Read bura-pabir Baɗitari 37 Bible Online

Baɗitari 37 - bura-pabir bible

Baɗitari 37

¹Yakub ku ləkəma ka ndzəndzi akwa tsəɗi Kanana vəi tə baba'ni ku ɗar ndzəndzi akwa,

²antə ngəni an labar ar mjir kutakəyir Yakub. Sakatə Yusuf na ɓzər Yakub tsu ɓzərdakwi ka məvari kumnya murfa, tsa ana ɓəla təma kəga kwi ata kəma duku ka maɗada'ni, na maɗashilər Bilha ka Zilpa na mwankir baba'ni. Antə vir laga Yusuf sənta aka baba' ɗa labar ar suayeri na ɗimi ɗimi tə maɗada'ni ana hara.

³Tsuwa Israila ku hir Yusuf təramta shanga mambila maɗashilərni, kamnyar mdə yaɓəla ni alari akwa sakatə tsa ku hali. Antə tsa nduɓta alari ləptu laga na saɓəl ka tsi ka tsi tə mdə dəɓatə ɓɗaku laga.

⁴Sakatə maɗada'ni ni wuta abbər baba' ɗa hir Yusuf təramta ɗa shang, antə da baɗitə nggəlar ncari ka duna, har da aɗi ana gari alari akwa msərakur wa.

⁵Vir laga Yusuf hara suni laga, amma sakatə tsa pəla suni ni aka maɗada'ni, antə da viri nggəlar ncari.

⁶Tsa pəla ala ɗa, “Ngga giri jili suni tə I hara.

⁷Mburu akwa mbwa julangayeri ar alkama akwa faku, antə julangərna thlatə ka thləthlatə dwaɗu. Antə julangayeri ar giri kalaktə arna ni ata ɗəffu, ka zuzuri alari.”

⁸Antə maɗada'ni pəla, “Gə tamata abbər ga ata ndzi kuthli, ka hara kuthlikur ata kəra yeru ya?” Antə da vəri nggəlar ncari təramta na hwatu kamnyar suniyirni ni, ka tsuwa kamnyar su tə tsa pəla ata kəra ɗa ni.

⁹Antə Yusuf jaktə suni ka damwa, ka pəla aka maɗada'ni ni, “I ku jaktə hara suni damwa, natə I wutə pci ka thliya ka sasəlkayeri kumkantang akwa zuzuri ali.”

¹⁰Tsuwa tsa ku pəla suni ngəni aka baba'ni, antə baba'ni ku mpa alari abbər, “Jili suni madi tə ga akwa harari nə ri? Gə tamata abbər mama' nga, ka maɗada' nga, ka iya, ata sə zuzuri ala gə ya?”

¹¹Antə maɗada' Yusuf ni ləkwa səlkərni, amma baba'ni ndzi akwa dzama ata kəra su ngəni akwa ɗəffari.

¹²Vir laga sakatə maɗada' Yusuf ku təra ka ciɓər baba' ɗa akwa ɓəla ahar Shekem,

¹³antə Israila pəla aka Yusuf, “I nggata abbər maɗada' nga akwa ɓəla ahar Shekem. Asər kəi thlentə nga adzə ɗa.” Antə Yusuf pəla, “To.”

¹⁴Tsa pəla aka Yusuf, “Mwari, kara wulhə lapiyakur maɗada' nga ka lapiyakur mwaɓiyayeri ni, ka gə sənta ali labar ata kəra ɗa.” Apani antə baba'ni ku thlentə ni, tə tsa ku thlata anda akwa Mular Hebron ni ka təra. Sakatə tsa mzhitə Shekem,

¹⁵antə mdə laga ku wutə ni akwa kadla akwa mtaku. Antə mdə ni yu ni abbər, “Man tə ga akwa pakari ri?”

¹⁶Antə Yusuf pəla, “I akwa paka maɗada'na. Nənga ga səndə vəi tə da akwa ɓəla ata kulini ri, kara pəla ali usa!”

¹⁷Antə mdə ni pəla alari, “Da ku zhar vəi ni, kamnyar I ku nggatə ɗa akwa pəla abbər da ata təra mwari ahar Dothlan.” Antə Yusuf ku nutə maɗada'ni, kara wutə ɗa ahar Dothlan ni.

¹⁸Sakatə da wutə ni tsu ciju akəmata tsa amzhətə ɗa, antə da pəli mnya ɗa ata kərari abbər ka da tsi ni.

¹⁹Da pəla aka nvwa ɗa abbər, “Ndaga mdər suni akwa si.

²⁰Asər giri ka mburu tsi ni, ka mburu psu ni akwa pal akwa nca jiɓayeri na kula yimi ni, ka mburu pəla aka baba' mburu abbər mwaɓi mtaku laga an ɓɗəmnya ni. Antə mburu ata wutə tsikəra suniyirni ni.”

²¹Amma sakatə Ruben ku nggatə gari ni, antə tsa mbuli ni akwa tsiya ɗa, ka tsa msərantə mpikari akwa tsiya ɗa, akwa pəla, “Mburu aɗiya kəl mpikari wa.

²²Kuji ka mburu psu ni akwa jiɓə na kula yimi azi akwa mtaku ni. Amma usa, giri aɗiya tsəkwar ni wa.” Ruben pəla apani ni kamnyar ka tsa msərantə mpika Yusuf akwa tsiya ɗa, ka ngka ka tsa avi aka baba'ni.

²³Antə sakatə Yusuf ku si adzə maɗada'ni, antə da ngkəi ni, ka fəi ləptərni na saɓəl ka tsi ka tsi tə mdə dəɓatə ni.

²⁴Antə da kətə ni, ka psu ni akwa jiɓa, tsuwa yimi aɗi akwa jiɓə ni wa.

²⁵Antə da ndzəndzi ka da səm susəma. Amma sakatə da haptə kəra ɗa, təng da wutə mjir Ishmayel laga thlata ahar Gileyad akwa si, ata kəma duku ka dləkəmauwayeri arɗa. Tsuwa dləkəmauwayeri ni ka kəla ar kari shiwur na msəra msəra, ka mal na kuzəkər kəta, kəga mur, ata lakur mwantari ahar Masar.

²⁶Antə Yahuda pəla aka maɗa'ma'ni abbər, “Man dlar tə mburu ata wutari, ma mburu tsi ɓzərda' mburu ni, ka ɗuwar mamshirni nə ri?

²⁷Asər giri ka mburu ɗələmta ni aka mjir Ishmayel, tsiya mburu aɗiya tsəkwar ni wa, kamnyar tsa ɓzərda' mburu, ka mamshir mburu.” Antə maɗama'ni ku kələngkər alari.

²⁸Antə sakatə mjir Ishmayel na ahar Midiyan, watau mjir Ishmayel na ana fəli ni ku si akwa təramta adzə ɗa, antə maɗada' Yusuf ni kəɓəla ni akwa jiɓə ni, ka ɗələmta ni ata kəra liyar adzərfa sərkumari aka mjir Ishmayel. Antə mjir Ishmayel ni kətə ni, ka mwantə ni ahar Masar.

²⁹Sakatə Ruben ku ngka ata mnya jiɓə ni, ka wuta abbər Yusuf aɗi akwa jiɓə ni kəra wa, antə tsa kukwahəmta ləptərni kamnyar ɗəffari na ɓza.

³⁰Antə tsa ngka adzə maɗama'ni ka pəla ala ɗa, “Ɓzər dakwi ni aɗi anda kəra wa, ya ləmari?”

³¹Antə da kətə ləptər Yusuf ni, ka ngkəi nciwa laga ka thlamta wulyari, ka nciu ləptər Yusuf ni akwa mamshir kwi ni.

³²Antə da kətə ləptu na saɓəl ka tsi ka tsi tə mdə dəɓatə ni ka mwanta aka baba' ɗa, ka pəla, “Nggədza ngəni, an su tə yeru wuta. Wulha, ngəni an ləptər ɓzər ngə ni ja shiwan?”

³³Sakatə tsa nggaɓəla ləptu ni, antə tsa pəla, “Əm! An ləptər ɓzərna ni ja! Ngəni mwaɓi mtaku laga na ɗimi an ɓɗəmnya ni! Kula nuhum Yusuf ku kukwacahəmtadzi!”

³⁴Antə Yakub kwahəmta ləptərni, ka ndzəndzi akwa dasa, ka tuwa ɓzərni ni virayeri hang.

³⁵Antə shanga maɗa'ni shili ka mwanki ku si kamnyar ka da shiktə ni. Amma tsa nggəlar ta shiktədzi, ka ləkəma akwa tuwa abbər, “Awa, zhar gir ra, kəi ləghəi ra wutə ɓzərna akwa duniyar mji mtəmta!” Apani antə baba' Yusuf ni ku ləkəma ka tuwa ɓzərni ni.

³⁶Azha shang tə su ngəni akwa hara ni, mjir Ishmayel na ahar Midiyan ni ku kurtə ɗələmta Yusuf aka Potifar na olər mjir sək kəra kuthlir Masar.