Read bura-pabir Baɗitari 11 Bible Online

Baɗitari 11 - bura-pabir bible

Baɗitari 11

¹Akwa saka na ndaga shanga mjir duniya ni ka mnyar ɗa duku, tsuwa lakur gari arɗa shang duku.

²Apatə mji ni akwa ɗu ka mwari təbwar raghəi, antə da ku sə si akwa bəbal laga akwa Shinar ka ndzəndzi anda.

³Antə da pəla aka nvwa ɗa, “Asər giri ka mburu tsa birku ka mburu mbangkər u'u ka thləlɓəla ni ɓɗaku.” Antə da ku hara kəthlər ka birku ni ata vəya pela, ka kəthlər ka kwalta ata vəya həi.

⁴Antə da pəla, “Asər giri ka mburu həntə bərni aka kər mburu, ka mburu həntə hən na nal na ata tsəkwar hyel, kamnyar ka mburu hara thləm, kamnyar ta mburu asə titiləmtadzi ata kəra shanga duniya.”

⁵Antə MTHLAKU ku səghəi kamnyar ka tsa wutə bərni ka hən na nal tə mji akwa hənari ni.

⁶Antə MTHLAKU pəla abbər, “Nggədza shanga mji ngəni su duku, tsuwa shanga ɗa mnyar ɗa duku. Tsuwa ngəni an su tə da baɗitə harari ma daci. Ngəni ku ncanta abbər su aɗi tə da pəla da ata harari ka suari mula ala ɗa wa.

⁷Mbura ləghəi ka mburu shushwantə mnyar ɗa, tə da aɗi ata mzhi nggatə mnyar nvwa ɗa kəra wa.”

⁸Apani antə MTHLAKU ku titiləmta ɗa ciju ata kəra shanga duniya, antə da ku zhar hən bərni ni.

⁹Kamnyar ngəni antə mdə ku kəga thləma bərni ni Babila, kamnyar anda antə MTHLAKU ku shushwanta shanga mnyar mjir duniya. Anda antə MTHLAKU titiləmta ɗa akwa kəlara bwayeri na ata kəra duniya.

¹⁰Nayeri ni an labar ar mjir nyarmbwar Shem. Sakatə Shem ku hara məva aru pal antə tsa yaɓəla ɓzərni ka vəta alari thləm abbər Arpakshad, məva suɗa aghəla yimər avava ni.

¹¹Antə Shem ku jaktə hara məva aru ntəfu aghəla tə tsa yaɓəla Arpakshad, ka wutə maɗankyar damwa shili ka mwanki.

¹²Sakatə Arpakshad ka məvari makkumari ka ntəfu, antə tsa yaɓəla ɓzərni ka vəta alari thləm abbər Shela.

¹³Arpakshad ku jaktə hara məva aru nfwar ka makər aghəla tə tsa yaɓəla Shela, tsuwa tsa ku wutə maɗankyar damwa shili ka mwanki.

¹⁴Sakatə Shela ka məvari makkumari antə tsa yaɓəla ɓzərni ka vəta alari thləm abbər Eber

¹⁵Shela ku jaktə hara məva aru nfwar ka makər aghəla tə tsa yaɓəla Eber, tsuwa tsa ku wutə maɗankyar damwa shili ka mwanki.

¹⁶Sakatə Eber ka məvari makkumari ka nfwar antə tsa yaɓəla ɓzərni ka vəta alari thləm abbər Peleg.

¹⁷Antə Eber ku jaktə hara məva aru nfwar ka makkumari aghəla tə tsa yaɓəla Peleg, tsuwa tsa ku wutə maɗankyar damwa shili ka mwanki.

¹⁸Sakatə Peleg ka məvari makkumari antə tsa yaɓəla ɓzərni ka vəta alari thləm abbər Reyu.

¹⁹Antə Peleg ku jaktə hara məva aru suɗa ka əmdla aghəla tə tsa yaɓəla Reyu, tsuwa tsa ku wutə maɗankyar damwa shili ka mwanki.

²⁰Sakatə Reyu ka məvari makkumari ka suɗa antə tsa yaɓəla ɓzərni ka vəta alari thləm abbər Serug.

²¹Antə Reyu ku jaktə hara məva aru suɗa ka murfa aghəla tə tsa yaɓəla Serug, tsuwa tsa ku wutə maɗankyar damwa shili ka mwanki.

²²Sakatə Serug ka məvari makkumari antə tsa yaɓəla ɓzərni ka vəta alari thləm abbər Nahor.

²³Antə Serug ku jaktə hara məva aru suɗa aghəla tə tsa yaɓəla Nahor, tsuwa tsa wutə maɗankyar damwa shili ka mwanki.

²⁴Sakatə Nahor ka məvari sərkumari ka əmdla antə tsa yaɓəla ɓzərni ka vəta alari thləm abbər Tera.

²⁵Antə Nahor ku jakə hara məva aru pal ka kumnya əmdla aghəla tə tsa yaɓəla Tera, tsuwa tsa ku wutə maɗankyar damwa shili ka mwanki.

²⁶Aghəla tə Tera ku hara məva murfəkumari antə tsa yaɓəla Ibram, Nahor ka Haran.

²⁷Ngəni an labar ar mjir nyarmbwar Tera. Tera an yaɓəla Ibram, ka Nahor, ka Haran. Antə Haran an yaɓəla Lot.

²⁸Haran ku mti ɗəm ta baba'ni, tsu akwa Ur ar Kaldiya, bərni tə mdə ya ni akwa.

²⁹Antə Ibram ka Nahor ku kəl mwanki. Ar Ibram thləma mwalarni an Saraya, ar Nahor tsuwa thləma mwalarni an Milka, ngkwar Haran na baba' Milka ka Yiska.

³⁰Saraya aɗi ka ɓzər wa, tsa mwalaciri.

³¹Antə Tera ku kətə ɓzərni Ibram, ka kəkarni Lot na ɓzər Haran, ka Saraya na mwalar ɓzərni, ka mwalar Ibram. Antə shanga ɗa ku təra kazhar Ur na akwa tsəɗi Kaldiya ka mwari akwa tsəɗi Kanana. Amma sakatə da ku mzhitə Haran, antə da ndzəndzi anda.

³²Hangkur məvar Tera an aru suɗa ka ntəfu. Antə tsa ku mti akwa Haran.