Read bura-pabir Baɗitari 16 Bible Online

Baɗitari 16 - bura-pabir bible

Baɗitari 16

¹Akwa saka ndaga Saraya na Mwalar Ibram aɗi yaɓəla alari maɗankyar wa. Amma tsa ka ngkwarmbwarni laga na ngkwar Masar na ka thləmari Hagar.

²Antə Saraya pəla aka Ibram, “Nggədza MTHLAKU ku ngkata ali ya maɗankyar. Antə ləmbwa adzə ngkwarmbwarna ni, nuhum tsa awuta ali maɗankyar.” Tsuwa Ibram ku dlu sauriyir mwalankiɗa Saraya ni.

³Apani aghəla tə Ibram ku ndzi məva kuma akwa tsəɗi Kanana, antə Saraya na mwalankiɗa ni ku kətə Hagar na ngkwar Masar, na ngkwarmbwarni ni, ka hamta ni aka salngkiɗa Ibram ka tsa ndzi mwalarni.

⁴Antə Ibram ku ləmbwa adzə Hagar, antə Hagar ku kətə hur. Antə sakatə tsa wuta abbər tsa ka hur, antə tsa baɗitə rutə Saraya na marmbwarni.

⁵Antə Saraya pəla aka Ibram abbər, “Shang mnya ɗimi ngəni akwa wutə ra ni thlata akəla ga! I an hamta ngkwarmbwarna ala gə kə gə ləmbwa adzə ni. Amma sakatə tsa ku wuta abbər tsa ka hur, təng təkəma tsa baɗitə wul ra ka ncar ruta. Ka MTHLAKU an hara shariya akwa daɓwa mwa ka ga.”

⁶Amma Ibram pəla aka Saraya, “Ai tsa mafar nga, tsa akira ga. Hara alari kəlara su tə gə wutə kalkal ala ga.” Antə Saraya ku nar bwani ka duna, har tə tsa ku hwi ka təra kazhar ni.

⁷Antə mdərthlentərhyel ar MTHLAKU ku wutə Hagar adzə kucirkila laga akwa mtaku, kucirkila na ata lakur Shur.

⁸Antə mdərthlentərhyel ni pəla, “Hagar ngkwarmbwar Saraya, gə thlata ama ri, tsuwa ga ata mwari ama ri?” Antə tsa pəla, “I akwa hwi ta marmbwarna Saraya.”

⁹Antə mdərthlentərhyel ar MTHLAKU pəla alari, “Ngka adzə marmbwar nga ka gə hamta kər nga alari.”

¹⁰Antə mdərthlentərhyel ar MTHLAKU ni pəla alari, “I ata hara ka kəkayeri ar ngə yatədzi dlama dlama har tə mda amzhi jikatə ɗa wa.”

¹¹Antə mdərthlentərhyel ar MTHLAKU ni pəla alari, “Nggədza kulini gə ka hur, tsuwa ga ata yaɓəla ɓzər sal, ga ata vəta alari thləm Ishmayel, kamnyar MTHLAKU ku nggatə tuwar bwaniyir nga.

¹²Amma ɓzər ngə ni ata ndzi mdə msərmsəra apa kwarar mtaku, tsa ata ndzi dawar kəlara mda, antə kəlara mda ata ndzi dawarni. Tsa ata ndzi akwa mpa ka shanga maɗama'ni.”

¹³Antə tsa vətə thləm aka MTHLAKU na gari alari ni abbər, “Ga an Hyel na ana wutə ra”, kamnyar tsa pəla, “Kulini I ku wutə tsa na ana wutə ra.”

¹⁴Antə apani mji ana kəga vəi kucirkila ngəni abbər Beyer Lahai Roi, tsuwa tsa tsu anda akwa daɓwa Kadesh ka Bered.

¹⁵Antə Hagar ku yaɓəla ɓzər sal aka Ibram. Antə Ibram vətə thləm aka ɓzərni abbər Ishmayel.

¹⁶Ibram ka məvari nciskumari ka ngkwa sakatə Hagar yaɓəla alari Ishmayel ni.