Read bura-pabir Baɗitari 45 Bible Online

Baɗitari 45 - bura-pabir bible

Baɗitari 45

¹Apani Yusuf aɗi mzhi ngkahə kərni akəma shanga mji na thləthlata adzə ni wa. Antə tsa haptə kuraku ka pəla, “Ka waskəi ləɓəla kazhar yeru.” Antə mda aɗi wala duku na thləthlata anda sakatə Yusuf ngkərɓəla kərni aka maɗa'ma'ni ni wa.

²Antə Yusuf ku tuwa ka kuraku har tə mjir Masar ku nggata, har tə ndərari ku mzhitə mjir kutakəyir kuthli.

³Antə Yusuf pəla aka maɗada'ni, “I an Yusuf. Babana tsu ka mpika ya?” Amma maɗada'ni ni aɗi mzhi shinau alari wa, kamnyar hyala ɗa ku nthlə ɗa akəmari.

⁴Antə Yusuf pəla aka maɗada'ni, “Shahə girdzi adzə ra usama.” Antə da shahədzi adzə ni. Antə tsa pəla, “I an Yusuf na ɓzərda' giri, natə giri ɗələmta aka mjir Masar ni!

⁵Antə kulini, giri aɗiya damitədzi wa, wala ka ɗəffa giri ɓza adzə nvwa giri kamnyar tə giri ɗələmta ra azi ni wa. Kamnyar Hyel an thlentə ra abbər kəi si azi kəma ta giri, kamnyar kəi sə mbantə mpika mji.

⁶Kulini mi ni ku hara məva suɗa akwa tsəɗi ni, amma məva ku mbil ntəfu natə mda aɗi ata sə tsuhwa wala nthləi sur fakəu wa.

⁷Antə Hyel thlentə ra akəma giri ni, kamnyar kəi msərantə mpika giri kəga nyarmbwar giri akwa duniya, tsuwa atar lakur mbantədzi ngəni ol ni, antə Hyel ata msərantə mpika mji hang.

⁸Apani aɗi giri an thlentə ra azi ni wa, amma Hyel. Tsa an namtə ra kəi ndzi mdə na ola ar hamta sauri aka kuthli, ka tsuwa kəi ndzi ola ata kəra shanga kutakəyirni, ka kəi ndzi ka kuthlikur ata kəra shanga Masar.”

⁹“Antə kulini mwa giri taktar, ka giri ngka adzə baba'na, ka giri pəla alari, ‘Yusuf na ɓzər ngə ni pəla, “Hyel ku namtə ra ola ata kəra shanga Masar, antə asər adzə ra, ga aɗiya shamta saka wa.

¹⁰Ga ata ndzəndzi akwa bwar Goshen, kudzəha adzə ra, ga kəga maɗa' nga, kəga kəkayeri ar nga, ka ciɓayeri ar kwi, kəga təma, kəga thla, ka shanga suayeri damwa tə ga kəgari.

¹¹Kamnyar azi ni, I ata mzhi hamta ala gə su tə ga ata turari, kamnyar məvar mi ni ku mbili har ntəfu. Səra azi, kamnyar ta ga, kəga kutakəyir nga, kəga mwaɓiyayeri ar nga, asə ndzi akwa tura.” ’

¹²Antə kulini nca giri ku wuta, tsuwa nca ɓzərma'na Benjamin ku wuta abbər, I na Yusuf an akwa gari ala giri ni.

¹³Pəla giri aka baba'na ata kəra shanga olkur tə I kəgari azi akwa Masar, ka shanga su tə giri wuta. Mwa gir taktar, ka giri səntə baba'na azi kula shamta saka.”

¹⁴Antə Yusuf putə tsiyari ata wulya ɓzərma' ni Benjamin, antə Benjamin tsuwa fəfahə Yusuf, tə japwa ɗa ləkwa tuwa.

¹⁵Antə Yusuf fəfahə shanga maɗada'ni ni, ka vədzə mnyari ala ɗa, akwa jaɓ tuwa. Aghəla nda antə maɗada'ni baɗitə gari ka tsa.

¹⁶Sakatə labar ku mzhitə kutakəyir kuthli abbər maɗama' Yusuf ku si ni, su ni ku ndzi msəra ka duna aka kuthli ka kwakunayeri arni.

¹⁷Antə kuthli ni pəla aka Yusuf, “Pəla aka maɗama' ngə ni ka da putə kəla ata mwaɓiyayeri arɗa, ka da ngka akwa tsəɗi Kanana.

¹⁸Ka da fatə baba' giri, ka mjir kutakəyir giri, ka da si azi adzə ra. Antə I ata na ala ɗa vəi ndzəndzi na ɓɗakta shang akwa tsəɗi Masar, tsuwa da ata səm susəma ka da nggatə bwa msərakurər tsəɗi ni.

¹⁹Tsuwa ka gə tsawa ala ɗa ka da fatə wagənayeri azi akwa Masar kamnyar fatə mwankir ɗa kəga maɗankyarər ɗa na raka raka, ka da kətə baba' giri ka da si ka tsa.

²⁰Da aɗiya damitədzi ata kəra kariyayeri arɗa wa, kamnyar bwar tsəɗi na ɓɗakta shang akwa Masar an ata ndzi arɗa.”

²¹Tsuwa apani antə maɗashilər Yakub ku hara. Yusuf ku hamta ala ɗa wagənayeri tsu apatə kuthli ku tsawa, ka hamta ala ɗa susəma tə da ata səmari ata laku.

²²Aka kəlara mda akwa nca ɗa, tsa hamta alari ləptu ka hwandau na bilən bilən tə mdə dəɓata, amma aka Benjamin tsa na alari liyar adzərfa aru makər, ka ləptu ka hwandau ləptu ka hwandau vəyari ntəfu bilən bilən tə mdə dəɓata.

²³Tsuwa aka baba'ni, tsa thlenta alari kwarayeri kuma na ka kəla ar suayeri na ɓɗakɓɗaku akwa Masar, ka mwankya kwarayeri damwa kuma na fatə kəla ar mthli, ka buradi, ka susəmayeri damwa tə tsa ata səmari ata lakur si.

²⁴Antə tsa salamtə maɗada'ni. Sakatə kalkal da ata təra, antə tsa pəla ala ɗa, “Giri aɗiya sə mpa ata laku mai!”

²⁵Apani antə da ku təra ka ləɓəla kazhar Masar, ka ngka avi akwa tsəɗi Kanana adzə baba' ɗa Yakub.

²⁶Antə da pəla aka baba' ɗa abbər, “Yusuf tsu aɗi ka mpika! Tsuwa tsa an ka kuthlikur ata kəra shanga tsəɗi Masar.” Təng təkəma dza Yakub ndzi təmtəɗəku apa mtəmtari, kamnyar tsa aɗi mzhi mbərsa ka da wa.

²⁷Amma sakatə da pəla alari shanga suayeri tə Yusuf pəla ala ɗa, ka tsuwa sakatə tsa wutə wagənayeri tə Yusuf thlenta abbər ka mdə sə kətə ni akwa ni, antə hangkala Yakub jaktə ngka.

²⁸Antə Yakub pəla, “Kəmzhi! Ɓzərna Yusuf tsu aɗi ka mpika! I ata mwari kəi wutə ni akəmata I amta.”