Read bura-pabir Baɗitari 27 Bible Online

Baɗitari 27 - bura-pabir bible

Baɗitari 27

¹Apani antə vir laga sakatə Ishaku ku hali, tə ncari aɗi akwa wulɓəla su twar wa, antə tsa kəga Isuwa ɓzərni na olari, ka pəla alari, “Ɓzərna.” Antə Isuwa pəla, “Naam, nggədza ra.”

²Antə Ishaku pəla alari, “Kulini I ku hali, antə I aɗi səndə virər mtərna wa.

³Antə fatə kariyir shir nga, kwajar nga ka laliyir nga, kara mwari akwa mtaku, ka gə tsi ali kum.

⁴Ka gə ɗəmha ali susəma na msəra, jili natə I hirhir ni, ka gə səntə ali kəi səma, kamnyar kəi vədza ala gə barka akəmata I amta.”

⁵Azha sakatə Ishaku akwa gari aka ɓzərni Isuwa ni, Rubeka akwa ngga ɗa. Apani sakatə Isuwa ku təra ka ləkwa mtaku kamnyar shi kum ka sənta,

⁶antə Rubeka pəla aka ɓzərni Yakub, “I nggatə baba' nga akwa gari aka ɓzərma' nga Isuwa abbər

⁷ka tsa mwari ra səntə alari kum mtaku, ka tsa ɗəmha alari susəma na msəra, ka baba' nga səma, kamnyar ka tsa vədzə alari barka akəma MTHLAKU akəmata tsa amta.

⁸Antə ɓzərna, psi thləma ga, kara nu kəlara su tə I ku pəla ala ga.

⁹Mwari akwa ciɓər kwi kara səntə ali maɗa' kwi na ɓɗakɓɗaku suɗa, kəi namtə susəma na msərari aka baba' nga, jili susəma tə tsa hirhir ni.

¹⁰Antə ga ata mwanta aka baba' nga ka tsa səma, kamnyar ka tsa vədzə ala gə barka, akəmata tsa amta.”

¹¹Amma Yakub pəla aka mama'ni Rubeka abbər, “Ai gə ka səndari abbər ɓzərma'na Isuwa mdər shishi, antə arna tsuwa dzi lələɓu kula shishi.

¹²Nuhum baba'na asə tsəkwar dzi ka nggaɓəla abbər I akwa pwaktə ni, ka sə ndəkərəngkər ali shushukur ata vəya barka.”

¹³Antə mama'ni pəla alari, “Ka shushukur ndaga si ata kəri ɓzərna. Ar nga kələngkər ali bu, kara mwari, ka gə səntə ɗa ali.”

¹⁴Antə tsa ku mwari ka səntə ɗa aka mama'ni. Antə mama'ni ku namtə susəma na msəra, jili natə baba'ni hirhir ni.

¹⁵Antə Rubeka ku fatə ləptu na ɓɗakta shang ar Isuwa na ɓzər olərni, na ambwarngkiɗa, ka hadza aka Yakub ɓzərni na ntsahari.

¹⁶Antə tsa fatə kəsəm kwiyayeri ni ka pərta ata tsiya Yakub, ka ata vəi na kula shishi ata wulyari.

¹⁷Antə Rubeka ku na susəma ngəni tə tsa namtə msəra ka buradi adza ni aka ɓzərni Yakub.

¹⁸Antə Yakub ku ləmbwa adzə baba'ni ka pəla, “Babana!” Antə Ishaku ndəra ka pəla, “Aai, gə wa ri ɓzərna?”

¹⁹Antə Yakub pəla, “I an Isuwa, ɓzər na yarakəmar nga. I ku hara apatə ga ku pəla ali. Antə thlata, kara ɓɗə kum mtaku ni, ka gə vədza ali barka.”

²⁰Amma Ishaku pəla alari, “Laku madi tə gə mzhi wutə kum ni taktar apani ri, ɓzərna?” Antə Yakub pəla alari, “Ai MTHLAKU na Hyelər nga an dlar ra, tə I wutə taktar ni.”

²¹Antə Ishaku pəla aka Yakub, “Shahədzi azi ɓzərna, kəi tsəkwar nga, wala ga an ɓzərna Isuwa jiri, wala aɗi tsa wa.”

²²Antə Yakub ku shahədzi adzə baba'ni, tə tsa ku tsəkwar ni, ka pəla, “Kuraka ga an kuraka Yakub, amma tsiya ga an tsiya Isuwa.”

²³Tsa aɗi nggaɓəla abbər Yakub wa, kamnyar tsiyari ka shishi tsu apa Isuwa. Antə sakatə tsa ata vədza alari barka ni,

²⁴tsa jaktə yu ni abbər, “Jiri ga an Isuwa ni ya?” Antə Yakub pəla, “Jiri, I an tsa.”

²⁵Antə Ishaku pəla, “To səntə ali kum tə gə ɓwatə ni ja, ɓzərna, kəi ɓɗa, kəi vədza ala gə barka.” Antə Yakub ku səntə alari kum ni, antə tsa ku ɓɗa. Antə tsa səntə alari yimər anap, antə tsa sangkər.

²⁶Antə baba'ni Ishaku pəla, alari, “Shahədzi ɓzərna, ka gə vədzə mnya ga ali.”

²⁷Antə Yakub shahədzi ka vədzə mnyari aka baba'ni. Sakatə Ishaku ku shiwurər ləptər Yakub, antə tsa vədzə alari barka, ka pəla, “Mhm, nggatə msərakur shiwurər ɓzərna, msəra apa shiwur kuta mtaku natə MTHLAKU ku vədzə alari barka!

²⁸Ka Hyel na gə kəlangkər vəi na amtazi, ka barkar susəma tə mda ana wuta akwa di, ata kəma duku ka mthli kəga yimər anap.

²⁹Ka mjir duniya hara kəthlər buɗakur ala ga, ka tsəɗiyayeri zuzuri akəma ga. Ka gə ndzi ola ata kəra maɗama' nga, ka maɗama' nga zuzuri ala ga. Kəlara mdə na ku shuwumta nga, ka tsa ndzi shushuwari. Kəlara mdə na ku vədza barka ala ga, ka tsa ndzi mdər barka.”

³⁰Təkəma tə Ishaku kuri vədzə barka aka Yakub, tə Yakub akwa ləɓəla kazhar baba'ni, təng təkəma Isuwa səvi akwa bara ni.

³¹Antə tsa namtə susəma na msəra tsuwa, ka səntə aka baba'ni. Antə tsa pəla aka baba'ni, “Baba, thlatə ka gə ɓɗə kum mtaku natə I si kəgari ka namtə ni, ka gə vədza ali barka.”

³²Antə baba'ni Ishaku pəla alari, “Ga an wa ri?” Antə tsa pəla, “I an ɓzər nga Isuwa, yarakəmar nga.”

³³Antə Ishaku ləkwa kədza ka duna swaiswai, tə tsa pəla, “Ka, wa an tsi kum mtaku ka səntə ali kəmata ga asəmbwa, har tə I ɓɗəmnya ka vədza alari barka nə ri? Tsuwa jiri tsa ta ndzi ka barka!”

³⁴Sakatə Isuwa nggatə gariyir baba'ni, antə tsa pthli tuwa ka kuraku na ola ka ɗəffə ɓzəɓza, ka pəla aka baba'ni, “Vədza ali barka, baba! Vədza ali barka tsuwa!”

³⁵Amma baba'ni pəla, “Ɓzərma' nga ku si ka pwaktə ra, ka dlutsə barka na ar nga.”

³⁶Antə Isuwa pəla, “To, azha an su na hara tə mdə vəta alari thləm Yakub ni. Kamnyar kulini ka suɗa antə tsa dlutsə surna. Tsa dlutsə olkurərna na ar yarakəmakur, nggədza kulini tsuwa tsa ku dlutsə barka na arna!” Antə tsa pəla aka baba'ni, “Ga aɗi mbilar ali barka wala raka wa ya?”

³⁷Antə Ishaku shinau ka pəla aka Isuwa, “I ku kurtə namtə ni mthlakər nga. Tsuwa I ku kurtə hamta shanga maɗama'ni akwa tsiyari, ka da ndzi buɗarni. Tsuwa I ku na alari mthli ka yimər anap, ka na alari shanga sur ndzəndziyir mpikari. Antə ɓzərna, su aɗi na mbila tə I ata mzhi na ala gə wa.”

³⁸Antə Isuwa pəla, “Baba, təng barka duku an akəla gə ya? Vədza ali barka baba! Vədza ali barka tsuwa! Antə tsa haptə kurakari ka tuwa ka duna.”

³⁹Antə baba'ni Ishaku shinau alari ka pəla, “Kəyir nga ata ndzi ciju ta barkar susəma tə mda ana wuta akwa di, ta barkar kəlangkəu ar vəi na amtazi.

⁴⁰Tar atar mpa antə ga ata ndzi ka mpika, ga ata hara buɗakur aka ɓzərma' nga ar saka laga. Amma ma sakatə ga ku msər ka ntsuɓəla kəra ga, ga ata ɓəgələmta udzəmər ni na ata wulya ga ni.”

⁴¹Isuwa ku kəsi Yakub akwa ɗəffari kamnyar barka tə baba'ni hamta aka Yakub ni. Antə Isuwa kwamta akwa ɗəffari abbər, “Ai ma baba' yeru ku mti, tə mdə ku kuri tuwarni, to, I ata tsi Yakub na ɓzərma'na.”

⁴²Amma sakatə Rubeka nggata ata kəra dzamər Isuwa na yarakəmarni, antə tsa thlentə ka Yakub na ɓzərni na ntsahari ka tsa si. Antə tsa pəla aka Yakub abbər, “Ɓzərma' nga Isuwa wuta abbər su na ata mtathli alari ɗəffari an ka tsa tsi nga, antə tsa akwa ɗəmhədzər tsi nga.

⁴³Antə kulini ɓzərna, kələngkər aka su tə I ata pəla ala ga. Thlata, kara hwi mwari adzə ɓzərma'na Laban ahar Haran.

⁴⁴Ka gə ɗarndzi anda katagu, tar ma bwarbwarkur ɗəffa ɓzərma' nga ku mtathli.

⁴⁵Antə ma sakatə ɗəffari ni ku mtathli, tə tsa ku fwari ata kəra su tə ga ku hara ni, I ata thlenta ala gə labar abbər kara ngka. Kamnyar mi tə kəi hara asarər giri japu vir duku ri?”

⁴⁶Antə Rubeka pəla aka Ishaku, “Arna I ku ghər ka mwankir Hitti ni. Ma Yakub ata sə kəl mwala akwa nca maɗankwi Hitti nayeri ni, to, kuji ka mpikəi aɗi wa.”