Read berom 1 Samwɛl 9 Bible Online

1 Samwɛl 9 - berom bible

1 Samwɛl 9

¹Hwak à mwat á sè darwey e ji yerê Bɛnyamin de ba tang ɛ, à Kish. Da mɛ, à Abiyɛl Zɛrɔr yi e lɔ BeKorat e ruhûp Afiya.

²A vɔk hwey de reza mɛ, à Saul. Saul á sè zɛrɛ̂ mwat tyɔng o wɛt. E ji BeIsrayɛl vit a mwat de a wul ɛ na nerat, ko vit a hwak de a to wul ɛ na nelis arɔng a dal ɛn mwa yi e batô vɔ.

³Tuhak bemadûng Kish behak ba vuru hɛn, ko a hwo yâng Saul, “Jut mwat gwining e ji bemât fwom, na a wɔ̀ sɛlɛ hwo na jamâ bemadung mo.”

⁴Yɛn a hwo sogo, ba kyè, ba wɔ̂ jama e bak bahwôl Ɛfrayim, ba kwey e bak vwêl Shalisha, ko ba ka sɛ̀ vɛ wɛt. Yɛ a kyè vɔk e vwêl Shalim, ba tɔk to sɛ̀ vɛ e hwomo arɔng wɛt. Yɛn a kwey e ji vwêl Bɛnyamin, ko ba tɔk sɛ̀ vɛ e hwomo arɔng wɛt.

⁵Sede yɛn a wɔ̀ wul vwêl Zuf, ko Saul a yâng mwât fwom mɛ de a sé tanga yɛ, “Wot toyo hot vɔk e lɔ. Yaga da hom ê ka tik nà sap hâ bemadung, na a hwo sap e ra wot.”

⁶Ko mwât fwom mɛ a hwo yang ɛ, “Mwât Dagwi hwak a sé e ji repomo remo, womo de bemat be nɔngɔs hɛ nerey. Kayɛ pyɛ de a há, ko ye sè tyɛng. Tik na wot wɔ̀ rangal hɛ, gyeng rɔ̌ a rɔda há a wot gwong de wot ê kwey ɛ.”

⁷Saul a rangal hɛ, a ye, “Ka sede wot a wɔ́, ko wot a rɔda nɔng ɛ sɛ́ ɛ? Di, pyɛ̂ re mot de wot á vɔk, ya ga tala hɛ. Wot a ka vɔk pyɛ cak de wot ê nɔng ɛ wɛt, kɛ ala ɛ?”

⁸Mwât fwom o a ye, “Di, ma vɔk kedyam pyɛng. Ma rɔda nɔ́ng ɛ, na a ha a wot mɛ kwɔn de wot ê tɔk sɛ̀ ɛ vɛ.”

⁹Saul a yang ɛ, “A sé naka, tik na wot wɔ́.” Yɛn a kyè wɔ e repomo de mwât Dagwi o a sé ɛ. Jeng de yɛn a sé turus e rahwol vɔk e repomo mo, yɛn a man na behwong behak, be kyè wɔ̀ vo nshi. Yɛn a rangâl behwong o, ba ye, “Mwât bɛrɛng a sé e ji repomo arɛt?” Di, e jeng yane ba yishi zarap Dagwi, à mwât bɛrɛng. Yaga ano, ka sede mwat e simo, na a rangâl Dagwi pyɛ cak, ko a rɔda ye, “Tik na wot wɔ́ na mwât bɛrɛng”.

¹²Behwong o ba yang ɛ, “Ey, mwin, a wane a sé kwey e nuyel mō. Ra in ziri, yaga a sé pomos yunung zɔng, yaga bemat ba sé nára nɔrɔ̂ yas de be yɛt vɔk na Dagwi e kwɔ̂n rê fongol yunung.

¹³Remo de yin a yel e ji repomo, yin a rɔda sɛ̀ ɛ gyam na a tút vɔk e kwɔ̂n rê fongol, na a wɔ̀ re pyɛ́. Yaga bemat ba rɔda hwo re wɛt, sɛ̌ a ga vey, yaga a sé gbing-gbing, na a tɛ̀ nerat e ra nɔrɔ e ngyen. A sé e bama de a ra ano de bemat de ba rini hɛn ba rɔda hwo re. Ra in ziri, ko yin a rɔda sɛ̀ ɛ.”

¹⁴Ano kwong, yɛn a re nuyel na turus vɔk e repomo mo. Jeng de yɛn a sé yel, ko ba di Samwɛl a sé nusu, a sé kyè wɔ̀ tut vɔk e kwɔ̂n rê fongol.

¹⁵Á sè nayos o, Dagwi Darwey a ga kana ha a Samwɛl, a ye,

¹⁶“Jeng ano nahwol ma rɔda tomo a hwo na mwat yi e ji yerê Bɛnyamin. Shushu hɛ na něy, na a tɛ́ ɛ mwât nuyêl bemat hom BeIsrayɛl. Yɛ a rɔda sey ɛn yi e vwɔ̂ BeFilisti, yaga ma ga di reyɔ̂m bemat hom, ma ga wok sesin mɛn.”

¹⁷Jeng de Samwɛl a di Saul, ko Dagwi Darwey a yang ɛ, “Mwat a womo de ma ga ha a hwo reha mɛ. Yɛ wɛ de a rɔda re negwɔm e ra bemat hom.”

¹⁸Saul a hwo kyè wɔ̀ man na Samwɛl e rwi repomo, a hwo yang ɛ, “Gabɔk wɛt, ha a me, lɔ mwât bɛrɛng ha sé e gwa ɛ?”

¹⁹Samwɛl a toyo a yɛ, a ye, “E me wɛ, ma sé mwât bɛrɛng o. Kyè a wot wɔ̀ tut e kwɔ̂n rê fongol. Yin a rɔda re pyɛ́ tanga me yunung. Ko nahwol gasi me ba ha a hwo yɛnɛ̂ pyɛ́ de hwô rangal me, na me de tɛ̀ in e gwong.

²⁰Rehâ bemadung mō vane de ba vuru hɛn nepɔlɔ netat de na kwey, hwo kwon sap wɛt, yaga ba ga sɛ̀ vɛ. Di, neyey BeIsrayɛl mwa na sé e ra hwo na lɔ̂ da mō.”

²¹Saul a hwo yang ɛ, “Hwà tɔk, ma sé mwat yi e yerê Bɛnyamin yemo de ya dal na necereng e ji Israyɛl wɛt a? Ruhûp lɔ da hom mwa gwa dal na nesɛl e ji rùhup yerê Bɛnyamin. Yerê hihɛ ha a hane de hwà ha a me ano ɛ?”

²²Ko Samwɛl a kyè na Saul tanga mwât fwom mɛ, a yel na yɛn e ji gwoduk kwɔ̂n rê fongol. A hwo nɔng ɛn kwɔ̂n sangal rey e ji bekɛnɛt de ba rini hɛn. Ba sé sede kuru batat.

²³A yâng mwât kyeres pyɛ́, “Vey a me na dem nama hane de má gà nɔng o, ma yang o, hwo tik hɛ detu.”

²⁴Mwât kyerês pyɛ́ mo a hwo vey na fwâ nama mwa na nama lis hê ma mo, a tɛ̀ e nuyêl Saul. Ko Samwɛl a ye, “Di, nama ma hemo de ba ga tik a hwo. Re, ba tik a hwo, yi e jeng de má gà ye, ma vɔk bekɛnɛt.” Saul kwong a re pyɛ́ tuk hane tanga Samwɛl.

²⁵E bama mo, yɛn a gyirik yi e kwɔ̂n rê fongol vɔk e ji repomo, ko ba tút vɔk e ragyip duk. E hwomo Samwɛl a ha na Saul,

²⁶ko Saul a pɔl e hwomo. Rwa hwol gasi, Samwɛl a hwo yishi Saul yi e ra duk, a yang ɛ, “Sene! Sogo, vey na me tɛ̀ o e gwong, na hwo kyè.” Saul a hwo sogo, a gyirik, ko yɛn a kyè tanga Samwɛl vɔk e gwong.

²⁷Jeng de yɛn a wɔ̀ wul yɛnɛ̂ repomo, Samwɛl a yang ɛ, “Yâng mwât fwom mō, a ka kyè. Kā gyéng e ngyen, mê ha a hwo pyɛ de Dagwi a ga ha a me.” Ko mwat o a hala hɛn.