Read bura-pabir Baɗitari 50 Bible Online

Baɗitari 50 - bura-pabir bible

Baɗitari 50

¹Antə Yusuf ndlangkərdzi ata kəra baba'ni, akwa tuwa ata kərari, ka vədza kəsəm mnyari ata kəma baba'ni.

²Antə Yusuf tsawa aka buɗayeri arni na asəndə kuzəku, abbər ka da kəkərtə mshiyir baba'ni ka kuzəkər ngkatə hiɗa. Antə da ku kəkərtə ni ka kuzəku ni.

³Ana kətə vir nfwarkumari akwabə mda akuri hara su ngəni ni, kamnyar tə suayeri aɗi hang tə mda ana bara ka mdə hara akwa sakar kəkərtə kuzəkər ngkatə hiɗa ni. Antə mjir Masar ku tuwa ni vir murfəkumari.

⁴Sakatə virayeri ar ɓukcir tuwa ni ku kuri, antə Yusuf gari aka mji ol'ola na ar kutakəyir kuthli, ka pəla, “Dlar giri ra bu usa, ka giri gari ali aka kuthli abbər,

⁵‘Saka tə baba'na abaka mti, tsa vu ra kəi kahyel alari abbər I ata sə ra harəmta ni akwa kul natə tsa ɗəmha aka kərni akwa tsəɗi Kanana. Antə kulini I akwa bara ka gə na ali laku kəi mwari ra harəmta baba'na, kambəla I ngka.’ ”

⁶Antə kuthli ni shinau alari abbər, “Mwari, ka gə ra harəmta baba' nga apatə ga ku kətə alkawalər harari.”

⁷Antə Yusuf ku təra ra harəmta baba'ni. Tsuwa shanga mji na ol'ola ar kuthli, watau kwakunayeri ka shanga mji na ol'ola akwa tsəɗi Masar ku nu ni tə da mwari ata kəma duku,

⁸ata kəma duku kəga shanga mjir kutakəyir Yusuf, kəga maɗama'ni, kəga mjir kutakəyir baba'ni. Tar maɗankyarər ɗa na raka raka ka ciɓayeri ar kwi kəga təma kəga thla antə da zhari avi akwa tsəɗi Goshen.

⁹Mji na ana mwa akwa wagənayeri kəga mjir fəl taku tsuwa ku nu ni. Apani mji dlama dlama an pwar ni.

¹⁰Sakatə da mzhitə vəi dəkə mthli na ahar Atad na aɓəla bwanda Thlyagha Jodan, antə da ləkwa tuwa ka kuraku na mwavər ka duna, ka hara vir murfa akwa tuwar baba' Yusuf.

¹¹Sakatə mjir Kanana na andzəndzi akwa tsəɗi nda, wutə ɗa akwa tuwa ata vəi dəkə mthli na ahar Atad ni, antə da pəla, “Ngəni an tuwa na ku damitə mjir Masar ka duna!” An su na hara tə mda ana kəga vəi nda na aɓəla bwanda Jodan ni abbər Abel Mizrayim.

¹²Apani maɗashilər Yakub ku hara alari su kalkal apatə tsa pəla ala ɗa.

¹³Kamnyar da ku kətə mshiyirni ka mwanta ahar Kanana, ka harəmta ni akwa kur pela na akwa bəbalər Makpela, na kudzəhə ka Mamre, fakəu tə Ibrahim masta akəla Efron na mdər Hitti, kamnyar ka tsa ndzi vəi harəmta mshiyir mjirni.

¹⁴Aghəla tə Yusuf ku harəmta baba'ni, antə tsa ngka ahar Masar kəga maɗama'ni ka shanga mji na pwar ni kamnyar harəmta baba'ni ni.

¹⁵Aghəla tə baba' ɗa ku mti, antə maɗama' Yusuf pəla, “Nuhum ba kulini Yusuf tsu ka mburu akwa kutari, har tə tsa ata hir ntəmta shanga ɗimikur tə mburu hara alari ni.”

¹⁶Apani antə da thlentə ndər aka Yusuf ka pəla, “Akəmata baba' nga amta, tsa ku tsawa abbər

¹⁷ka yeru pəla ala gə tsa akwa kiɗə kəra ga, ka gə yafitə maɗama' nga ata kəra biku ka ɗimikur tə da hara ala gə ka ɗar bwani ala gə ni. Antə kulini yeru akwa kiɗə nga ka gə yafitə yeru, kamnyar yeru an mafar Hyel na ar baba' nga.” Sakatə da pəla su ngəni aka Yusuf, antə Yusuf tuwa.

¹⁸Antə maɗama'ni ku si ka pumtadzi ata di akəmari akwa pəla, “Nggədza yeru akəma ga, yeru an mafar nga.”

¹⁹Amma Yusuf pəla ala ɗa, “Giri aɗiya thlivər wa! I Hyel ya, tə I ata mzhi ɗi giri?

²⁰Ar giri, giri ku bara ka giri hara ali ɗimikur, amma Hyel ɗəmhə ni kamnyar ɓɗakkur, kamnyar msərantə mpika mji hang, apatə giri ku wuta akwa hara kulini.

²¹Antə giri aɗiya thlivər wa. I ata hamta ala giri susəma, ala giri kəga maɗa' giri.” Apani antə tsa peri hangkala ɗa, ka gari ala ɗa ka hangkal.

²²Antə Yusuf ku ləkəma ka ndzi akwa Masar, tsa kəga mjir kutakəyir baba'ni. Antə Yusuf ku hara məva aru pal ka kuma.

²³Yusuf ku fəi har tə tsa wutə maɗa' Ifrayim ka kəkayeri na kəka nggilang, har ka wutə maɗa' Makir na ɓzər Manasse, ka dlu ɗa ata humbari.

²⁴Antə Yusuf pəla aka maɗama'ni, “I abaka mta, amma Hyel ata si adzə giri, ka tsa fwaɓəla giri akwa tsəɗi ngəni, ka tsa mwantə giri akwa tsəɗi tə tsa kətə alkawalər hamtari aka Ibrahim, ka Ishaku, ka aka Yakub.”

²⁵Antə Yusuf vu tə maɗa' Yakub kətə alkawal alari atar kahyel abbər, “Ma sakatə Hyel ku si adzə giri ka hara kuthlikurərni, ka giri fatə ɗethlərna kazhar vəi ngəni ka təra kəgari.”

²⁶Antə Yusuf ku mti akwa sakatə tsa ka məvari aru pal ka kuma. Antə da ku kəkərtə ni ka kuzəku ar ngkatə hiɗa, ka vu ni akwa akwati harəmta mshi akwa Masar.