Read bura-pabir Baɗitari 30 Bible Online

Baɗitari 30 - bura-pabir bible

Baɗitari 30

¹Sakatə Rahila ku wuta abbər tsa aɗi yaɓəla maɗankyar aka Yakub wa. Antə tsa baɗitə səlka ata kəra ngkwarma'ni. Antə tsa pəla aka Yakub, “Na ali maɗankyar, ma apani wa I ata mta.”

²Antə ɗəffa Yakub ku ɓzi adzə Rahila, tə tsa pəla alari, “Gə namta apa I an Hyel ni ya, na ngkata ala gə ya maɗankyar ni?”

³Antə Rahila pəla, “Nggədza ngkwarmbwarna Bilha, ləmbwa adzə ni, kamnyar ka tsa yaɓəla ali maɗankyar. Antə atar apani I ata wutə maɗankyar tsuwa.”

⁴Antə Rahila kətə ngkwarmbwarni Bilha ni ka na aka Yakub apa mwalankiɗa. Antə Yakub ku ləmbwa adzə Bilha.

⁵Antə Bilha ku kətə hur ka yaɓəla ɓzər sal aka Yakub.

⁶Antə Rahila vəta alari thləm Dan, kamnyar tsa pəla, “Hyel ku wutə bwani tə I akwa, ka nggatə kurakəi, ka na ali ɓzər sal.”

⁷Antə Bilha na ngkwarmbwar Rahila ni jaktə kətə hur, ka yaɓəla aka Yakub ɓzər sal na suɗkur.

⁸Antə Rahila vəta alari thləm Naftali, kamnyar tsa pəla, “Gagəm na mwavər antə I hara ka ngkwarma'na, tsuwa I ku səma.”

⁹Sakatə Leya wuta abbər yarni ku thləthlata, antə tsa kətə ngkwarmbwarni Zilpa, ka na ni aka Yakub apa Mwalankiɗa.

¹⁰Antə Zilpa na ngkwarmbwar Leya ni ku yaɓəla ɓzər sal aka Yakub.

¹¹Antə Leya vəta alari thləm Gad, kamnyar tsa pəla, “I ku hara sa'a!”

¹²Antə Zilpa na ngkwarmbwar Leya jaktə yaɓəla ɓzər sal na suɗkur aka Yakub.

¹³Antə Leya vəta alari thləm Asher, kamnyar tsa pəla, “I ka kucali! Kamnyar kulini mwanki ata kəga ra abbər kucali.”

¹⁴Vir laga akwa sakar thla alkama, antə Ruben ləɓəla ka mwari akwa mtaku, ka wutə kuzəkər hara ka mwanki kətə hur, ka sənta aka mama'ni Leya. Antə Rahila pəla aka Leya, “Nutsa ali kuzəkər kəl hur natə ɓzər ngə si kəgari ni bu usa.”

¹⁵Amma Leya shinau alari ka pəla, “Ga akwa wula apa su na raka ya tə gə dlutsə salərna ni? Har ba kulini ga akwa bara ka gə dlutsə kuzəkər kəl hur natə ɓzərna ku si kəgari ni!” Antə Rahila pəla, “To, ma ga ku ni kuzəkər kəl hur tə ɓzər ngə si kəgari ni, mdərkəyir mwa ata pi ka ga ashina aviri.”

¹⁶Sakatə Yakub ku səvi akwa mtaku tahaku, antə Leya ləɓəla ka ra wutə ni, ka pəla alari, “Ashina aviri ni ga ata ra pi ka iya, kamnyar tə I ku masɓəla nga ka kuzəkər kəl hur natə ɓzərna si kəgari ni.” Antə Yakub ku pi ka tsa vir nda aviri.

¹⁷Antə Hyel ku nggatə adduwar Leya, antə Leya ku kətə hur ka yaɓəla ɓzər sal na ntəfkur aka Yakub.

¹⁸Antə Leya vəta alari thləm Issakar, kamnyar tsa pəla, “Hyel ku ni watsəɓərna, kamnyar tə I ku hamta ngkwarmbwarna aka salngkəya.”

¹⁹Antə Leya ku jaktə kətə hur ka yaɓəla ɓzər sal na ngkwakur aka Yakub.

²⁰Antə Leya vəta alari thləm Zebulun, kamnyar tsa pəla, “Hyel ku na ali cauta na ɓɗaku. Antə kulini salərna ata ni daraja, kamnyar I ku yaɓəla alari maɗashili ngkwa.”

²¹Aghəla nda antə tsa yaɓəla ɓzərngkwa, ka vətə thləmari Dina.

²²Antə Hyel ku ɗangtə Rahila, ka nggatə adduwarni, ka kəlar vəi yarni.

²³Antə tsa ku kətə hur ka yaɓəla ɓzər sal, ka pəla, “Kulini Hyel ku kəɓəla ra akwa səli.”

²⁴Antə tsa vəta alari thləm Yusuf, kamnyar tsa pəla, “Ka MTHLAKU jakəngkər ali ɓzər sal damwa.”

²⁵Aghəla tə Rahila ku yaɓəla Yusuf, antə Yakub pəla aka Laban abbər, “Salamtə ra, kamnyar kəi ngka avi akwa tsəɗiyirna.

²⁶Na ali mwankirna kəga maɗa'na, natə kamnyar ɗa antə I hara kəthlər ala gə ni, kəi təra ka da. Ga asənda abbər I ku ntəmta shanga su cipcippu kamnyar ɗa atar kəthlər tə I hara ala gə ni.”

²⁷Amma Laban pəla alari, “Ma I an ata pəla jirkur, to, jiri, I ku nggaɓəla atar hakdzi abbər MTHLAKU vədza ali barka ni kamnyar tə ga adzə ra azi ni.

²⁸Antə pəla watsəɓər nga, kəi ntəmta ala ga.”

²⁹Antə Yakub pəla alari, “Ga asəndə jili kəthlər natə I hara ala ga, ka laku tə thlayeri ar nga ku jaka akwa tsi.

³⁰Kamnyar akəmata I asi ni, mwaɓiyayeri ar ngə ni raka daci, amma kulini da ku hara hang ka duna. MTHLAKU ku vədza ala gə barka akwa kəlara bwa tə I ku hau tsi. Amma kulini, nawa antə I ata sə baɗitə vəi su aka kutakəyirna tsu ri?”

³¹Antə Laban pəla, “Man su tə kəi na gə ri?” Antə Yakub pəla, “I aɗi akwa pəla ka gə nta ali su laga wa. Amma ma ga an ata hara ali su ngəni ni, I ata ləkəma ka wula ala gə ciɓayeri ar nga.

³²Ndzi kəi dlarhə shanga kuta ciɓayeri ar nga ashina, kəi ɗəmbəla shanga təmayeri na jadlajadlari, ka shanga maɗa' gam na mənggəl mənggəlari, ka shanga kwi na jadlajadlari kəga na dlapdlappa. Da an ata ndzi watsəɓərna.

³³Antə apani, ga ata nggaɓəla jirkurərna, ma sakatə ga ku sə wulhə watsəɓərna. Kamnyar ma ga ku wutə kəlara kwi na aɗi jadlajadla wala dlapdlappa wa, wala maɗa' gam na mənggəl mənggəl wa, to suari ata ndzi su həlhəla.”

³⁴Antə Laban pəla, “To, ɓɗaku! Ndzi ka tsa hara apatə gə pəla ni.”

³⁵Antə Laban ku ɗəmbəla shanga nciwayeri na ka ɗaha wala na ka su dlapdlappa ata dza ɗa, ka shanga kwi na jadlajadla ka kəga na ka su dlapdlappa ata dza ɗa, kə kəlara kwi na ka su mwapu ata dzari, ka shanga maɗa' gam na mənggəl mənggəl, ka pwi ɗa akwa tsiya maɗashilərni ka da an wul ɗa.

³⁶Antə Laban fatə maɗashilərni ni ka mwaɓiyayeri ni ka baɗitə mwa na ciju har vir makər, ka ra pwi ɗa ciju ta Yakub. Amma ar Yakub, tsa ləkəma ka wul mambila mwaɓiyayeri ar Laban ni.

³⁷Antə Yakub nthləi tsiya nfwayeri laga na miraku tə mda ana kəga popla, ka almon, ka armon, ka pwaləmta vəyayeri laga ata dza ɗa, tə mda ata mzhi wutə ɗahayeri na tyau tyauwa mwapmwapu ata dza zwalayeri arɗa ni.

³⁸Antə tsa pwi zwalayeri ar tsiya nfwayeri natə tsa pwaləmta dza ɗa ni akəma ciɓayeri, akwa vəi tə mda ana pwi ala ɗa yimər sa. Tsa pwi ɗa anda kamnyar mwaɓiyayeri ni shilari ka mwankyari ana fəldzi akwa sakatə da ku si akwa sa yimi.

³⁹Mwaɓiyayeri ni ana fəldzi akəma zwalayeri na ka ɗahə ni, an su na hara mwaɓiyayeri ni ana yaɓəla maɗa' ɗa ka ɗahayeri tyau tyauwa ka su dlapdlappa ata dza ɗa ni.

⁴⁰Antə Yakub fwaɓəla maɗa' gam ni kazhar kwiyayeri ni, ka vu tə mbəkəl təmayeri ni thlentə kəma ɗa təbwar təmayeri ar Laban, watau təmayeri na ka ɗahayeri tyau tyauwa ka na mənggəl mənggəl ni. Apani antə tsa fwaɓəla mwaɓiyirni, tsa aɗi paktə ɗa ka ciɓər Laban wa.

⁴¹Antə kəlara sakatə mwaɓiyayeri na ka duna ni akwa bara fəldzi, Yakub ana pwi zwalayeri ni akəma ɗa, akwa vəi tə mda ana pwi ala ɗa yimər sa ni, kamnyar ka da fəldzi akəma zwalayeri ni.

⁴²Amma ma mwaɓiyayeri na kula duna, tsa aɗi ana pwi zwalayeri ni akəma ɗa wa. Apani mwaɓiyayeri na kula duna ni ku ndzi ar Laban, antə na ka duna ni ku ndzi ar Yakub.

⁴³Apani antə Yakub ku ndzi ka gəna swaiswai. Tsa ku ndzi ka ciɓayeri na ol'ola hang, ka mafayeri shili ka mwanki, ka dləkəmauwayeri, ka kwarayeri.