Read bura-pabir Baɗitari 28 Bible Online

Baɗitari 28 - bura-pabir bible

Baɗitari 28

¹Antə Ishaku kəga Yakub, ka vədzə alari barka, ka tsaktə ni abbər, “Ga aɗiya kəl mwala akwa nca maɗankwi ar mjir Kanana ni wa.

²Thlatə taktar, kara təra mwari ahar Paddan Aram, akwa kəi Bethluwel na baba' mama' nga, ka gə kətə pal akwa nca maɗankwiyir ɓzərma' mama' ngə ni ka tsa ndzi mwalankiri.

³Ka Hyel na ka Duna ta Shang vədza ala gə barka, ka tsa hara ka giri ya ka yatədzi hang, har ka giri ndzi tsəɗi na ola ar mji.

⁴Ka tsa na ala ga, ka shanga kəkayeri ar nga, jili barka tə tsa na aka Ibrahim, kamnyar ka gə dlu tsəɗi ngəni tə ga akwa apa mətəpi ni, ka gə ndzi mthlakari. Tsa an tsəɗi natə Hyel hamta aka Ibrahim.”

⁵Apani antə Ishaku ku salamtə Yakub. Antə Yakub ku təra ka mwari ahar Paddan Aram, adzə Laban na ɓzər Bethluwel na mdər Aram, na ɓzərma' Rubeka na mama' Yakub ka Isuwa.

⁶Isuwa ku nggata abbər Ishaku ku vədzə barka aka Yakub, ka thlentə ni ahar Paddan Aram ka tsa ra kəl mwala anda, har ka tsaktə ni abbər tsa aɗiya kəl ngkwar mjir Kanana wa.

⁷Tsuwa tsa ku wuta abbər Yakub ku kələngkər aka baba'ni ka mama'ni ka təra mwari ahar Paddan Aram.

⁸Apani sakatə Isuwa wuta abbər maɗankwiyir mjir Kanana ni aɗi kəskəra baba'ni Ishaku wa,

⁹antə Isuwa təra mwari adzə Ishmayel ka kətə Mahalath na ngkwar Ishmayel na ɓzər Ibrahim tə tsa ndzi mwalankiɗa. Mahalath an ngkwarma' Nebayoth. Antə Mahalath ku ndzi mwalarni ata kəra mwanki damwa tə tsa kəgari.

¹⁰Aghəla nda antə Yakub ku zhar Beyersheba ka ləkwa lakur mwari ahar Haran.

¹¹Sakatə tsa mzhitə vəi laga, antə tsa thləthlatə ka pi anda, kamnyar tə pci ku təri. Antə tsa kətə pela laga pal akwa nca pelayeri na anda, ka vətə kərari ata ka tsa heni.

¹²Antə tsa suni abbər lada laga aɗi saɓəl tə mdə thləli ata di, natə kərari ku mzhitə kutahyel. Tsuwa nggədza mjirthlentərhyel akwa ləmta ka səghəi ata.

¹³Tsuwa nggədza MTHLAKU athləthlata amta ata kəra lada ni, akwa pəla, “I an MTHLAKU, na Hyelər kəkar nga Ibrahim, ka Hyelər Ishaku. Antə tsəɗi ngəni tə gə pəpəi akwa ni, I ata hamta ni ala ga, kəga kəkayeri ar nga.

¹⁴Antə kəkayeri ar nga ata sə ndzi hang apa bərbər. Antə da ata sə titilidzi ka mwari təbwar ramta, ka bwar raghəi, ka bwar yala, ka bwar anəm. Atar nga ka atar kəkayeri ar nga antə shanga mjir duniya ata sə wutə barka.

¹⁵Nggədza tsuwa, I ata vəi duku ka ga, antə I ata ɓəlatə nga akwa kəlara vəi tə ga ata mwari ata, har kəi ngka ka ga akwa tsəɗi ngəni. Kamnyar I aɗi ata zhar ngə wa, tar ma I ku haratə su tə I ku kətə alkawalari ala ga.”

¹⁶Antə Yakub ku thlata ata heni ka pəla, “Jiri, MTHLAKU akwa vəi ngəni! Amma I aɗi səndə wa!”

¹⁷Apani tsa ku thlivər ka duna, ka pəla, “Kai! Vəi ngəni ata thlivərantə mda ka duna! Antə jiri, ngəni ata ndzi mbwar Hyel! Tsuwa tsa an nyarfur ləmtazi.”

¹⁸Səɓəla ɗəpari, antə Yakub thlatə ɗəɗəpə mbing, ka kətə pela tə tsa vətə kərari ata nda, ka nci ni apa shanggam, ka pungkər mal ata kəra pela ni.

¹⁹Antə tsa kəga thləma vəi ni Bethlel, watau mbwar Hyel. Amma waci thləma di ni an Luz.

²⁰Antə Yakub hara alkawal ka kahyel abbər, “Ma Hyel an ata ndzi ata vəi duku ka iya, ka ɓəlatə ra akwa vəi tə I akwa mwarna ni, ka ni susəma tə kəi səma ka ləptu tə kəi hata,

²¹har kəi jaktə ngka akwa kəyir baba'na akwa lapiyakur, to, MTHLAKU ata ndzi Hyelərna.

²²Tsuwa pela ngəni tə I nci apa shanggam ni ata ndzi vəi vəngkər səli aka Hyel, tsuwa akwa kuta shanga suayeri tə Hyel ni, I ata hamta alari zaka.”