Read bura-pabir Baɗitari 41 Bible Online

Baɗitari 41 - bura-pabir bible

Baɗitari 41

¹Aghəla məva suɗa kalkal, antə kuthli suni tsuwa, abbər tsa athləthlata ata mnya Thlyagha Nayil

²antə thlayeri laga murfa na ɓɗakɓɗaku təksətəksari səɓəla akwa Thlyagha Nayil ni ka baɗitə ɓɗə kusar.

³Antə thlayeri damwa murfa na tegtegari ɗimi ɗimiya tsuwa ku səɓəla akwa Thlyagha Nayil ni, ka thləthlata adzə thlayeri na ntangkəma ata mnya maghəm ni.

⁴Antə thlayeri na ɗimi ɗimiya tegtegari ni ɓɗəmnya na ɓɗakɓɗaku təksətəksari murfə ni. Antə kuthli ku thlata ata heni.

⁵Antə heni fatə ni ka damwa, tə tsa jaktə suni na suɗkur. Akwa suni ngəni tsa wutə sanggamayeri na tsatsari ɓɗakɓɗaku murfa ata kədlar mthli pal.

⁶Tsuwa təkəma aghəla ɗa sanggamayeri laga na raka raka murfa tə shambar raghəi ulanta ku səɓəla.

⁷Antə sanggamayeri na raka raka murfə ni ndasəmnya sanggamayeri na tsatsari ɓɗakɓɗaku murfə ni. Sakatə kuthli ni thlata ata heni, təng tsa wuta abbər azha shang suni.

⁸Kurər virari ɗəɗəpa, təng tsa ləkwa damitədzi. Antə tsa thlentə ka mdə kəga alari shanga ɗeaghayeri na akwa tsəɗi Masar, ka shanga mji na ɗəɗu akwa tsəɗi ni. Antə kuthli pəla ala ɗa suniyirni, amma mda aɗi wala duku na mzhi ngkərɓəla alari karapur suni ni wa.

⁹Antə olər mjir hamta sur sa aka kuthli ni pəla aka kuthli ni abbər, “Ashina, I ku ɗangtə vəi sharna.

¹⁰Sakatə ɗəffa ga ɓzi adzə buɗayeri ar nga, ga ku fatə yeru japu ka olər mjir ɓwa buradi ni, ka pu yeru akwa mbwar pərsəna akwa kəyir olər mjir gadi.

¹¹Təng vir laga aviri japwa yeru suni, waskəi ka suniyirni ka karapwari zumzum ta ar nvwani.

¹²Tsuwa ɓzərdakwi laga na mdər Ibrani aɗi adzə yeru, tsa buɗar olər mjir gadi. Antə sakatə yeru pəla alari, tsa ngkərɓəla ala yeru karapur suniyayeri ni, waskəi ka karapur suniyirni.

¹³Tsu apatə tsa ngkərɓəla ala yeru, antə suari ku ndzi tsu apatə tsa pəla. Mdə ku ngka ka iya akwa kəthlərərna, antə mdə ku mbwamta olər mjir ɓwa buradi ni.”

¹⁴Təkəma antə kuthli ku thlentə ka mdə kəga alari Yusuf, antə mdə ku mwari ka huva ka kəɓəla ni kazhar pərsəna ni. Sakatə Yusuf ku shimta kərari, ka pali ləptərni, antə tsa mwari akəma kuthli ni.

¹⁵Antə kuthli pəla aka Yusuf, “I ku hara suni, amma mdər mzhi ngkərɓəla ali karapwari aɗi wa. Antə I nggata abbər ar ngə ma ga ku nggatə suni ni, ga ata mzhi ngkərɓəla karapwari.”

¹⁶Antə Yusuf pəla aka kuthli abbər, “Aɗi I an ata mzhari ni wa. Hyel an ata hamta aka kuthli amsa na kalkalari.”

¹⁷Antə kuthli pəla aka Yusuf, “Akwa suniyir na ni I wutə I athləthlata ata mnya Thlyagha Nayil.

¹⁸Antə I wutə thlayeri laga na ɓɗakɓɗaku təksətəksari murfa səɓəla akwa thlyagha ni, ka baɗitə ɓɗə kusar.

¹⁹Antə thlayeri damwa na ata hara cika aka mda, tegtegari, ɗimi ɗimiya, murfa səɓəla. I aɗi ɗar wutə jili ɗimikurər ɗa akwa tsəɗi Masar wa.

²⁰Antə thlayeri na ɗimi ɗimiya tegtegari ni ɓɗəgəmnya thlayeri na ɓɗakɓɗaku təksətəksari murfa na səɓəla ntangkəma ni.

²¹Amma wala sakatə da ku ɓɗəmnya ɗa, mda aɗi na ata sənda abbər da ku ɓɗə su wa, kamnyar da tsu ɗimi ɗimiya tegtegari apatə na hwatu. Aghəla nda antə I ku nthləmta nci.

²²Tsuwa akwa suniyirna ni I ku wutə sanggamayeri murfa na tsatsari ɓɗakɓɗaku murfa ata kədlar mthli pal.

²³Antə sanggamayeri damwa murfa na raka raka, kula munya, natə shambar bwar raghəi ulanta, ku səɓəla aghəla ɗa.

²⁴Antə sanggamayeri na raka raka murfa kula munya ni ku ndasəmnya sanggamayeri na tsatsari ɓɗakɓɗaku murfə ni. Antə I pəla suniyayeri ni aka ɗeaghayeri ni, amma wala mdə duku aɗi na mzhi ngkərɓəla ali karapur ɗa wa.”

²⁵Antə Yusuf pəla aka kuthli, “Karapur suniyayeri ngəni suɗə ni duku. Hyel ku ncaɓəla aka kuthli su tə tsa akwa bara harari.

²⁶Thlayeri ngəni na ɓɗakɓɗaku murfə ni an məva murfa, tsuwa sanggamayeri ngəni na ɓɗakɓɗaku murfə ni an məva murfa. Antə karapur ɗa shang duku.

²⁷Tsuwa thlayeri na murfa, na ɗimi ɗimiya tegtegari, na səɓəla aghəla ɗa ni, ka sanggamayeri na murfa, na raka raka kula munya natə shambar bwar raghəi ulantə ni, an məva murfa ar mi.

²⁸Tsu apatə I ku pəla ala ga, Hyel ku ncanta ala gə su tə tsa akwa bara harari.

²⁹Məva murfa ata sə si na ata ndzi məvar susəma na hang akwa shanga tsəɗi Masar.

³⁰Amma aghəla nda mda ata hara məva murfa ar mi. Antə mwavərkur mi ni ata vu ka mdə fwari ata kəra shanga hangkur susəma tə mdə wuta akwa tsəɗi Masar ni. Antə mi ni ata kwasəmnya tsəɗi ni.

³¹Mi ni ata ndzi ɗimi kamta, har tə mji ata fwari abbər mdə ku ɗar wutə susəma hang akwa tsəɗi ni.

³²Su na hara tə suniyir ngə hara ka bwa suɗə ni an kamnyar tə su ngəni thlata akəla Hyel, tsuwa Hyel ata haratə suari kula shamta saka.

³³Antə kulini ka barkar dəkəl, carɓəla mdə na ɗəɗu ka səndər su, ka tsa vəngkər ni ata kəra tsəɗi Masar.

³⁴Tsuwa ka barkar dəkəl putə mji na ol'ola ata kəra tsəɗi ni, ka da tsaptə duku akwa ntəfu ar shanga sur fakər tsəɗi Masar akwa məva murfa tə susəma ata ndzi hang ni.

³⁵Vu ɗa ka da tsaptə shanga susəma na ata wutədzi akwa məvayeri ngəni ɓɗakɓɗaku na akwa si ni, ka da ɗuwari akwa mbwayeri ar pwi susəma kamnyar ka mdə sə wutə susəma akwa bərniyayeri, tsuwa ka da ɓəlata.

³⁶Susəma ngəni mda ata ɗuwarari kamnyar mda sə hara kəthlər kəgari akwa məvayeri na murfa ar mi na ata si akwa tsəɗi Masar ni, ta mji asə kurəmtadzi kamnyar mi.”

³⁷Antə sauri ngəni ku kəskəra kuthli ka shanga kwakunayeri arni.

³⁸Antə kuthli pəla aka kwakunayeri ni abbər, “Mburu amzhi wutə jili mda apani ya, mdə na ka mambələr Hyel akwa dzari apani?”

³⁹Antə kuthli pəla aka Yusuf, “Təng tə Hyel ku ncanta ala gə shanga su nayeri ni, to ai mda aɗi na ka səndər su ka tsuwa ɗəɗukur apa gə kəra wa.

⁴⁰Ga ata ndzi ata kəra kutakəyirna, tsuwa shanga mjirna ata nu su tə ga ku pəla. Tar atar kuthlikur daci antə I ata təramta nga.”

⁴¹Antə kuthli pəla aka Yusuf, “Kulini I ku vəi nga gwamna ata kəra shanga tsəɗi Masar.”

⁴²Antə kuthli ni ntsui lenduwa na ka dludzər tsiya kuthlikur ata ni kazhar kuleng tsiyari, ka hata ata kuleng tsiya Yusuf. Tsuwa tsa ku hadza alari ləptayeri ar lilin na ɓɗakɓɗaku, ka hau sarka ar dinar akwa wulyari.

⁴³Antə kuthli ni vu tə mdə kətə Yusuf akwa wagənər mdə na akwa nu ni akwa olkur na suɗkur, ka tsa mwa akwa. Antə dakwaliyayeri pwa akəmari ka kuraku akwa pəla, “Hamta giri laku!” Apani antə tsa vətə Yusuf tə tsa ndzi ata kəra shanga Masar.

⁴⁴Antə kuthli pəla aka Yusuf, “I an kuthli, amma ma su tə ga aɗi kələngkər akari wa, mda aɗi na ata haptə tsiyari wala səlari akwa shanga tsəɗi Masar wa.”

⁴⁵Antə kuthli ku na thləm aka Yusuf abbər Zafenath Paneya, ka kəta alari mwala na ka thləmari Asenath, ngkwar Potifera na prist ar On, tə tsa ndzi mwalankiɗa. Antə Yusuf ləɓəla ka dlarhə tsəɗi Masar.

⁴⁶Yusuf ka məvari makkumari sakatə tsa baɗitə kəthlər aka kuthlir Masar. Antə Yusuf ku ləɓəla kazhar kəma kuthli, ka mwari ka dlarhə shanga bwayeri na akwa tsəɗi Masar.

⁴⁷Antə akwa məva murfa na ar susəma na hang ni, di ku yatə susəma na hang ka duna.

⁴⁸Antə Yusuf ku tsaptə shanga susəma na wutədzi akwa məva murfa tə susəma aɗi hang akwa Masar ni, ka pwi akwa bərniyayeri. Akwa kəlara bərni, tsa tsaptə susəma tə mdə wuta akwa fakayeri na kalaktə kəlara bərni ni, ka pwi akwa bərni ndaga.

⁴⁹Apani Yusuf ku tsaptə mthli hang ka duna, apa hangkur wuyakər mnya manda, har tar tə Yusuf zhar ngkər hangkurari, kamnyar mda amzhi ngkərɓəlari wa.

⁵⁰Akəmata məvar mi ni ahara, Yusuf ku wutə maɗashili suɗa adzə Asenath na ngkwar Potifera na prist ar On.

⁵¹Antə Yusuf vətə thləm aka ɓzərni na yarakəma abbər Manasse, kamnyar tsa pəla, “Hyel ku hara tə I ku fwari ata kəra shanga bwaniyayeri arna, ka tsuwa kutakəyir baba'na.”

⁵²Antə ɓzər sal na suɗkur, tsa kəga thləmari Ifrayim, kamnyar tsa pəla, “Hyel ku ni maɗankyar akwa tsəɗi tə I ɗar bwani akwa.”

⁵³Antə məva murfa ar susəma na hang akwa Masar ni ku sə kuri.

⁵⁴Antə məva murfa na ar mi ni ku baɗitə tsu apatə Yusuf ku pəla. Antə məi ku təri akwa shanga tsəɗiyayeri na aɗi, amma akwa shanga tsəɗi Masar susəma aɗi.

⁵⁵Sakatə mi ni pwa akwa shanga tsəɗi Masar, mji ku tuwa susəma aka kuthli. Antə kuthli pəla aka shanga mjir Masar abbər, “Mwar giri adzə Yusuf, ka giri hara kəlara su tə tsa ku pəla ala giri.”

⁵⁶Sakatə mi ni ku hara mwavər ka ndlətə shanga kuta tsəɗi Masar, antə Yusuf kəlar shanga mbwayeri ar susəm ni, ka ləkwa ɗəl mthli ni aka mjir Masar.

⁵⁷Apani tsuwa shang mjir duniya ku si ahar Masar adzə Yusuf kamnyar masə mthli, kamnyar tə mi ni ku hara mwavər ka duna akwa shanga duniya.