Read bura-pabir Baɗitari 31 Bible Online

Baɗitari 31 - bura-pabir bible

Baɗitari 31

¹Tsuwa akwa saka ndaga Yakub ku nggatə maɗashilər Laban akwa pəla abbər, “Yakub ku famnya shanga sur baba' mburu. Ai shanga gənarni ni thlata akəla baba' mburu.”

²Tsuwa Yakub ku wulɓəla abbər Laban aɗi akwa ncanta alari hirkur apa na hwatu wa.

³Antə MTHLAKU pəla aka Yakub, “Ngka akwa tsəɗiyir kəkayeri ar nga, adzə mji na yangkura ga. Tsuwa I ata ndzi ata vəi duku ka ga.”

⁴Antə Yakub thlentə kuraku aka Rahila ka Leya abbər ka da ra wutə ni akwa mtaku, akwa vəi tə ciɓayeri arni ni ata.

⁵Antə tsa pəla ala ɗa, “I ku wuta abbər baba' giri aɗi akwa ncanta ali hirkur apa na hwatu wa, amma Hyelər baba'na tsu ata vəi duku ka iya.

⁶Tsuwa japwa giri ka səndari abbər I ku hara kəthlər ka duni shang aka baba' giri.

⁷Amma wala apani baba' giri ku fəi ra, ka pagali watsəɓayeri arna har ka kuma, amma Hyel aɗi hir zhar ni ka tsa dəkəi ra wa.

⁸Kamnyar ma tsa pəla, ‘Na ka dza ɗa dlapdlappa ni ata ndzi watsəɓər nga,’ to, shanga mwaɓiyayeri ni ata ya maɗa' ka su dlapdlappa ata dza ɗa. Tsuwa ma tsa pəla, ‘Na ka dza ɗa tyau tyauwa ni ata ndzi watsəɓər nga,’ to, shanga mwaɓiyayeri ata ya maɗa' ka su tyau tyauwa ata dza ɗa.

⁹Apani antə Hyel ku famnya mwaɓiyayeri ar baba' giri ka hamta ɗa ali.”

¹⁰“Akwa sakar kəl hur ar mwaɓi ni antə I suni. Antə akwa suni ni I ku wuta abbər nciwayeri na ka ɗaha tyau tyauwa, ka na ka su dlapdlappa, ka na jadlajadla, an akwa fəl mwala akwa ciɓə ni.

¹¹Antə mdərthlentərhyel gari ali akwa suni ni ka pəla, ‘Yakub.’ Antə I ndəra ka pəla ‘Naam, nggədza ra.’

¹²Antə tsa pəla, ‘Hapta nca ga kara wul su, ga ata wuta abbər shanga nciwayeri na akwa fəl mwala akwa ciɓə ni ɗaha ata dza ɗa tyau tyauwa, wala dlapdlappa, wala jadlajadla. I hara apani ni kamnyar I ku wutə shanga suayeri tə Laban akwa harari ala ga.

¹³I an Hyel na ncantədzi ala ga akwa Bethlel, akwa vəi tə gə pungkər mal ata kəra shanggam, ka kahyel ali ni. Antə kulini, thlatə kazhar vəi ngəni, ka gə ngka akwa tsəɗi tə mdə ku yaɓəla nga akwa.’ ”

¹⁴Antə Rahila ka Leya pəla aka Yakub abbər, “Su damwa aɗi na ku mbili ala yeru akəla baba' yeru tə yeru ata fa kifari ya?

¹⁵Tsa aɗi namtə yeru apa mjir tsəɗi na aɓəla ciju wa ya? Kamnyar tsa ku ɗələmta yeru, tsuwa kulini tsa ku tsi shanga kwaba na alari kamnyar yeru ni.

¹⁶Shanga gəna ngəni tə Hyel dlutsa akəla baba' yeru ka na ala gə ni, ai shang da ar yeru kəga maɗa' yeru. Antə apani, hara kəlara su tə Hyel ku pəla ala ga.”

¹⁷Antə Yakub ku thlatə ka putə maɗa'ni kəga mwankirni ata dləkəmauwayeri.

¹⁸Antə tsa fatə shanga mwaɓiyayeri arni, ka shanga kariyayeri arni tə tsa wuta ahar Paddan Aram ka təra ka da, kamnyar mwari adzə baba'ni Ishaku akwa tsəɗi Kanana.

¹⁹Suayeri ngəni hara akwa sakatə Laban ləɓəla ka təra mwari akwa thla shishir təmayeri arni. Tsuwa akwa saka ngəni tsa aɓəla ni, antə Rahila ləvəi ka həltə haptayeri ar kutakəyir baba'ni.

²⁰Tsuwa Yakub ku pwaktəmta Laban na mdər Aram təng tə tsa aɗi pəla alari abbər tsa ata hwi təra wa.

²¹Antə apani Yakub ku fatə shanga suayeri tə tsa kəgari ka hwi təra. Sakatə tsa thlata antə tsa fəlɓəla Thlyagha Yufiretis, ka thlentə kəmari təbwar tsəɗiyir garayeri ar Gileyad.

²²Sakatə Laban nggata akwa vir na makərkur abbər Yakub ku hwi ka təra,

²³antə tsa fatə yangkurayerari laga, ka nu dəlpa Yakub. Akwa vir na murfəkur antə da kəɓa ka Yakub akwa tsəɗiyir garayeri ar Gileyad.

²⁴Amma Hyel ku jaktə ncantə kərni aka Laban na mdər Aram akwa suni aviri, ka pəla alari, “Ka gə hara hangkal ka kəlara su tə ga ata pəla aka Yakub, wala su na ɓɗaku wala na ɗimi.”

²⁵Antə Laban ku kəli Yakub. Akwa saka ngəni Yakub ku nci tentərni akwa garayeri ar Gileyad, antə Laban ka yangkurayerari ni nci tentayeri arɗa tsu anda akwa ar Gileyad ni.

²⁶Antə Laban pəla aka Yakub, “Man su tə gə hara nə ri? Gə pwaktəmta ra, ka fatə maɗa'na na maɗankwi ka təra ka da apa mwanki tə mdə fata akwa mpa!

²⁷Kamnyar mi tə gə nggwar hwi nə ri, tə gə pwaktəmta ra, ka təra kula gə pəla ali ni? Ai ma ga an pəla ali, sakani I ku salamtə nga ka kucali kəga hayeri, kəga sur tsa apa kəcaikəcai ka yakandi.

²⁸Tsuwa kamnyar mi tə ga aɗi zhar kəi salamtə maɗa'na na maɗankwi kəga kəkayeri arna atar paktə kəsəm mnyi kəga da wa ri? Ai ngəni cakukur an tə gə hara!

²⁹I ka duna kəi hara ala gə su na ata dəkəi nga, amma naha aviri Hyelər baba' nga gari ali abbər, ‘Ka gə hara hangkal ka kəlara su tə ga ata pəla aka Yakub, wala su na ɓɗaku wala na ɗimi.’

³⁰I asənda abbər gə hwi təra ni kamnyar ga akwa mwaɓər ngka akwa kutakəyir baba' nga, amma kamnyar mi tə gə həltə haptayeri arna ri?”

³¹Antə Yakub ku shinau aka Laban ka pəla, “I akwa thlivəra, kamnyar I dzama abbər ga ata sə dlutsə maɗa' nga na maɗankwi ni akəli ka dwali.

³²Amma kəlara mdə natə ga ku wutə ni ka haptayeri ar nga, mda ata tsi ni. Antə tsu ata nca mjir mburu ni, ncaɓəla ali su tə I kəgari na ar ngə ni, ka gə kəta.” Yakub aɗi sənda abbər Rahila an həltə haptayeri ni wa.

³³Antə Laban ləkwa tentər Yakub ka wulha, ka ləɓəla ka ləkwa tentər Leya, ka ləɓəla ka ləkwa ar maɗankwi na suɗa na mafa ni, amma tsa aɗi wutə haptayeri ni wa. Antə tsa ləɓəla ka ləkwa tentər Rahila.

³⁴Azha Rahila an fatə haptayeri ni, ka pu ɗa akwa thləvur dləkəmau, ka ndzəndzi ata kər. Antə Laban dlarhə shanga kuta tent ni akwa pakari, amma tsa aɗi wutə haptayeri ni wa.

³⁵Antə Rahila pəla aka baba'ni abbər, “Baba, ɗəffa ga aɗiya ɓzə kamnyar tə I aɗi thlatə wa ni wa, kamnyar I ka kəca ar thliya thliya.” Antə Laban ku paka amma tsa aɗi wutə haptayeri ar kutakəyirni ni wa.

³⁶Antə ɗəffa Yakub ɓza, tə tsa aɗi mzhi mbwi ɗəffari wa. Antə tsa yu Laban abbər, “Man tə I ɓzamtə ri? Man biku tə I hara ri, har tə ga akwa nu ra ka ɗəffu apani ni?

³⁷Nggədza kulini ga ku dlarhə shanga kariyayeri arna, man sur kutakəyir nga tə gə wuta akwa nca ɗa ri? Ma aɗi, pwi ɗa azi ata bəbal ka kamnyar ka mjirna ka mjir nga shang wuta, ka da thlamta ala mwa shariya ata kər.

³⁸Kulini mwa ku hara məva sərkumari ka ga, təmar nga wala kwiyir nga aɗi na ku ɗar sartə wa. Tsuwa I aɗi ɗar ɓɗəmnya gamər ciɓayeri ar ngə wa.

³⁹Tsuwa kəlara mwaɓiyir nga natə mwaɓi mtaku ku tsi, I aɗi ana ghər sənta ala gə wa, I ana kəta asarari. Tsuwa ga ana bara kəi ntəmta ala gə kəlara mwaɓi tə mdə ku həlta akwa ciɓər nga, wala natə mdə həlta təpci wala na aviri.

⁴⁰Ka hang tə I ana ɗar bwani təpci kamnyar bwarbwarkur pci, ka ɗar bwani aviri kamnyar mtathlakkur, har tə ka heni zhar ta ləkwa nci.

⁴¹Apani antə I ku ɗar bwani akwa shanga məvayeri ngəni sərkumari tə I ndzi aviyar ngkiri ni. I ku hara kəthlər ala ga ar məva kumnya nfwar kamnyar kəl maɗankwiyir nga na suɗə ni, ka hara məva ngkwa kamnyar ciɓər nga. Tsuwa ga ku kəɗar pagali watsəɓərna har ka kuma.

⁴²Ma aɗi kamnyar Hyelər baba'na, Hyelər Ibrahim, Hyel tə mda ana thlivərari na Hyelər Ishaku an adzə ra wa, sakani ga ku kədləmta ra kula su akwa tsi. Amma Hyel ku wutə bwaniyayeri arna, ka jili kəthlər tə I hara. An su na hara tə tsa mnya ala gə naha aviri ni.”

⁴³Antə Laban shinau ka pəla aka Yakub abbər, “Ai mwankir ngə ni maɗa'na, maɗankyarər ɗa ni kəkarna, tsuwa ciɓayeri ngəni ma arna. Shanga su tə ga ku wuta azi an arna. Amma ashina man su tə I ata mzhi harari aka maɗa'na na mwankir ngə ni, wala aka maɗankyarər ɗa tə da yaɓəla nə ri?

⁴⁴Kulini, asər ka mwa hara mnya duku akwa daɓwa mwa, ka tsa ndzi seɗa akwa daɓwa mwa.”

⁴⁵Antə Yakub kətə pela laga ka nci ni tə tsa ndzi shanggam.

⁴⁶Antə Yakub pəla aka mjirni, “Tsaptə giri pelayeri.” Antə da tsaptə pelayeri ata vəi duku tyaləm. Antə da ku səm susəma anda adzə pela na tsaptsaɓari ni.

⁴⁷Antə Laban vəta alari thləm Yegar Sahaduthla, watau Pela Tsaptsaɓa ar Seɗa. Amma ar Yakub tsa ana kəga thləma pela tsaptsaɓə ni Galeyed.

⁴⁸Antə Laban pəla aka Yakub abbər, “Ashina pela tsaptsaɓə ngəni ata ndzi seɗa akwa daɓwa mwa.” Kamnyar ngəni mda ana kəga thləma vəi ni Galeyed ni.

⁴⁹Tsuwa Laban ku kəga thləma pela tsaptsaɓə ni Mizpa, kamnyar tsa pəla, “Ka MTHLAKU pungkər ncari ata kəra mwa, akwa sakatə mwa aɗi ata kəma duku wa.

⁵⁰Ma ga ku hara bwani aka maɗa'na ni, wala ma ga ku kəl mwanki damwa ata kəra maɗa'na ni, wala tə mdə damwa aɗi adzə mwa wa ni, ka gə ɗangta abbər Hyel an seɗa akwa daɓwa mwa.”

⁵¹Antə Laban pəla aka Yakub, “Wulha pela tsaptsaɓa ngəni ka shanggam natə I nci akwa daɓwa mwa ni.

⁵²Pela tsaptsaɓə ngəni an seɗa, shanggam ngəni tsuwa seɗa, abbər I aɗi ata təramta pela tsaptsaɓa ngəni ka shanggam ni ka mwari adzə nga kamnyar hara ala gə ɗimikur wa. Tsuwa ga aɗi ata təramta pela tsaptsaɓa ngəni ka shanggam ni ka si adzə ra kamnyar sə hara ali ɗimikur wa.

⁵³Antə ka Hyelər Ibrahim, na Hyelər Nahor, na Hyelər baba' ɗa, an hara shariya akwa daɓwa mwa.” Antə Yakub ku kahyel akwa thləma Hyel tə mda ana thlivərari, na Hyelər baba'ni Ishaku.

⁵⁴Antə Yakub ku tsi mwaɓi ka hara saɗaka kəgari ata kəra gar ni, ka kəgatə mjirni ka da səm susəma. Antə da ku səm susəma ka pi ata kəra gar ni har tə viri kura ala ɗa.

⁵⁵Səɓəla ɗəpari ɗəɗəpə mbing antə Laban thlatə ka vədzə mnyari aka maɗa'ni na mwankir Yakub, ka kəkayeri arni, ka vədza ala ɗa barka. Aghəla nda antə tsa thlatə ka ngka avi aharngkiɗa.