Read bura-pabir Baɗitari 24 Bible Online

Baɗitari 24 - bura-pabir bible

Baɗitari 24

¹Akwa saka ndaga Ibrahim ku hali, kamnyar məvari ku hara hang ka duna. Tsuwa MTHLAKU ku vədza alari barka akwa shanga su.

²Antə Ibrahim pəla aka mafarni na ku fəi ta shang akwa kutakəyirni, natə shanga surni akwa tsiyari, abbər, “Hangkir tsiya ga akira kiɗi,

³I akwa bara kara kahyel ali akwa thləma MTHLAKU na Hyel na namtə vəi na amtazi ka duniya, abbər ga aɗi ata kəl mwala aka ɓzərna Ishaku akwa nca maɗankwi ar mjir Kanana natə I akwa nca ɗa ni wa.

⁴Amma ga ata mwari akwa tsəɗiyirna, akwa nca yangkuri, kara kətə mwala aka ɓzərna Ishaku.”

⁵Antə buɗarni ni pəla, “Ka ma ngkwari aɗi hir nu ra ka yeru si akwa tsəɗi ni wa, ata ndzi dwali kəi kətə ɓzər ngə ni kəi mwanta akwa tsəɗi tə gə thlata akwa ni ya?”

⁶Antə Ibrahim pəla, “Awa! Ga aɗiya ata ngka ka ɓzərna anda wa!

⁷Kamnyar MTHLAKU na Hyel na amtazi, na kəɓəla ra akwa kəyir baba'na, ka tsəɗi tə mdə yaɓəla ra akwa, na gari ka kahyel ali abbər tsa ata hamta tsəɗi ngəni aka kəkayeri arna ni, ata thlentə mdərthlentərni akəma ga. Antə apani ga ata mzhi wutə mwala aka ɓzərna anda.

⁸Amma ma mwala ni an aɗi hir nu ngə wa, ga ata ndzi msərmsərari ta bikər ɓəli kahyel tə gə hara ali. Təng ar nga, ga aɗiya ngka ka ɓzərna anda wa.”

⁹Antə buɗarni ni ku hangkir tsiyari akira kiɗə mdərkəyirni Ibrahim, ka kahyel alari abbər tsa ata nu su tə Ibrahim pəla.

¹⁰Antə buɗarni ni fatə dləkəmau kuma akwa nca dləkəmauwayeri ar mdərkəyirni, ka fatsə shanga jili sur cautayeri na ɓɗakɓɗaku zumzum akəla mdərkəyirni, ka təra. Antə tsa pwa akwa lakur mwari akwa bərni tə Nahor ka ndzi akwa, akwa tsəɗi Mesopotamiya.

¹¹Antə tsa vu tə dləkəmauwayeri ni zuzuri aɓəla ata hildi ata mnya jiɓa, gahha tahaku, akwa sakatə mwanki ana ləkwa kə yimi.

¹²Antə tsa hara adduwa ka pəla, “MTHLAKU na Hyelər mdərkəyirna Ibrahim, hara kəi səma ashina bu, kara ncantə hirkurər nga na ana palidzi wa aka mdərkəyirna Ibrahim.

¹³Nggədza ra athləthlata azi ata mnya jiɓə ni, tsuwa an sakatə maɗankwi di ni akwa səɓəla kamnyar kə yimi.

¹⁴Hara ka kəlara ɓzərngkwa natə I ku pəla alari, ‘Kəli tughumər ngə ni bu usa ka gə ni yimi kəi sa.’ Antə ma tsa ku pəla, ‘Sa, tsuwa I ata na yimi aka dləkəmauwayeri ar nga ka shanga ɗa sa,’ to ka tsa an ndzi ɓzərngkwa tə ga ku carɓəla aka buɗar nga Ishaku. Atar apani antə I ata sənda abbər ga ku ncantə hirkur na ana palidzi wa ni aka mdərkəyirna.”

¹⁵Akəmata tsa akuri adduwarni, təng nggədza Rubeka ku si ka tughum ar kəi yimi ata pathlahari. Tsa an ngkwar Bethluwel, natə Milka yaɓəla aka Nahor na ɓzərma' Ibrahim.

¹⁶Tsuwa ɓzərngkwa ni dakwi ka duna tə mda abara ka wula, ɓzərngkwa tə sal aɗi səndə ni wa. Antə tsa ləghəi akwa mnya jiɓə ni, ka nghyantə tughumərni ka yimi, ka ndləɓəla akwa səvi.

¹⁷Antə buɗar Ibrahim ni thlatə ka hwi mwari adzə ni ka pəla, “Dlar ra bu usa ka yimi na akwa tughumər ngə kəi sa.”

¹⁸Antə tsa pəla, “Ga ata mzhi sari, zanuwa.” Təng təkəma tsa kəli tughum ni ata wulyari, ka kəsi akwa tsiyari ka na yimi ni tə tsa sa.

¹⁹Sakatə ngkwa ni ku kuri na yimi ni, antə tsa pəla, “I ata ra kətsə yimi ni aka dləkəmauwayeri ni ka shanga ɗa sa har ka mzhi ɗa.”

²⁰Antə ngkwa ni puɓəla yimi na akwa tughumərni ni akwa sur pu yimi aka mwaɓi, ka ngka ata mnya jiɓa kamnyar kətsə damwa, har tar tə tsa ɗəmtsə yimi ni aka shanga dləkəmauwayeri arni.

²¹Antə mdə ni dləɓ səri akwa wul ni kamnyar ka tsa nggaɓəla wala nuhum MTHLAKU ku nggatə adduwarni ka na alari sa'a akwa mwarni ni kasha.

²²Sakatə dləkəmauwayeri ni kuri sa yimi ni, antə mdə ni kətə lenduwar kucir ar dinar, natə kəgəɓkurari an retar shekel, ka hau alari akwa kucirari. Antə mdə ni fwaɓəla surtsi suɗa tə mdə nam ka dinar, natə kəgəɓkurari ku hara shekel kuma, ka hata ata wulya tsiya ngkwa ni.

²³Antə tsa pəla alari abbər, “Ɓzərngkwa, gə ngkwar wa ri? Tsuwa mbwar mətəpi aɗi aviyar giri natə yeru kəga mjirna ata mzhi ra pi akwa ya?”

²⁴Antə ngkwa ni pəla, “I ngkwar Bethluwel natə ɓzər Milka yaɓəla aka Nahor.”

²⁵Antə tsa ləkəma ka pəla, “Yeru ka mbwar mətəpi tə giri ata mzhi pi akwa, tsuwa yeru ka kusar ul'ula ka thladli na ata mzhi mwaɓiyayeri ni.”

²⁶Antə mdə ni nggyarghəidzi ka vəngkər səli aka MTHLAKU,

²⁷ka pəla, “Hu giri MTHLAKU na Hyelər mdərkəyirna Ibrahim, na aɗi zhar ncantə hirkurərni na ana palidzi wa ni, wala zhar ndzi ka jirkur aka mdərkəyirna wa. Wala I ma, MTHLAKU ku pwar ra har ka səntə ra akwa kəyir yangkura mdərkəyirna.”

²⁸Antə ɓzərngkwa ni hwihwi ka ləvəi, ka mwari adzə mama'ni, ka pəla alari ka shanga mjir kutakəi shanga su na hara ata mnya jiɓə ni.

²⁹Tsuwa ɓzərma' Rubeka aɗi na ka thləmari Laban. Antə Laban ku tərɓəla ka hwi akwa mwari ata mnya jiɓə ni ka tsa wutə mdə ni.

³⁰Laban thlatə ka ra wutə mdə ni, kamnyar lenduwar kucir, ka surtsi tə tsa wuta ata tsiya ngkwarma'ni, ka tsuwa laku tə ngkwarma'ni Rubeka akwa gari abbər, “Nggədza su tə mdə ni pəla ali,” ni. Tsuwa tə tsa mwari, tsa wutə mdə ni athləthlata adzə dləkəmauwayeri ata mnya jiɓə ni.

³¹Antə Laban pəla aka mdə ni, “Asəra ka mwa ləvəi, mdə tə MTHLAKU ku vədza alari barka. Kamnyar mi tə ga ata thləthlata aɓəlazi ri? Ai I ku kurtə ɗəmha ala giri mbwar pi, ka tsuwa vəi tə giri ata pwi dləkəmauwayeri ni.”

³²Antə mdə ni ku ləvəi. Antə Laban fəi kari na ata dləkəmauwayeri ni, ka pwi kusar ka thladli aka dləkəmauwayeri ni, ka səntə yimi tsuwa aka mdə ni kəga mji na adzə ni ni, ka da kəcimta səla ɗa kəgari.

³³Antə mdə ku səntə susəma ka vəi akəmari kamnyar ka tsa səma, amma tsa pəla, “I aɗi ata səm susəm wa, tar ma I ku pəlaɓəla su na səntə ra.” Antə Laban pəla, “To, pəla ja.”

³⁴Antə mdə ni pəla, “I an buɗar Ibrahim.

³⁵MTHLAKU ku vədzə barka aka mdərkəyirna, antə tsa ku ndzi mdə ola. Tsa ku na alari ciɓayeri ar təma, ka kwi, ka thla, ka dləkəmauwayeri, ka kwarayeri, ka jaktə na alari adzərfa, ka dinar, ka tsuwa mafayeri shili ka mwanki.

³⁶Tsuwa Saratu na mwalar mdərkəyirna ku yaɓəla alari ɓzər sal akwa halhalkurərni, antə mdərkəyirna ku hamta alari kifər shanga su tə tsa kəgari.

³⁷Tsuwa mdərkəyirna ku vu ra kəi kətə alkawal ka kahyel abbər I aɗi ata kəl mwala aka ɓzərni ni akwa nca maɗankwi ar mjir Kanana natə tsa ka ndzi akwa nca ɗa ni wa.

³⁸Amma kəi mwari akwa kəyir baba'ni ka yangkurari, kəi kətə mwala aka ɓzərni.

³⁹Antə I pəla aka mdərkəyirna, ‘Ka, amma ma ngkwari aɗi hir nu ra wa ri?’

⁴⁰Amma tsa shinau ka pəla ali, ‘MTHLAKU natə I ana nu su tə tsa pəla ni, ata thlentə mdərthlentərni ka tsa mwa akəma ga. Antə tsa ata na gə sa'a. Antə ga ata kətə mwala aka ɓzərna akwa nca yangkuri, akwa kutakəyir baba'na.

⁴¹Apani antə ga ata msər ta watsəɓər bikər ɓəli alkawal na ka kahyel ni. Tsuwa ma sakatə ga ku mwari adzə mji na yangkuri ni, antə da nggəlar ta na gə ngkwa ni, to ga ata msər ta watsəɓər bikər ɓəli alkawal tə gə hara ali ka kahyel ni.’

⁴²“Ashina antə I si ata mnya jiɓə ni, ka hara adduwa abbər, ‘MTHLAKU, Hyelər mdərkəyirna Ibrahim, dlar ra bu, ma ga an ahira, ka gə ni sa'a akwa mwarna ni.

⁴³Nggədza ra azi athləthlata ata mnya jiɓa. Ma ɓzərngkwa na ku səɓəla kamnyar kə yimi akwa jiɓə ni, antə ma I ku pəla alari, “Ɓzərngkwa, na ali yimi na akwa tughumər ngə ni bu kəi sa.”

⁴⁴Antə ma tsa ku pəla ali, “Zanuwa, sa, tsuwa I ata ɗəmtsə yimi aka dləkəmauwayeri ar nga ka da sa,” ndzi ka tsa ndzi ngkwa tə gə na MTHLAKU ku carɓəla aka ɓzər mdərkəyirna.’

⁴⁵Akəmata I akuri pəlamta ndər na akwa ɗəffi, təng təkəma Rubeka ku səɓəla ka tughumərni ata pathlahari. Antə tsa ləghəi adzə jiɓə ni, ka kətsə yimi ni. Antə I pəla alari, ‘Dlar ra bu ka yimər sa.’

⁴⁶Təng təkəma tsa kəli tughumərni na ata pathlahari ni ka pəla, ‘Zanuwa, sa, tsuwa I ata na yimi aka dləkəmauwayeri ar nga ka shanga ɗa sa.’ Antə I sa. Antə tsa ɗəmtsə yimi ni aka dləkəmauwayeri ni tsuwa tə da sa.

⁴⁷Antə I pəla alari, ‘Gə ngkwar wa ri?’ Antə tsa pəla, ‘I ngkwar Bethluwel natə Milka yaɓəla aka Nahor.’ Təkəma antə I hau lenduwa ni akwa kucirari ka hatə surtsi ata tsiyari,

⁴⁸ka zuzuri ata di ka vəngkər səli aka MTHLAKU. Antə I hu MTHLAKU na Hyelər mdərkəyirna Ibrahim, na pwar ra akwa laku na kalkalari ka səntə ra adzə ngkwar yangkura mdərkəyirna kamnyar kəi kəta aka ɓzərni.

⁴⁹Antə kulini, ma giri an ata ncantə jirkur ka hara ɓɗakkur aka mdərkəyirna, ka giri pəla ali. Ma apani wa tsuwa, ka giri pəla ali, kamnyar kəi səndə su tə I ata harari.”

⁵⁰Antə Laban ka Bethluwel shinau alari ka pəla, “Su ngəni thlata akəla MTHLAKU, antə yeru amzhi pəla ‘I,’ wala ‘Awa,’ wa.

⁵¹Nggədza Rubeka, antə kətə ni ka giri təra, ka tsa ndzi mwalar ɓzər mdərkəyir nga, apatə MTHLAKU ku pəla.”

⁵²Sakatə buɗar Ibrahim nggatə ndər ngəni, antə tsa zuzuri ata di ka vəngkər səli aka MTHLAKU.

⁵³Antə mdə ni fwaɓəla kari dəɓa ar dinar, ka ar adzərfa, ka ləptayeri, ka hamta aka Rubeka. Antə mdə ni jaktə fwaɓəla sur dəɓa damwa natə masər ɗa mwavər ka hamta aka ɓzərma' Rubeka ka aka mama'ni.

⁵⁴Antə buɗar Ibrahim ni ka mji na adzə ni ni ku səm ka sa, ka piyimta anda. Sakatə da ku thlatə ɗəɗəpa, antə buɗar Ibrahim ni pəla, “Ndzi kəi ngka adzə mdərkəyirna.”

⁵⁵Amma ɓzərma' ngkwa ni ka mama' ngkwa ni pəla, “Yeru ata bara ka ngkwa ni ɗar ndzi ar virayeri laga, wala vir kuma, kambəla giri təra.”

⁵⁶Amma tsa pəla ala ɗa, “Giri ata fwari ra diya. Təng tə MTHLAKU ku na ali sa'a akwa mwarna ni, zhar giri ra kəi ngka avi adzə mdərkəyirna.”

⁵⁷Antə da pəla, “Ndzi ka yeru kəga ngkwa ni ka mburu nggatə su tə tsa ata pəlari ata kər.”

⁵⁸Antə da kəga Rubeka ka pəla alari, “Ga ata hir ka giri təra ka mdə ngəni ya?” Antə ngkwa ni pəla, “I ku hir ka yeru təra.”

⁵⁹Antə apani da ku pwarɓəla ngkwarma'ɗa Rubeka, ata kəma duku ka mwala na bang ni. Antə da ku təra ata kəma duku ka buɗar Ibrahim ka mjirni.

⁶⁰Antə mjir kutakəi ni ku vədzə barka aka Rubeka ka pəla, “Ngkwarma' yeru, ka gə ndzi mama' mji dlama dlama! Ndzi ka kəkayeri ar nga sə mula aka dawayeri arɗa, ka da sə fa kifa ar bərniyir mji na nggəlar ɗa.”

⁶¹Antə Rubeka ka mwala na ata pwar ni ni ku ɗəmhədzi ka fəltə dləkəmauwayeri ni, ka nutə mdə ni. Apani antə mdə ni ku kətə Rubeka ka psi laku.

⁶²Akwa saka nda Ishaku ku kurtə zhar Beyer Lahai Roi, ka si ka ndzəndzi akwa Negev.

⁶³Vir laga tahaku təng Ishaku ləɓəla akwa mtaku kamnyar ndərar səlari. Antə akwa saka laga tə tsa haptə ncari, təng tsa wutə dləkəmauwayeri laga akwa si.

⁶⁴Antə Rubeka ku haptə ncari tsuwa, ka wutə Ishaku, antə tsa səghəi kazhar dləkəmau arni.

⁶⁵Antə Rubeka pəla aka buɗar Ibrahim abbər, “Ngənda wan akwa mwa akwa bəbal akwa si təbwar mburu nə ri?” Antə buɗa ni pəla alari abbər, “Tsa an mdərkəyirna ni.” Antə tsa fatə gyalleyirni ka hartə kəmari kəgari.

⁶⁶Antə buɗa ni ngkərɓəla aka Ishaku shanga su tə tsa ku hara.

⁶⁷Antə Ishaku ku mwantə Rubeka akwa tent tə mama'ni Saratu ɗar ndzi akwa ni, antə Rubeka ndzi mwalarni. Antə Ishaku ku hir Rubeka. Antə ɗəffa Ishaku ku pəpəi aghəla mtər Rubeka.