Read berom 1 Samwɛl 7 Bible Online

1 Samwɛl 7 - berom bible

1 Samwɛl 7

¹Bemât Kiriyat-Yɛyarim ba vey, ba jut Kundung o, ba kyè mɛ, ba wɔ̀ tik gwɛ e rahwol e lɔ Abinadap. Yɛn a tik hwey mɛ Ɛlɛyazar jaram, na a bɛrɛng gwɛ.

²Kundung wuna-na-sirâ Dagwi gwa ros e tik e Kiriyat-Yɛyarim, gwa wul neshey kuru baba. Yi e jeng yane mwa BeIsrayɛl ba hwo tosho a Dagwi Darwey, na a sɛlɛ hɛn.

³Ko Samwɛl a yang ɛn, “Ka sede yin a toyo na yey min mwa vɔk na Dagwi Darwey, ko a sé gbing-gbing, na yin gas in na bedagwi beduk tanga pyɛ̂ sekwit yê dagwi hwā mo Astarte! Nɔng in neyey min, na yin raa Dagwi Darwey, na yin re a yɛ fongol, yɛ nju mɛ zɔng. Yɛ kwong a rɔda sey in yi e vwɔ̂ BeFilisti.”

⁴BeIsrayɛl kwong ba gas ɛn na pyɛ̂ sekwît Baal tanga yê Astarte, ko yɛn a raa Dagwi Darwey yɛ nju mɛ na be re a yɛ fongol.

⁵Ko Samwɛl a tɛ̀, be tula BeIsrayɛl mwa e Mizpa, na a ra a yɛn won na Dagwi Darwey.

⁶Yɛn a vey, yɛn a tula hɛn e Mizpa. Yɛn a vɛ nshi, ba losho nɛ e vwel e nuyêl Dagwi Darwey, yɛn a tik rê pyɛ́ tuk hane, ko yɛn a kulsa banɛn mɛn de ba ga ra a Dagwi Darwey. Samwɛl kwong a gas a BeIsrayɛl ha e tē, ko a basa a yɛn arɔng e Mizpa.

⁷Jeng de BeFilisti ba wok, BeIsrayɛl ba ga tula hɛn e Mizpa, ko begwɔ̀m BeFilisti betungun vane na bemat mɛn ba vɛ̌ sogo, na be hwo e ra yɛn. Sede BeIsrayɛl ba wok ha mo, yɛn a hwo tɛ̀ bengyip.

⁸Yɛn a yâng Samwɛl, “Ra a wot won na Dagwi Darwey, Dagwi mot, hwo tik wɛt! Gyeng a rɔda sey ot yi e vwɔ̂ BeFilisti.”

⁹Samwɛl kwong a jut ketyimit de ke rɔɔ ngas, a yɛrɛ kɛ, a rangas kɛ burang nɔrɔ̂ pyɛ rangas vɔk na Dagwi Darwey. A ra won na yɛ, na a sɛlɛ BeIsrayɛl, ko Dagwi Darwey a wok won mɛ.

¹⁰Jeng de Samwɛl a se rɔ̌ nára nɔrɔ̂ pyɛ̂ rangas o, BeFilisti ba sek bagat vey hwo ɛn. Ko Dagwi Darwey a tɛ̀ gbara wa lumla yi e lagwi, ba vɛ̌ rigim hɛn, ko ba kyě tele shaam yi e nuyêl BeIsrayɛl.

¹¹BeIsrayɛl kwong ba nusu yi e Mizpa, ba ro BeFilisti pere wɔ mɛ e nɛ̂n repomô Bet-Kar, ba raa be mɔbɔs hɛn.

¹²Ko Samwɛl a jut gwofwa, a tɛ̀ gwɛ cik e tê Mizpa na Shɛn, a ye, Dagwi Darwey a ga sɛlɛ hot vey e jeng yemo. Yaga ano, a vo a gwɛ rezâ Ebenezer wɔgɔ, gwofwa sɛlɛ.

¹³Ano de ba re BeFilisti, ko yɛn a tɔk to vey e ji vwêl BeIsrayɛl wɛt, yaga Dagwi Darwey a vɔk repugu mɛn vɔk e yɛnɛ̂ jeng Samwɛl.

¹⁴Mwa bapomô BeIsrayɛl de BeFilisti ba kana sey ɛ e tê Ɛkrɔn na Gat, ba to ɛn e vwɔ̂ BeIsrayɛl. Ano de yɛn a to sey ɛ mwa neyɛnɛ̂ vwel mɛn. BeIsrayɛl ba to sangal tyang na BeAmɔr arɔng.

¹⁵Samwɛl á sè mwât nuyel na mwât yông hâ BeIsrayɛl pere wɔ e jeng reku mɛ.

¹⁶E gwɔrɔ kahɛ shey vɔk e Bet-Ɛl, na Gilgal, tanga Mizpa, e kyě yong pyɛ́ de ye té e tê bemat e nekwɔn nane mo.

¹⁷E bama mo, e tòros hɛ vɔk e lɔ mɛ e Rama. E hwomo arɔng e yongos hâ pyɛ́ de ye yeles e tē mɛn na bemɛn. Ko a lɔk gàgbang rangas a Dagwi Darwey nɔrɔ̂ pyɛ́ de be yɛt vɔk na yɛ.