Read berom 1 Samwɛl 8 Bible Online

1 Samwɛl 8 - berom bible

1 Samwɛl 8

¹Jeng de Samwɛl a ga kwop, a tɛ̀ nèy mɛ ne tɛ́ ɛn bemât nuyêl BeIsrayɛl, na be yong a yɛn neha.

²Bazâ nèy mɛ ma vemo: Yɔwɛl yɛ à kunat, ko Abiya à swɛl o. Yɛn a ra fwom o e Bɛɛr-Sheba.

³Ko yɛn a raa negwɔn da mɛn wɛt. Yɛn a vɔk negwɔn simô dyām, ba wet ɛn, ko ba seres dyām e begwông mɔt. Yaga ano ba gas há e tē wɛt.

⁴A vane ano, bemakûk Israyɛl ba tula hɛn mwa, ko ba vey na Samwɛl e Rama.

⁵Ba yang ɛ, “Di, hwà ga kwop, ko nèy mō ne raa negwɔn mō wɛt. Tik na hwo nɔng ot gwɔ̀m de a rɔda re negwɔm e ra wot, tyɛng sede remo de bemât bwâng bavwel ba vɔk.”

⁶Jeng de yɛn a yang ɛ, a nɔng ɛn gwɔ̀m de a rɔda re negwɔm e ra yɛn, Samwɛl a wok netâ ha hane wɛt, ko a ra won na Dagwi Darwey.

⁷Dagwi Darwey a yang ɛ, “Wok pyɛ̂ mwa de bemat o bê ha a hwo. A sé e hwo de yɛn a kyɛ́ ɛn wɛt, ko a sé e me de yɛn a kyɛ́ ɛn, na me se gwɔ̀m mɛn!

⁸Sede remo de yɛn a ra yi e tuk de ma pat ɛn yi e Misra vey e yunung, yɛn a kyɛ́ ɛn nà raa me, ko ba raa bedagwi behak e negya. Ano de yɛn a to sé ra a hwo.

⁹A remo, wok ha mɛn o. Ko tik na hwo ha a yɛn wɛshɛrɛk gyam, na yɛn a tɔk yerê pyɛ́ de gwɔ̀m mɛn o a rɔda ra.”

¹⁰Samwɛl kwong a ha a bemat, de be simo be nɔng ɛn gwɔ̀m, neyɛnɛ̂ pyɛ̂ mwa de Dagwi Darwey a ha a yɛ.

¹¹A ye, “Pyɛ́ de gwɔ̀m min a rɔda ra a yemo ngan: A rɔda jut nèy min bewen, na be ra a yɛ fwom, behak be tɛ́ ɛn bemât ngyisî bekyɛkyɛ̂ bedwâ como, behak be lagsa bedwa, na behak be tele e nuyêl kyɛkyɛ̂ bedwa mɛ.

¹²A rɔda tɛ̀ behak, be sè bemât nuyêl bemât comô gu gu, na vê bagyɛng bemat kuru tibatungun. Behak ba rɔda how a yɛ cāp, na be to yɛt a yɛ pyɛ́ mo, behak kwong ba rɔda turu a yɛ pyɛ̂ como tanga pyɛ̂ bekyɛkyɛ̂ bedwâ como mɛ.

¹³A rɔda tɛ̀ behwóng min behak, be yongos pyɛ̂ nesang hyɔɔlɔl mɛ, ko behak kwong bê kyeres pyɛ̂ re tanga halâng cak arɔng.

¹⁴A rɔda sey ɛ ryat o e ji cāp min, na bě anap tanga batîn pàt min, ko ê nɔngɔ̂s bedamajey mɛ.

¹⁵A rɔda to sey ɛ pyɔlɔ̂ pyɛ jining yi e ji kayɛ pyɛ́ kuru yi e ji pyɛ̂ cāp min, na a nɔngɔ̂s begbɔng o e ji bemât fwôm lɔ mɛ tanga bedamajey mɛ mo behak.

¹⁶A rɔda sey besam min bewen na behwong, tanga berɔndɔng[6] berat o mwa na bemadung min ba rɔda tɛ́ ɛn bemɛ

¹⁷A rɔda to sey ɛ pyɔlɔ̂ pyɛ jining e ji kayɛ pyɛ́ kuru e ji yas min, ko yin arɔng yin a rɔda tɛ́ in besam mɛ.

¹⁸Sede jeng yane mo ya vey, yin a rɔda ba tosho, yaga gwɔ̀m de yin pyɛ min yin a kasa mo. Ko Dagwi Darwey a rɔda to ba wok sesin min wɛt.”

¹⁹Ko bemat ba kyɛ́ ɛn nà wok hâ Samwɛl, ba ye, “Ko mwa ano, wot e simo, wot di gwɔ̀m e tē mot,

²⁰na wot sè tyɛng na bwâng bemât bavwel! Tik na gwɔ̀m mot a re negwɔm e ra wot, na a kyè e nuyel mot vɔk e de como, na a tó a wot como arɔng.”

²¹Jeng de Samwɛl a ga wok pyɛ́ yane mwa, a to wɔ̀ misang yɛ̄ e betong Dagwi Darwey.

²²Ko Dagwi a yang ɛ, “Wok ha mɛn, na hwo nɔng ɛn gwɔ̀m o.” Samwɛl kwong a yâng BeIsrayɛl, “Kawɛ mwat a toyo vɔk e repomo mɛ.”