Read bura-pabir Baɗitari 1 Bible Online

Baɗitari 1 - bura-pabir bible

Baɗitari 1

¹Akwa baɗitər su, antə Hyel alaktə vəi na amta ka duniya,

²Duniya ni kula dludzi, tsuwa kula su akwa, tsuwa kuthlu an hartə kəra yimayeri na zurang ni. Mambələr Hyel tsuwa akwa mwa ata kəra yimayeri.

³Antə Hyel pəla, “Ndzi ka parakə wutədzi!” Antə parakəu ku wutədzi.

⁴Antə Hyel wuta abbər parakə ni ɓɗaku. Antə tsa ndəkəmta daɓwa parakə ni ka kuthlu ni.

⁵Antə tsa kəga parakə ni “Təpci”, ka kəga kuthlu ni tsuwa “Viri”. Pci ku təri antə viri ku kuri, tsan vir na ntangkəma.

⁶Antə Hyel pəla, “Ndzi ka su laga apa lima wutədzi akwa daɓwa yimayeri ka tsa ndəkəmta daɓwa yimayeri ni.”

⁷Antə Hyel ku namtə su na apa lima ni, ka ndəkəmta daɓwa yimayeri na akira lima ni ka yimayeri na amtari. Tsuwa apani antə ku hara.

⁸Antə Hyel kəga thləma su na apa lima ni “Kutahyel”. Pci ku təri antə vir ku kuri, tsan vir na suɗkur.

⁹Antə Hyel pəla, “Ndzi ka yimayeri na akira kutahyel ni tsaptədzi ata vəi duku, kamnyar ka di ul'ula wutədzi.” Tsuwa apani antə ku hara.

¹⁰Antə Hyel kəga thləma vəi na ul'ulari ni “Di”, ka kəga thləma yimayeri na tsaptədzi ni “Manda”. Antə Hyel wuta abbər ku hara ɓɗaku.

¹¹Antə Hyel ku pəla, “Ndzi ka di ptsantə su ptsəptsa na ata ya, shanga su ptsəptsa na ata di na ana ya munya, ka shanga nfwayeri na ata ya ka munya akwa kutari kəlara nfwa ka jili yar ɗa.” Tsuwa apani antə ku hara.

¹²Antə di ku ptsantə su ptsəptsa, su ptsəptsa zumzum hang na ata ya waskəi ka jiliyir ɗa. Antə Hyel wuta abbər ku hara ɓɗaku.

¹³Pci ku təri antə vir ku kuri, tsan vir na makərkur.

¹⁴Antə Hyel pəla, “Ndzi ka parakayeri wutədzi akwa kutahyel, ka da ndəkɓəla daɓwa pci ka viri, tsuwa ka da ndzi seɗa ar ncantə sakayeri, ka virayeri, ka məvayeri.

¹⁵Ka da ndzi parakayeri amta akwa kutahyel, ka da hamta parakəu ata kəra duniya.” Tsuwa apani antə ku hara.

¹⁶Apani Hyel ku namtə parakayeri ol'ola suɗa, ka parakəu na olari hara kuthlikur təpci, ka parakəu na rakari hara kuthlikur aviri, tsuwa tsa ku namtə sasəlkayeri.

¹⁷Antə Hyel pwi ɗa amtazi ata kutahyel, kamnyar ka da mbəla ata kəra duniya,

¹⁸ka da hara kuthlikur təpci ka aviri, tsuwa ka da ndəkɓəla daɓwa parakəu ka kuthlu. Antə Hyel wuta abbər ku hara ɓɗaku.

¹⁹Pci ku təri antə vir ku kuri, tsan vir na nfwarkur.

²⁰Antə Hyel pəla, “Ndzi ka yimayeri nghyi ka bəri ar su na ka mpika, ka ɗikayeri nghyantə kutahyel akwa fəla ata kəra duniya.”

²¹Apani antə Hyel ku alaktə mwaɓiyayeri na ol'ola ar kuta yimi, ka shanga su na ka mpika na ana mwa akwa yimi ka jiliyir ɗa, ka shanga jili ɗikayeri na aɗi. Antə Hyel wuta abbər ku hara ɓɗaku.

²²Antə Hyel vədzə barka ala ɗa shang, akwa pəla, “Ka giri ya ka giri yatədzi hang, ka giri nghyantə mandayeri ka ɗikayeri yatədzi ata kəra duniya.”

²³Pci ku təri antə viri ku kuri, tsan vir na ntəfkur.

²⁴Antə Hyel pəla, “Ndzi ka duniya haɓəla suayeri na ka mpika shang, mwaɓi kəi, kəga mwaɓi mtaku, ka suayeri na ana mwa ka yimər kuta ɗa ata di, kəga jiliyir ɗa.” Tsuwa apani antə ku hara.

²⁵Antə Hyel namtə mwaɓiyayeri ar mtaku na akwa duniya, waskəi ka jiliyir ɗa, ka namtə mwaɓiyayeri ar kəi, kəga jiliyir ɗa, ka shanga su na ana mwa ka yimər kutari ata di, kəga jiliyir ɗa. Antə Hyel wuta abbər ku hara ɓɗaku.

²⁶Antə Hyel pəla, “Ndzi ka mwa namtə mda akwa dludzər mwa, ka apa mwa. Ka da hara kuthlikur ata kəra kəlfayeri na akwa manda, ka ata kəra ɗikayeri na ata kutahyel, ka ata kəra mwaɓiyayeri ar kəi, ka ata kəra shanga duniya, ka shanga su na ana mwa ka kutari ata di.”

²⁷Antə apani Hyel ku alaktə mda akwa dludzər ni, akwa dludzər Hyel, antə tsa ku alaktə ni, mdə sal ka mdə mwala, antə tsa alaktə ɗa.

²⁸Antə Hyel ku vədzə barka ala ɗa ka pəla, “Ka giri ya ka giri yatədzi hang, ka giri nghyantə duniya, ka tsa ndzi akira giri, ka giri hara kuthlikur ata kəra kəlfayeri na akwa manda ka ata kəra ɗikayeri na ata kutahyel, ka shanga su na ana mwa ata di.”

²⁹Antə Hyel pəla, “Nggədza, I ku hamta ala giri shanga su ptsəptsa na ana ya munya, na ata ptsa ata kəlara bwar akwa duniya, ka shanga nfwayeri na ana ya ka munya akwa kutari, shanga ɗa ata ndzi susəma ala giri.”

³⁰Amma aka shanga mwaɓi na akwa duniya, ka shanga ɗikayeri na ata kutahyel, ka shanga su na ana mwa ka yimər kutari ata di, ka shanga su na ka mpika I ku hamta ala ɗa shanga thlali na miraku ka da ndzi susəmər ɗa. Tsuwa apani antə ku hara.

³¹Antə Hyel ku wul shanga suayeri tə tsa namtə ni, ka wuta abbər ku hara ɓɗaku ka duna Pci ku təri antə vir ku kuri, tsan vir na ngkwakur.