Read bura-pabir Baɗitari 40 Bible Online

Baɗitari 40 - bura-pabir bible

Baɗitari 40

¹Aghəla nda, antə mdə na olər mjir hamta sur sa aka kuthli ka olər mjir ɓwa buradi aka kuthlir Masar ku hara su na ɓzamtə ɗəffa kuthlir Masar ni.

²Antə ɗəffa kuthli ku ɓza adzə mjir kəthlər arni na suɗə ni, watau olər mjir hamta sur sa ka olər mjir ɓwa buradi.

³Antə tsa hambwa ɗa akwa mbwar pərsəna akwa kəyir olər mjir sək kəra kuthli, akwa mbwar pərsəna tə mdə vəi Yusuf akwa ni.

⁴Antə da ku ɗar fəi anda akwa pərsəna ni, tsuwa olər mjir sək ni zhar ɗa akwa tsiya Yusuf, abbər ka Yusuf ndzi mdər dlar ɗa, antə tsa ku dlar ɗa.

⁵Vir laga aviri təng olər mjir hamta sur sa aka kuthlir Masar ni ka olər mjir ɓwa buradi ni hara suni laga akwa kəyir pərsəna ni, waskəi ka suniyirni ka karapwari zum ta ar nvwani.

⁶Sakatə Yusuf si adzə ɗa ɗəɗəpa, tsa wuta abbər da akwa damitədzi.

⁷Antə tsa yu ɗa abbər, “Kamnyar mi tə kəma giri aɗi pwipwiyari ashina wa ri?”

⁸Antə da pəla alari, “Yeru ku suni, amma mdər mzhi ngkərɓəla ala yeru karapur ɗa aɗi wa.” Antə Yusuf pəla ala ɗa, “Aɗi Hyel an ka dunar ngkərɓəla karapur suniyayeri wa ya? Pəla giri ali suniyayeri ni, bu usa.”

⁹Antə olər mjir hamta sur sa aka kuthli ni ngkərɓəla suniyirni ni aka Yusuf, abbər, “Akwa suniyirna ni I wutə nfur anap akəmi.

¹⁰Tsuwa nfu ni ka tsiyayerari makər, natə təkəma tə thlaliyayeri arɗa baɗitə ɗəɗa, antə da baɗitə pu pukdla, tsuwa kula shamta saka təng gwandzalər yar anap ni ng'ha.

¹¹Tsuwa arna, kwapər kuthli akwa tsi. Antə I kətə yar anap ni, ka ntsarwa yimari akwa kwapə ni, ka hamta aka kuthli akwa tsiyari.”

¹²Antə Yusuf ku pəla alari, “Nggədza karapur suniyir ngə ni. Tsiyayerari na makər ni an vir makər.

¹³Akwa kuta vir makər kuthli ata kəɓəla nga akwa pərsəna ni, ka tsa ngka ka ga akwa vəi kəthlər ar nga, ka gə ləkəma ka hamta sur sa akwa kwapu aka kuthli apatə ga ana hara hwatu.

¹⁴Amma ka gə sə ɗangtə ra, ma sakatə shanga su ku ndzəndzi kalkal ala ga, ka gə hara ali ɓɗakkur, ka gə kamnya thləmi aka kuthli, kamnyar ka mdə kəɓəla ra akwa mbwa ngəni.

¹⁵Kamnyar jirkurari, mdə an həltə ra akwa tsəɗiyir mjir Ibrani. Azi ni tsuwa I aɗi hara su ɗimi na ku mzhi ka mdə vu ra akwa pərsəna wa.”

¹⁶Sakatə olər mjir ɓwa buradi ni wuta abbər karapur suniyir mdər hamta sur sa aka kuthli ni ku ndzi ɓɗaku, antə tsa pəla aka Yusuf, “I ma I ku hara suni laga. Antə akwa suniyirna ni I wutə thlambəlayeri makər ka buradi akwa ata kəri.

¹⁷Amma thlambəl na amta ata kər ni ka susəmayeri zumzum tə mdə ɓwata aka kuthli. Amma ɗikayeri akwa səm susəmayeri na akwa thlambəl na ata kəri ni.”

¹⁸Antə Yusuf pəla alari, “Nggədza karapur suniyir ngə ni. Thlambəlayeri na makər ni an vir makər.

¹⁹Akwa kutar vir makər kuthli ata nthləmta kəra ga, ka tsa hahəi mshiyir nga ata nfwa. Antə ɗikayeri ata səm kumər dza ga.”

²⁰Akwa vir na makərkur, na an vir kucali ar yar kuthli, antə kuthli ni hara susəmər kucali na ola aka shanga kwakunayeri arni. Tsa fwaɓəla olər mjir hamta sur sa ka olər mjir ɓwa buradi akwa pərsəna ni, ka səntə ɗa akəma kwakunayeri arni.

²¹Antə tsa ngka ka olər mjir hamta sur sa ni akwa vəi kəthlərərni, tə tsa ku ləkəma ka hamta sur sa aka kuthli apa na hwatu.

²²Amma ar olər mjir ɓwa buradi ni mdə ku mbwamta ni ata nfwa, apatə Yusuf ku ngkərɓəla.

²³Amma olər mjir hamta sur sa ni aɗi ɗangtə Yusuf wa, tsa fwari ata kərari.