Read bura-pabir Baɗitari 2 Bible Online

Baɗitari 2 - bura-pabir bible

Baɗitari 2

¹Apani antə mdə ku kuri namtə vəi na amtazi ka duniya, ka shanga suayeri na dlama dlama na akwa.

²Akəmata vir na murfəkur Hyel ku kuri kəthlər arni, antə tsa zhar kəthlər akwa vir na murfəkur.

³Tsuwa Hyel ku vədzə barka aka vir na murfəkur ni, ka namtə ni tə tsa ndzi ɓɗakkarkara, kamnyar vir nda antə Hyel zhar kəthlər ar alaktə su.

⁴Ngəni an labar ata ata ar laku tə vəi na amtazi ka duniya ku alaktədzi akwa. Sakatə MTHLAKU na Hyel alaktə vəi na amtazi ka duniya,

⁵su ptsəptsa wala thlali aɗi ptsa akwa mtaku katagu wa, kamnyar MTHLAKU na Hyel aɗi vu ka yimi təra ata di katagu wa, tsuwa mda aɗi na ata kəthlər tsuhwa ata di ni wa.

⁶Amma yimi ana səɓəla akira di ka tsa ləɓantə shanga kəra di.

⁷Antə MTHLAKU na Hyel ku kətsə bərbər ata di ka namtə mdə sal kəgari, ka fiu shambar ar mpika akwa kucirari, antə mdə ni ku ndzi ka mpika.

⁸Antə MTHLAKU na Hyel ku thləkamta hwulfər nfwayeri akwa gadina laga abwar raghəi na ka thləmari Eden, ka vu mdə natə tsa namtə ni akwa gadina ni.

⁹Antə MTHLAKU na Hyel ku vu tə shanga nfwayeri na ɓɗakɓɗaku aka nca, ka na ɓɗakɓɗaku kamnyar susəma, ata kəma duku ka nfu laga ar vu ka mdə səndə su na ɓɗaku ka su na ɗimi, ku ptsi akwa di ka kəla.

¹⁰Tsuwa thlyagha laga aɗi na thlata akwa gadinar Eden ni, na akwa hamta yimi aka gadina ni, anda antə tsa ndəkəidzi ka ndzi thlyagha nfwar.

¹¹Thləma thlyagha na ntangkəma ni an Pishon, tsa an kalaktə shanga tsəɗi Havila, tsəɗi tə mda ana wutə dinar akwa.

¹²Tsuwa dinar ar tsəɗi ngəni an dinar na ɓɗakari. Tsuwa mda ana wutə sur shiwura na msəra tə mda ana kəga bdelliyum ka pelayeri ar dəɓa tə mda ana kəga oniks anda.

¹³Thləma thlyagha na suɗkur an Gihon, tsa an kalaktə shanga tsəɗi Kush.

¹⁴Thləma thlyagha na makərkur ni an Tigris, tsa an akwa hwi təbwar raghəi ar tsəɗi Assiriya. Tsuwa thləma thlyagha na nfwarkur ni an Yufiretis.

¹⁵MTHLAKU na Hyel ku kətə mdə ni ka vu ni akwa Gadinar Eden ka tsa tsuhwa akwa, ka tsuwa ka tsa wulwula ni.

¹⁶Antə MTHLAKU na Hyel tsawa aka mdə ni abbər, “Ga ata mzhi səm kəlara yar nfwa na akwa gadina ni.

¹⁷Amma nfur səndə su na ɓɗaku ka su na ɗimi ni, ga aɗiya səm wa, kamnyar ma vir tə ga ku səm yarni ni, ga ata mta.”

¹⁸Antə MTHLAKU na Hyel pəla abbər, “Aɗi kalkal ka mdə ni ndzi shini wa, I ata namta alari mdər dlara na ata ndzi kalkal alari.”

¹⁹Apani antə MTHLAKU na Hyel ku kətsə bərbər ata di ka namtə shanga mwaɓiyayeri na akwa mtaku ka shanga ɗikayeri na ata kutahyel kəgari. Antə tsa səntə ɗa aka mdə ni ka tsa wutə jili thləm tə mdə ni ata hamtari aka kəlara akwa nca ɗa. Tsuwa kəlara thləm tə mdə ni ku kəga kəlara su na ka mpikə ni kəgari, apani antə thləma su ni ata ndzəndzi.

²⁰Antə mdə ni ku vətə thləm aka shanga mwaɓiyayeri ar kəi, ka shanga ɗikayeri na ata kutahyel, ka shanga mwaɓiyayeri na akwa mtaku. Amma ar mdə ni, tsa aɗi wutə mdər dlara na kalkal alari wa.

²¹Antə MTHLAKU na Hyel ku vu tə henər mta ku famta mdə ni. Sakatə tsa akwa heni antə Hyel ku kəɓəla pal akwa nca ɗethlayeri ar thlimbəlari, ka dzəɓtə vəyari ka kum.

²²Antə ɗethlər thlimbəl tə tsa kəɓəla ni, tsa namtə mdə mwala kəgari, ka səntə ni aka mdə ni.

²³Antə mdə ni pəla, “Yauwa! Kulini ja antə dludzərna ku wutədzi, tsa an ɗethlu na səɓəla akwa ɗethlər dzi, ka tsuwa kum na səɓəla akwa kumər dzi! Antə mda ata kəga ni mwala, kamnyar akwa dza mdə sal antə mdə kəɓəla ni.”

²⁴Kamnyar ngəni antə mdə sal ata zhar baba'ni ka mama'ni, ka tsa bartə mwalankiɗa antə da ata ndzi su duku.

²⁵Antə sal ni ka mwalankiɗa japwa ɗa dura, amma da aɗi akwa səli nvwadzi wa.