê tumbang gwining o de a hwo e ra yin mwa na begwɔ̀m min arɔng.

⁵Tik na yin yong benot o, tanga cū mo tyɛng na yēmo de ya lashe pyɛ́ e vwel min, ko yin to nɔ̂ng Dagwî BeIsrayɛl nerey. Gyeng ê jut reyɔm mɛ yi na yin, na vwel min, tanga bedagwi min arɔng.

⁶Yaga sɛ́ de yin ê vɔk negbarak sede gbɔng gwɔ̀m Misra tanga BeMisra de bá vɔk ɛ? Bare hin na gwong de á tɛ̀ a yɛn netɔ̌n, sɛ̌ yɛn a hàla BeIsrayɛl e ngyen, bá nusu, bá kyè nedem mɛn.

⁷A remo, yong in kyɛkyɛ de be tɛsɛ pyɛ́. Yin vey na benêng rɔndɔng beba de ba mɛsɛ̂ng tɔs nèy, vemo de ba ga sang rɔgɔs a yɛn swesêk vɔk berɔndɔng wɛt. Rɔgɔs hin a yɛn kyɛkyɛ mo, ko yin rɔgɔs nèy o e lɔ.

⁸Tɛ̀ in ɛ Kundung o e ji kyɛkyɛ mo. Ko yin tɛ̀ pyɛ̂ dyam shinang yane mo, yemo de yin a sé tomo a yɛ pyɛ̂ râng-to e kekundung o kehak. Tɛ̀ in kɛ e hagât gwɛ. E bama mo, tɛ̀ in gwɛ e gwong, na gwo kyè pyɛ gwɛ.

⁹Bɛrɛng hin gwɛ, ka sede gwa vo gwông Bet-Shɛmɛsh vɔk e vwêl gwɛ, ko wot a rɔda tɔk, e Dagwi wɛ de a tomo na gbɔng rezot remo e ra wot. Ko ka sede ano wɛt, wot a rɔda tɔk, vwɔ mɛ gwa sɛ́ ɛ wɛt, ko sɛ̌ gawey hemo ha té na wot zɔng.”

¹⁰Ano de yɛn a ra. Ba jut berɔndɔng beba, ba rɔgɔs a yɛn kyɛkyɛ mo, ko ba rɔgɔs nèy o e lɔ.

¹¹Ba tɛ̀ Kundung o e ji kyɛkyɛ mo tanga kekundung kane na cū tanga benot dyam shinang vane.

¹²Berɔndɔng vane ba kaba gwong cik vɔk e Bet-Shɛmɛsh, ba ka ye rɛng vɔk e vwɔ yege kɛ mwɛlɛng wɛt, ko ba sè tosho e kwɛngɛl vɛ. Begwɔ̀m BeFilisti ba raa vɛ wɔ̀ yel e repomô Bet-Shɛmɛsh.

¹³E jeng yane bemât Bet-Shɛmɛsh ba sé yɛt bwâl alkama e nɛk. Yɛn a hwo ye ganga bayis mɛn, ko ba di Kundung o, ko yɛn a vɔk yey pyɛng sizɔng.

¹⁴Berɔndɔng de ba hwɔlɔ kyɛkyɛ mo ba pom e cap Yɔshuwa, WoBet-Shɛmɛsh, ba vɛ̌ tumal e hwomo bagat na gwogbɔng gwofwa gwohwak. Bemat o ba vɛ̌ vugus cɔ́gɔt kyɛkyɛ mo e hwomo, ba yɛt berɔndɔng o, ba rangas vɛ pyɛ̂ nɔrɔ vɔk na Dagwi Darwey.

¹⁵Ko BeLevi ba jut Kundung Wuna-na-Sirâ Dagwi Darwey tanga kekundung de ba tɛ̀ pyɛ́ de ba yong na dyam shinang yane e ji kɛ, ba tik vɛ e ra gwogbɔng gwofwa mo. Ko bemât Bet-Shɛmɛsh ba nára nenɔrɔ̂ yas de be yɛt, tanga nenɔrɔ̂ pyɛ̂ rangas nehak vɔk na Dagwi Darwey.

¹⁶Begwɔ̀m BeFilisti vane betungun ba bɛrɛng pyɛ́ yane mwa de yɛn a ra, ko tuk hane mo, ba vɛ̌ toyo hɛn wɛrɛn e Ɛkrɔn.

¹⁷Ano de BeFilisti ba nɔng benot dyam shinang betungun vê râng-to yaga banɛn mɛn vɔk na Dagwi Darwey: Gwining yaga Ashdot, gwining yaga Gaza, gwining yaga Ashkɛlɔn, gwining yaga Gat, tanga gwining yaga Ɛkrɔn arɔng.

¹⁸Ba to ra ano na cû dyam shinang o arɔng. Ba nɔng yɛ̄ yaga mwa bapomo de begwɔ̀m BeFilisti betungun ba re negwɔm e ra vɛ wɔgɔ, bapomo de ba gwɔrɔ na jwa-pomo mwa na nebapomo mɛn. Gwogbɔng gwofwa de gwa sé e ji cap Yɔshuwa, WoBet-Shɛmɛsh, gwane de ba tik ɛ Kundung Wuna-na-Sirâ Dagwi Darwey, gwa tɛ́ ɛ pyɛ nuha.

¹⁹Ko Dagwi Darwey a mɔbɔs bemât Bet-Shɛmɛsh behak kuru bataama, yaga yɛn a sɛt bayis mɛn e ra Kundung mɛ. Ko bemat ba tosho, yaga Dagwi Darwey a mɔbɔs bemat vane ding-ding e ji mɛn.

²⁰Ko bemât Bet-Shɛmɛsh ba ye, “Wa e tɔk tumal e nuyêl Dagwi Darwey, Dagwi wo jɛrɛ womo ɛ? Womo mo a rɔda wɛrɛ e gwa, na a gas ɛ na wot ɛ?”

²¹Yɛn a hwo tomo betom vɔk na bemât Kiriyat-Yɛyarim wɔgɔ, “BeFilisti ba ga toyo na Kundung Dagwi Darwey! Vey in, na yin jut gwɛ vɔk e hane na yin.”