Read bura-pabir Baɗitari 22 Bible Online

Baɗitari 22 - bura-pabir bible

Baɗitari 22

¹Aghəla tə suayeri ngəni ku təramta, antə Hyel ku ngkərtə Ibrahim. Tsa pəla alari, “Ibrahim!” Antə Ibrahim ndəra ka pəla, “Naam, nggədza ra.”

²Antə Hyel pəla, “Kətə ɓzər nga Ishaku, ɓzər ngə na duku ɗeng ni, natə gə hirhirni ni, kara mwari akwa tsəɗi Moriya, ka gə hamta ni saɗaka mbamba, ata kəra pal akwa nca garayeri tə I ata ncanta ala ga.”

³Səɓəla ɗəpari ɗəɗəpə mbing, antə Ibrahim thlatə ka putə libaru ata kwararni, ka fatə mji suɗa akwa nca buɗayeri arni, ka ɓzərni Ishaku. Antə tsa nthlətsə udzəmər hamta saɗaka mbamba ni, ka psi laku kamnyar mwari akwa vəi tə Hyel pəla alari ni.

⁴Akwa vir na makərkur, antə Ibrahim haptə ncari ka wutə vəi ni ciju anda.

⁵Antə tsa pəla aka buɗayeri ni, “Ndzəndzi giri azi kəga kwara ni. Ar yeru ka ɓzər ni, yeru ata ləkəma anda ka yeru vəngkər səli aka Hyel, kambəla yeru ngka adzə giri.”

⁶Antə Ibrahim ku kətə udzəm ar hamta saɗaka mbamba ni, ka vəngkər aka ɓzərni Ishaku. Antə arni tsa kətə u'u ka ingdla. Antə japwa ɗa ku təra ata kəma duku.

⁷Antə Ishaku pəla aka baba'ni Ibrahim abbər, “Baba!” Antə Ibrahim ndər ka pəla, “Naam, nggədza ra ɓzərna.” Antə Ishaku pəla, “Nggədza u'u, tsuwa nggədza udzəm, amma gam ar hamta saɗaka mbamba ni ama ri?”

⁸Antə Ibrahim pəla alari abbər, “Hyel ka kərari surni ata hamta ɓzər gam tə mda ata hara saɗaka mbamba ni kəgari, ɓzərna.” Antə japwa ɗa ku təra ata kəma duku.

⁹Sakatə da ku mzhitə vəi tə Hyel pəla alari ni, antə Ibrahim namtə bagaɗi, ka putə udzəm ni ata kər. Antə tsa mbwahə ɓzərni Ishaku, ka vətə ni ata bagaɗi ni, na ata kəra udzəm ni.

¹⁰Antə Ibrahim ndərar tsiyari, ka kətə ingdla ni ka tsa thlamta wulya ɓzərni ni kəgari.

¹¹Amma mdərthlentərhyel ar MTHLAKU ku ndəra akwa vəi na amtazi ka pəla abbər, “Ibrahim! Ibrahim!” Antə tsa pəla, “Naam, nggədza ra.”

¹²Antə tsa pəla, “Ga aɗiya tsəkwar ɓzərni wa, wala hara alari su laga wa. Kamnyar kulini I ku sənda abbər gə mdər thlivər Hyel, təng tə ga aɗi ngkata ali ɓzər ngə ni wa, ɓzər nga na duku ɗeng ni.”

¹³Antə Ibrahim haptə ncari, ka wul vəi na kalaktə ni, təng nggədza gam laga akwa dlədləku, ka təmbəlayerari nggəla akwa nca dlədləku ni. Antə Ibrahim mwari, ka kəɓəla ni, ka si ka hamta saɗaka mbamba kəgari ata vəya ɓzərni ni.

¹⁴Antə Ibrahim ku vətə thləm aka vəi nda abbər “MTHLAKU ata hamtari.” An su hara tə har ba ashina mda ana pəla, “Ata kəra gar ar MTHLAKU tsa ata hamtari.”

¹⁵Antə mdərthlentərhyel ar MTHLAKU na amtazi kəga Ibrahim, kəga na suɗkur

¹⁶abbər, “MTHLAKU pəla, ‘I ku kahyel ka thləmi abbər təng tə gə na Ibrahim ku hara su ngəni, tə ga aɗi ngkata ali ɓzər nga na duku ɗeng ni wa,

¹⁷to jiri, I ata vədza ala gə barka. Tsuwa I ata hara ka kəkayeri ar nga ndzi hang apa sasəlkayeri na ata kutahyel, ka tsuwa apa wuyakər mnya manda. Kəkayeri ar nga ata səm dawayeri arɗa ka fatə kifər bərniyayeri arɗa.

¹⁸Tsuwa atar kəkayeri ar nga antə mjir duniya ata sə wutə barka, kamnyar ga ku kələngkər ali.’ ”

¹⁹Antə Ibrahim ku ngka adzə buɗayeri ni, antə da ku ngka ahar Beyersheba ata kəma duku. Antə Ibrahim ku ndzəndzi akwa Beyersheba.

²⁰Aghəla saka laga raka antə mji pəla aka Ibrahim abbər, “Nggədza Milka na mwalar ɓzərma' nga Nahor ku yaɓəla alari maɗankyar.

²¹Uz an yarakəmar Nahor, Buz an akwa nu ni, kambəla Kemuwel na baba' Aram.

²²Na bwaduku tsuwa an Kesed, ka Hazo, ka Pildash, ka Yidlaf, ka Bethluwel.”

²³Antə Bethluwel ku yaɓəla Rubeka. Milka yaɓəla shanga maɗashili ngəni ncisu ni aka Nahor na ɓzərma' Ibrahim.

²⁴Tsuwa ngkwar kəyir Nahor na ka thləmari Reyuma ku yaɓəla alari maɗashili nfwar, natə da an Teba, ka Gaham, Tahash, ka Maaka.