Read bura-pabir Baɗitari 25 Bible Online

Baɗitari 25 - bura-pabir bible

Baɗitari 25

¹Ibrahim ku kəl mwala damwa ka thləmari Ketura.

²Antə Ketura ku yaɓəla alari Zimran, ka Yokshan, ka Medan, ka Midiyan, ka Ishbak, ka Shuwa.

³Antə Yokshan ku yaɓəla Sheba ka Dedan. Antə kəkayeri ar Dedan an mjir Asshur, ka mjir Letushi, ka mjir Le Ummi,

⁴Maɗashilər Midiyan an Efa, ka Efer, ka Hanok, ka Abida, ka Eldaa. Shanga ɗa an kəkayeri ar Ketura.

⁵Tsuwa Ibrahim ku hamta shanga surni aka Ishaku.

⁶Amma aka maɗashilər mambila mwanki tə tsa pwi ni, Ibrahim hamta ala ɗa cautayeri. Tsuwa akwa sakatə tsa tsu ka mpika antə tsa salamtə ɗa kamnyar ka da ndəkəmtadzi ka ɓzərni Ishaku. Antə da ku təra ka mwari ciju akwa tsəɗi na təbwar raghəi.

⁷Ngəni an hangkura məva Ibrahim akwa duniya akwa ndzəndziyir mpikari, məvari an aru pal ka murfəkumari ka ntəfu.

⁸Antə Ibrahim ku mti akwa sakatə tsa ku hali na kalkalari, mdə halhala na ka məvari hang, ka ra wutə kəkayeri arni na mtə kəmata tsa.

⁹Antə Ishaku ka Ishmayel na maɗa'ni ku harəmta ni akwa kur Makpela, akwa bəbal ar Efron na ɓzər Zohar na mdər Hitti, kudzəhə ka Mamre təbwar raghəi,

¹⁰vəi tə Ibrahim ku masɓəla akəla mjir Hitti. Anda antə mdə ku harəmta Ibrahim kudzəhə ka mwalankiɗa Saratu.

¹¹Aghəla mtər Ibrahim, antə Hyel vədzə barka aka ɓzərni Ishaku. Antə Ishaku ku ra ndzəndzi ahar Beyer Lahai Roi.

¹²Nayeri ni an kəkayeri ar Ishmayel ɓzər natə Hagar na ngkwar Masar, na ngkwarmbwar Saratu, ku yaɓəla aka Ibrahim.

¹³Nggədza thləma maɗashilər Ishmayel, ata ola ata ola, baɗitə ka yarakəma. Nebayoth an yarakəma, kambəla Kedar, ka Adbeyel, ka Mibsam,

¹⁴ka Mishma, ka Duma, ka Massa,

¹⁵ka Hadad, ka Tema, ka Yetur, ka Nafish, ka Kedema

¹⁶Nayeri ni tsuwa an thləma maɗashilər Ishmayel, mdə rəbutə thləma ɗa ata di ata di ka thləma vəi fəliyir ɗa. Da ka kuthlyayeri kumnya suɗa akwa nyarmbwar ɗa.

¹⁷Tsuwa hangkur məva Ishmayel an aru pal ka makkumari ka murfa. Aghəla nda antə tsa ku mti, ka ra wutə mjirni na ku mtə kəmata tsa.

¹⁸Antə kəkayeri ar Ishmayel ku ndzəndzi akwa daɓwa Havila ka Shur, akwa tsəɗi na awul Masar, ata lakur Assiriya. Antə da ku ndzəndzi shiɗa, akwa dawakur ka shanga mjir ɗa.

¹⁹Nayeri ni an kəkayeri ar Ishaku na ɓzər Ibrahim. Ibrahim ku yaɓəla Ishaku. Ibrahim an yaɓəla Ishaku.

²⁰Sakatə Ishaku hara məvari nfwarkumari ka yarni, antə tsa ku kəl mwalankiɗa Rubeka, na ngkwar Bethluwel na mdər Aram na ahar Paddan Aram. Rubeka an ngkwarma' Laban na mdər Aram.

²¹Antə Ishaku ku hara adduwa aka MTHLAKU ata kəra mwalankiɗa Rubeka, kamnyar tsa aɗi mzhi kətə hur wa. Antə MTHLAKU ku nggatə adduwar Ishaku antə Rubeka ku kətə hur.

²²Antə maɗankyar ni ku ɓuji ka nvwa ɗa akwa kutari. Antə tsa pəla, “Kamnyar mi tə su apani ata wutə ra ri?” Antə tsa mwari adzə MTHLAKU kamnyar bara nggaɓəla su ata kər.

²³Antə MTHLAKU pəla alari, “Mji suɗa an akwa kuta ga, antə mji ngəni suɗa akwa gə ni ata ndəkəmtadzi. Mdə na pal ata ndzi ɓəɓal ta nvwa ni, na olari an ata hara mafakur aka na ntsahari.”

²⁴Sakatə sakar yarni ku hara, antə tsa yaɓəla maɗaɓuli.

²⁵Ɓzər na səɓəla ntangkəma ni mamza, tsuwa shanga dzari ka shishi apa ləptər shishi, antə da vəta alari thləm Isuwa.

²⁶Aghəla nda antə ɓzərma'ni səɓəla, ka matədukwa Isuwa akwa tsiyari. Apani antə thləmari ku ndzi Yakub. Ishaku ka məvari ngkwakumari sakatə mdə yaɓəla ɗa.

²⁷Sakatə maɗankyar ni ku kəla, antə Isuwa ku ndzi muzəmaku na masəku, ka ndzi mdər mtaku. Ar Yakub ndərərni aɗi ol wa, antə tsa hir ndzi avi.

²⁸Ishaku ku hir Isuwa, kamnyar kum mtaku tə Isuwa ana tsi ka səntə alari, amma ar Rubeka tsa hir Yakub.

²⁹Vir laga sakatə Yakub akwa ɓwa pote, antə Isuwa səvi akwa mtaku ka mi akwa kətə ni ka duna.

³⁰Antə Isuwa pəla aka Yakub, “Kətsa ali poteyir ngə na mamza ni bu, kamnyar mi akwa kətə ra ka duna. An su na hara tə mda ana kəga Isuwa abbər Edom, watau ‘mamza’ ni.”

³¹Antə Yakub pəla alari, “Tar ma ga ata ɗələmta ali yarakəmakurər ngə ni katagu.”

³²Antə Isuwa pəla, “I ata mnya mtə diya, ka man tə olkur yarakəmakur ata dlar ra akwa ri?”

³³Amma Yakub pəla, “To, ai tar ma ga ku kahyel ali katagu.” Antə Isuwa ku kahyel alari abbər, “I ku ɗələmta ala gə olkur ar ndzi yarakəma ni.”

³⁴Antə Yakub ku hamta buradi ka pote na ka tsər ni aka Isuwa. Antə Isuwa ku kwasa ka sangkər yimi, ka thlatə ka təra. Apani antə Isuwa ku rutəmta ka gyal ka yarakəmakur arni.