Read bura-pabir Baɗitari 19 Bible Online

Baɗitari 19 - bura-pabir bible

Baɗitari 19

¹Antə mjirthlentərhyel na suɗə ni ku mzhitə Sodom ka mnya tahaku, sakatə Lot andzəndzi anyarfur bərni Sodom. Sakatə Lot wutə ɗa, antə tsa thlatə kara thlakəma ɗa, ka zuzuri ka kəmari ata di akəma ɗa,

²ka pəla, “Mji ol'ola, pəra giri bu usa, akwa kəyir mafar giri. Sər giri ka giri kəcimta səla giri, ka giri pi. Ma viri ku kuri ɗəɗəpə mbing, giri ata mzhi thlatə ka ləkəma ka mwar giri.” Amma da pəla, “Awa, yeru ata pi akwa bəbalər kuta di.”

³Amma tsa ndzangkir kiɗə kəra ɗa, antə da ku pəra ka ləvəi aharngkiɗa. Antə tsa ɗəmha ala ɗa susəmər kucali. Tsa ɓwata ala ɗa buradi kula yist, antə da kwasa.

⁴Amma akəmata da apəpəi ka heni, təng mji shilər kuta di Sodom ni, maɗadakwi kəga mji halhala shang, ku si ka kalaktə kəi ni.

⁵Antə da haptə kuraku ka pəla aka Lot, “Mji na səvi aharngkiri aviri ni ama ri? Səɓəla ka da ala yeru, ka yeru pi ka da!”

⁶Antə Lot ku səɓəla anyarfu, ka hartə nyarfu ni abwahilari, ka mwari adzə ɗa,

⁷ka pəla ala ɗa, “I akwa kiɗə kəra giri maɗama'na, giri aɗiya hir ka giri hara ɗimikur apani wa.

⁸Nggədza I ka maɗankwi suɗa na aɗi səndə sal wa, ndzi kəi səntə ɗa ala giri aɓəla, ka giri hara kəlara su tə giri hira ka da. Amma usa, giri aɗiya tsəkwar mji nayeri ni wa, kamnyar da mətəpiyirna, antə tar kəi ɓəlatə lapiyakurər ɗa.”

⁹Amma da pəla, “Sharardzi adzə!” Antə da pəla aka nvwa ɗa, “Mdə ngəni mətəpi, amma təkəma tsa akwa bara ndzi alkali! Diya yeru ata hara ala gə su na ɗimi ta su tə yeru ata hara ala ɗa ni.” Təng təkəma da ləkwa bukə Lot, akwa shahədzi adzə nyarfu ni ka da ɓələmta.

¹⁰Amma mətəpiyayeri na suɗə ni ku ha tsiya ɗa, ka ndəkərvi Lot, ka hartə nyarfu ni.

¹¹Antə mətəpiyayeri ngəni suɗə ni ku tsa mji na akwa nyarfu ni ka mdlyangkur, antə shanga ɗa, ol ka ntsaha, ku ghərantə kərɗa gapani akwa tətəm bwa tə nyarfu ni ata.

¹²Antə mətəpiyayeri ni pəla aka Lot, “Gə ka mdə damwa na ar nga azi ya? Wala salngkwayeri, wala maɗashilər nga, wala maɗa'nga na maɗankwi, wala mdə laga ndzang na ar nga akwa kuta bərni ni. Ma aɗi ka gə fwaɓəla ɗa.

¹³Kamnyar yeru ata shamta bərni ngəni, kamnyar tuwar mji ata kəra ɗimikur bərni ngəni ku hara hang kamta akəma MTHLAKU. Antə MTHLAKU ku thlentə yeru ka yeru sə shamta bərni ngəni karkar.”

¹⁴Antə Lot ləɓəla ka ra pəla aka maɗadakwi na akwa bara kəl maɗa'ni ni abbər, “Thlatə giri, ka giri ləɓəla kazhar vəi ni, kamnyar MTHLAKU akwa bara shamta bərni ngəni.” Amma təng da kəta abbər tsa akwa gyali ala ɗa.

¹⁵Sakatə viri abaka kura, antə mjirthlentərhyel ndzangkir aka Lot akwa pəla alari, “Mwa kara kətə mwalankiri, ka maɗa' nga na maɗankwi suɗa azi ni, ta mda asə kurəmta giri akwa sakatə mda akwa shamta bərni ni.”

¹⁶Amma təng tsu Lot akwa hara su tihtihha, antə mjirthlentərhyel ni tamtə tsiyari, ka mwalarni, ka tsiya maɗa'ni na maɗankwi suɗə ni, ka ləɓəla ka da ata hildi, kamnyar tə MTHLAKU ku kətadzə ni.

¹⁷Sakatə da ku səɓəla ka da, antə da pəla ala ɗa, “Hwi giri ka giri msərantə mpika giri, tsuwa giri aɗiya wul bwahila giri wa, wala thləthlata akwa kəlara vəi akwa mular ni wa. Hwi giri ka giri ləkwa garayeri, ta mda asə shamta giri.”

¹⁸Antə Lot pəla ala ɗa, “Awa, mji ol'ola, aɗi apani wa!

¹⁹Nggədza I na mafar nga ku kurtə wutə mdəkur ata nca ga, tsuwa ga ku ncanta ali hirkur na ola tə ga ku mbantə mpikəi ni. Amma I amzhi mwari akwa garayeri na ciju ni wa, kamnyar asar ngəni ata sə kəli ra, kəi mta.

²⁰Ai nggədza di na kudzəhari tə I ata mzhi hwi ka mwari akwa, tsuwa di na raka. Ndzi kəi hwi mwari anda kəi msərantə mpikəi. Ai ga akwa wulari tsa di na raka, antə mpikəi ata msəra.”

²¹Antə tsa pəla alari, “To daci, I ku zhar nga ka gə mwari anda, tsuwa I aɗi ata shamta di ngəni tə gə pəla ni wa.

²²Hangkər ja! Hwihwi, kara hwi mwari anda! Kamnyar sai ma sakatə ga ku mzhitə vəi ni, kambəla I baɗitə hara su.” Apani antə thləma di ngəni ku ndzi Zowar, watau raka.

²³Akəmata Lot amzhətə Zowar, pci ku kurtə səɓəla.

²⁴Antə MTHLAKU ləkwa pungkər aka Sodom ka Gomora, u'u ka u'u na mwapu na akwa thlata amtazi.

²⁵Antə tsa mbamta bərniyayeri ni japu, ka shanga mji na akwa, ka shanga kuta mular ni, ka shanga su ptsəptsa.

²⁶Amma mwalar Lot na abwahilari ku wul bwahili, antə tsa ku ndzi pelar una.

²⁷Ar Ibrahim tsa təra təng ɗəɗəpə mbing, ka mwari akwa vəi tə tsa thləthlatə tə da gari ka MTHLAKU ni.

²⁸Antə tsa wul abwar Sodom ka Gomora, ka abwar shanga bəbalər tsəɗi ni, ka wutə ɗerər tsəɗi ni akwa ləmta aharhyel apa ɗerər u'ur mtaku.

²⁹Apani antə su ni ku hara, abbər sakatə Hyel akwa mbamta shanga bərniyayeri na akwa mular, akwa vəi tə Lot ka ndzəndzi akwa, antə tsa ɗangtə Ibrahim, ka kəɓəla Lot kazhar asar ni tsuwa, hwatu.

³⁰Antə Lot ka maɗa'ni na maɗankwi suɗə ni ku ləɓəla kazhar Zowar, ka mwari ra ndzəndzi akwa garayeri, kamnyar tsa akwa thlivər ndzəndzi akwa Zowar ni. Antə tsa ka maɗa'ni na maɗankwi suɗə ni ku ndzəndzi akwa ku laga.

³¹Antə ngkwarni na yarakəma ni pəla aka na ntsahari, “Baba mwa ku hali, tsuwa mdə sal aɗi na ata si kəl mwa apatə mji ana hara akwa duniya ni wa.

³²Antə sər ka mwa vu baba' mwa akwa sa yimər anap, ka mwa pi ka tsa, kamnyar ka mwa mzhi yaɓəla alari kəkayeri.”

³³Antə da vu baba' ɗa tə tsa sa yimər anap tsu vir nda aviri. Antə ngkwa na yarakəma ni ku ləmbwa adzə baba'ni ka pi ka tsa. Amma baba'ni aɗi sənda abbər ngkwarni ni ku pəpəi adzə ni ka thlatə wa.

³⁴Səɓəla ɗəpari, ngkwa na yarakəma ni pəla aka na ntsahari ni, “Diya naha aviri I ku pi ka baba'na. Antə ndzi ka mwa vu ni ka tsa sa yimər anap ni ashina aviri ka damwa, ka gə mwari adzə ni aviri ka ra pi ka tsa, kamnyar ka mwa mzhi yaɓəla kəkayeri.”

³⁵Apani antə da ku vu baba' ɗa tə tsa ku sa yimər anap ni vir nda aviri ka damwa. Antə ngkwa na ntsahari ni ku ləmbwa adzə ni ka pi ka tsa. Amma baba'ni aɗi sənda abbər ngkwarni ku pəpəi adzə ni ka thlatə wa.

³⁶Apani antə maɗa' Lot na maɗankwi japu ku kətə hur ka baba' ɗa.

³⁷Ngkwa na yarakəma ni ku yaɓəla ɓzər sal ka vəta alari thləm Mowab. Tsa an ndzi kəkar shanga mjir Mowab har ba ashina.

³⁸Ngkwa na ntsahari tsuwa ku yaɓəla ɓzər sal ka vəta alari thləm Benammi. Tsa an ndzi kəkar shanga mjir Ammon har ba ashina.