Read bura-pabir Baɗitari 20 Bible Online

Baɗitari 20 - bura-pabir bible

Baɗitari 20

¹Vir laga Ibrahim ku thlata ahar Mamre ka ləkwa lakur mwari abwar tsəɗi Negev, ka ndzəndzi akwa daɓwa Kadesh ka Shur. Tsuwa aghəla nda tsa ku mwari ahar Gerar ka ɗar ndzi anda raka.

²Anda antə Ibrahim pəla abbər Saratu na mwalankiɗa ni ngkwarma'ni. Antə Abimelek na kuthlir Gerar ku thlentə ka mdə səntə alari Saratu.

³Amma Hyel ku mwari adzə Abimelek akwa suni aviri ka pəla alari, “Ga ata mta kamnyar mwala tə gə kətə ni, kamnyar tə tsa mwalar mda.”

⁴Hwatu Abimelek aɗi pi ka tsa katagu wa, antə tsa pəla, “Mthlaku, ga ata kurəmta mji na kula biku ya?

⁵Aɗi Ibrahim ka kərari surni an pəla abbər mwala ni ngkwarma'ni wa ya? Tsuwa aɗi mwala ni ka kərari surni an pəla ali abbər sal ni ɓzərma'ni wa ya? Antə apani tsi ka ɗəffi shang kəcəkəcari ka jirkur.”

⁶Antə Hyel pəla alari akwa suni ni, “I, I ka səndari abbər gə hara ngəni ka nufi na ɓɗakari akwa ɗəffa ga. Tsuwa I an ngkatə nga ta ga ahara biku ali. An su na hara tə I aɗi hir tə gə tsəkwar ni wa ni.

⁷Antə kulini, ngka ka mwala ni aka salngkiɗa, kamnyar sal ni naɓi, antə ma tsa ku hara ala ga adduwa ga ata ndzi ka mpika. Amma ma ga aɗi ngka alari ka mwala ni, ka gə sənda abbər jiri ga ata mta, ga ka shanga mjir nga.”

⁸Antə Abimelək dli thlatə ɗəɗəpə mbing, ka kəga shanga kwakunayeri arni, ka pəla ala ɗa shanga suayeri ngəni, antə mji ni ku thlivər ka duna.

⁹Antə Abimelek kəga Ibrahim ka pəla alari, “Man su tə gə hara ala yeru nə ri? Man su tə I ɓzamta ala gə ri har tə gə ndəkərəngkər biku na ola apani ata kəri ka kuthlikur arna ni? Ga ku hara ali su tə aɗi kalkal ka mdə hara wa.

¹⁰Man tə ga akwa dzamari ri tə gə hara su ngəni ni?”

¹¹Antə Ibrahim pəla, “I ku hara apani kamnyar I akwa dzama abbər mji aɗi ana thlivər Hyel aɗi akwa vəi ngəni wala raka wa, antə I kəta abbər da ata sə tsi ra kamnyar mwalankiya.

¹²Tsuwa ata kəra ngəni ma, jiri tsa ngkwarma'na, tsa ngkwar baba'na, amma mama' yeru aɗi duku wa. Antə I ku kəl ni.

¹³Antə akwa sakatə Hyel ku ndəkəmta ra ka kəyir baba'na, ka vu ra akwa kadla, antə I ku pəla alari, ‘Dlar tə ga ata hara ali akwa kəlara vəi tə mwa ata sə mwari akwa, an ka gə ləkəma ka pəla abbər I ɓzərma' nga.’ ”

¹⁴Antə Abimelek kətə Saratu ka ngka ka tsa aka Ibrahim, ka fatə təmayeri, ka thlayeri, ka mafayeri shili ka mwanki, ka na aka Ibrahim.

¹⁵Antə Abimelek pəla aka Ibrahim, “Nggədza tsəɗiyirna akəma ga, ga ata mzhi ndzi akwa kəlara bwa tə gə hira.”

¹⁶Antə tsa pəla aka Saratu tsuwa abbər, “Nggədza I ata hamta aka ɓzərda' nga adzərfa dəpu pal. Ngəni an seɗa kamnyar ncanta akəma shanga mji na adzə nga abbər ga aɗi ka biku wala raka wa.”

¹⁷Antə Ibrahim ku hara adduwa aka Hyel, antə Hyel ku mbantə Abimelek, ka mbantə mwalankiɗa, ka mafayeri ni na mwanki, antə da ku ya maɗankyar.

¹⁸Kamnyar hwatu MTHLAKU ku hartə shanga vəi ya ar mwanki na akwa kəyir Abimelek ni, kamnyar Saratu na mwalar Ibrahim.