Read bura-pabir Baɗitari 29 Bible Online

Baɗitari 29 - bura-pabir bible

Baɗitari 29

¹Antə Yakub ku ləkəma ka mwarni, har ka mzhitə tsəɗiyir mjir raghəi.

²Aghəla tə tsa mzhitə vəi ni, təng vir laga tsa wutə jiɓə laga akwa mtaku, ka ciɓər təma apəpəi vəyari makər adzə jiɓə ni. Kamnyar akwa jiɓə ndaga antə ciɓayeri ni ana sa yimi. Tsuwa pelar hartə mnya jiɓə ni ol laga.

³Antə kəlara sakatə shanga ciɓayeri ni ku tsaptədzi anda, mjir ɓəla ana takələmta pela ni kazhar mnya jiɓə ni, ka na yimi aka təmayeri ni. Aghəla nda da ata jaktə takələmnya pela ni aka mnya jiɓə ni.

⁴Antə Yakub pəla aka mjir ɓəla ni abbər, “Maɗaməma, giri thlata ahar mə ri?” Antə da pəla, “Yeru thlata ahar Haran.”

⁵Antə tsa pəla, “Giri asəndə Laban na ɓzər Nahor ya?” Antə da pəla, “I, yeru asəndə ni.”

⁶Antə Yakub pəla, “Tsa lapiya ya?” Antə da pəla, “Tsa lapiya kalau. Ndaka ngkwarni Rahila ma, akwa si ka təmayeri arni.”

⁷Antə Yakub pəla, “Pci tsu ol kamta, aɗi sakar ləvəi ka mwaɓiyayeri katagu wa. Antə na giri ala ɗa yimi ka da sa, ka giri jaktə mwantə ɗa akwa ɓəla.”

⁸Amma da pəla alari, “Yeru amzhi wa, tar ma shanga ciɓayeri ni ku tsaptədzi azi, ka mdə takələmta pela na ata mnya jiɓə ni, kambəla yeru mzhi na ala ɗa yimi.”

⁹Akəmata Yakub akuri gari ka da ni, təng təkəma Rahila ku si ka ciɓər təma kəga kwi na ar baba'ni, kamnyar tsa an akwa ɓəla ɗa.

¹⁰Sakatə Yakub wutə Rahila ka ciɓər təmar msəkər ni Laban ni, antə tsa mwari ata mnya jiɓə ni, ka takələmta pela na ata mnya jiɓə ni, ka na yimi aka təmayeri ar msəkərni ni.

¹¹Antə Yakub vədzə mnyari aka Rahila, ka ləkwa tuwa ka kuraku.

¹²Antə Yakub pəla aka Rahila abbər tsa yangkura baba'ni, tsuwa tsa ɓzər Rubeka. Antə Rahila ku hwi ləha ka pəla aka baba'ni.

¹³Təkəma tə Laban nggatə ndər ni ata kəra Yakub na ɓzər ngkwarma'ni Rubeka ni, antə tsa tərɓəla ka huva kara thla kəmari. Sakatə da kəɓa antə tsa fəfahə ni ka vədzə mnyari alari, ka səvi ka tsa. Aghəla tə Yakub ku pəla alari shanga suayeri na ku hara,

¹⁴antə Laban pəla alari abbər, “Ai, gə mamshirna!” Antə Yakub ku ndzəndzi anda har ka hara thliya pal swakti. Aghəla tə Yakub ku ndzəndzi adzə ni ar thliya pal,

¹⁵antə Laban pəla aka Yakub, “Aɗi abbər kamnyar tə mburu yangkur daci təng ga ata hara ali kəthlər gapani wa. Yiɗau antə ga ata bara kəi ntə ngə ri?”

¹⁶Kamnyar Laban ka maɗankwi suɗa, ngkwa na olari thləmari Leya ka na ntsahari tsuwa thləmari Rahila.

¹⁷Ar Leya ncari an ɓɗaku daci, amma ar Rahila tsa ɓzərngkwa na dakwi na ata hara ngguka aka mda.

¹⁸Yakub ku hir Rahila. Antə tsa pəla aka Laban, “I ata hara kəthlər ala ga ar məva murfa kamnyar kəi kəl Rahila ngkwar nga na ntsahari ni.”

¹⁹Antə Laban pəla, “Ai jiri, kuji kəi na ala gə ngkwarna ni, ta I ana aka mdə damwa. Antə ndzəndzi adzə ra.”

²⁰Antə Yakub ku hara kəthlər ar məva murfa kamnyar Rahila, amma məva murfə ni ku ndzi alari apa vir yiɗauwa daci kamnyar tə tsa hir Rahila ka duna.

²¹Antə Yakub pəla aka Laban abbər “Hangkur məva tə mwa pəla ni ku kuri kulini, antə na ali mwalankiya kamnyar kəi ləmbwa adzə ni.”

²²Antə Laban kəgatə shanga mjir di nda, ka vu tə mdə namtə susəmər kucali ar kəldzi ni.

²³Amma akwa tahakər vir kəldzi ni, təng Laban kətə ngkwarni Leya ka mwantə ni aka Yakub. Antə Yakub ku ləmbwa adzə ni.

²⁴Antə Laban ku kətə ngkwar kəyirni Zilpa, ka hamta aka Leya ka tsa ndzi ngkwarmbwarni.

²⁵Sakatə viri ku kuri, antə Yakub nggaɓəla abbər azha Leya! Antə Yakub mwari adzə Laban ka pəla alari, “Man tə gə hara ali apani ri? Aɗi kamnyar Rahila antə I hara kəthlər ni wa ya? Kaha, kamnyar mi tə gə pwaktə ra ri?”

²⁶Antə Laban ku shinau alari abbər, “Mda aɗi ana hara su apani akwa tsəɗiyir yeru wa, abbər ka yeru hamta ngkwar yeru na ntsahari aka sal kəmata ngkwa na olari wa.

²⁷Ndzi ka sati na ar kucalər kəldzi ni kura, ka yeru na gə Rahila, ma ga ata jaktə hir hara kəthlər ali ar məva murfa damwa.”

²⁸Antə Yakub ku hara apatə Laban pəla alari, ka kuri sati ni. Antə Laban kətə ngkwarni Rahila ka hamta alari ka tsa ndzi mwalankiɗa.

²⁹Antə Laban kətə ngkwar kəyirni Bilha, ka na aka Rahila ka tsa ndzi ngkwarmbwarni tsuwa.

³⁰Antə Yakub ku ləmbwa adzə Rahila. Antə tsa ku hir Rahila təramta Leya. Antə Yakub jaktə ləkwa hara kəthlər aka Laban ar məva murfa damwa.

³¹Sakatə MTHLAKU wuta abbər Yakub aɗi hir Leya apa Rahila wa, antə tsa kəlar vəi yar Leya, ka hartə ar Rahila, tə tsa amzhi kətə hur wa.

³²Antə Leya ku kətə hur ka yaɓəla ɓzər sal, ka vəta alari thləm Ruben, kamnyar tsa pəla, “MTHLAKU ku wutə bwani tə I akwa ka ni ɓzər. Antə kulini ja salngkəya ata hir ra.”

³³Antə tsa jaktə kətə hur ka yaɓəla ɓzər sal damwa, ka vəta alari thləm Simeyon, kamnyar tsa pəla, “MTHLAKU ku jaktə hamta ali ɓzər sal damwa, kamnyar tsa ku nggata abbər mda aɗi akwa hir ra wa.”

³⁴Antə tsa ku jaktə kətə hur ka yaɓəla tsu ɓzər sal, ka vəta alari thləm Lawi, kamnyar tsa pəla, “Akwa saka ngəni salngkəya ata fəfahə ra, kamnyar tə I ku yaɓəla alari maɗashili makər.”

³⁵Antə tsa jaktə kətə hur damwa ka yaɓəla tsu ɓzər sal, ka vəta alari thləm Yahuda, kamnyar tsa pəla, “Kulini I ata hu Hyel.” Antə tsa thləthlatə ka yarni.