Read bura-pabir Baɗitari 9 Bible Online

Baɗitari 9 - bura-pabir bible

Baɗitari 9

¹Antə Hyel ku vədzə barka aka Nuhu ka maɗa'ni, ka pəla ala ɗa abbər, “Ka giri ya hang, ka giri yatədzi, ka giri nghyantə duniya.

²Shanga mwaɓiyayeri ar mtaku na akwa duniya, ka shanga ɗikayeri na ata kutahyel, ka shanga su na ana mwa ka yimər kutari ata di, ka shanga kəlfayeri na akwa yimi, ata thlivər giri ka yakata. I ku hamta ɗa shang akwa tsiya giri.

³Kəlara su na ka mpika na ana kənggərardzi ata ndzi susəma ala giri. Antə apatə I ku hamta ala giri shanga su na ka thlali ka da ndzi susəmər giri, antə I ku hamta ala giri shanga su.

⁴Amma giri aɗiya ɓɗə kum ka mamshari tsu akwa wa, kamnyar mamshi an mpika.

⁵Ata kəra mamshir giri natə tsa an mpika giri, I ata yu mnya kəlara mdə na ku kəl mpika nvwani. Apani kəlara mda wala mwaɓi na ku kəl mpika mda, tsa ata pəla mnyari. Kəlara mdə na ku kəl mpika ɓzərma'ni, mda ata kəl mpikari.

⁶“Kəlara mdə na ku pumta mamshir mda, tsu mda an ata pumta mamshirni. Kamnyar akwa dludzər Hyel antə Hyel namtə mda.”

⁷“Amma ar giri, ka giri ya hang, ha hangkurər giri jakjaka. Ka giri yatədzi, ka jaka ata kəra duniya.”

⁸Antə Hyel jaktə pəla aka Nuhu ka maɗa'ni,

⁹“Nggədza kulini I ata mbwi alkawal ka giri, kəga kəkayeri ar giri na aghəla giri,

¹⁰ka shanga su na ka mpika adzə giri, ɗikayeri, kəga mwaɓiyayeri na ar kəi, kəga mwaɓiyayeri na ar mtaku, ka shanga su na ka mpika na ku səɓəla akwa shar ni.

¹¹Tsuwa I akwa kətə alkawal ala giri abbər I aɗi ata jaktə shamta su na ka mpika ka yimər avava kəra wa. Mda aɗi ata jaktə hara yimər avava na ata shamta duniya kəra wa.”

¹²Antə Hyel pəla, “Ngəni an seɗar alkawal natə I ata kətari akwa daɓwi ka giri, ka shanga su na ka mpika na adzə giri, ka shanga zamanayeri na ata si.

¹³I ata vəi kigyau arna akwa dlamba, na ata ndzi seɗar alkawal akwa daɓwi ka duniya.

¹⁴Kəlara sakatə I ku səntə dlamba ata kəra duniya, antə giri ku wutə kigyau akwa dlamba ni,

¹⁵I ata ɗangtə alkawal natə I hara akwa daɓwi ka giri, ka shanga jili su na ka mpikə ni. Antə yimi aɗi na ata jaktə səntə avava har ka tsa shamta shanga su na ka mpikə wa.

¹⁶Kəlara sakatə kigyau ku wutədzi akwa dlamba I ata wutari kəi ɗangtə alkawal na ba saka madi tə I na Hyel hara akwa daɓwi ka shanga su na ka mpika ata kəra duniya.”

¹⁷Antə Hyel ku pəla aka Nuhu abbər, “Ngəni an seɗar alkawal natə I ku vəi akwa daɓwi ka shanga su na ka mpika ata kəra duniya.”

¹⁸Maɗashilər Nuhu na səɓəla akwa shar ni an Shem, ka Ham, ka Yafeth. Ham an yaɓəla Kanana.

¹⁹Da makər ni an maɗa' Nuhu, tsuwa mji ngəni an yatədzi ka titilidzi akwa duniya ni.

²⁰Nuhu ku ndzi mdər tsuhwa, tsuwa tsa an mdə na ntangkəma na baɗitə hara fakər anap.

²¹Tsa ku sa yimər anap, ka wika, ka pəpəi dura akwa tentərni.

²²Antə Ham na baba' Kanana ku wutə baba'ni dura, antə tsa ləɓəla ka pəla aka maɗama'ni na suɗa aɓəla ni.

²³Antə Shem ka Yafeth ku fatə ləptu laga, ka puta ata pathlaha ɗa japu, ka mwa ka bwahili ka bwahili kara pudza aka baba' ɗa na dura ni. Da hamta kəma ɗa təbwa damwa kamnyar ta da awutə durakur ar baba' ɗa.

²⁴Sakatə wikə ni ku ɗəwula adzə Nuhu, tə tsa nggaɓəla su tə ɓzərni na raka ta shang hara alari ni,

²⁵antə tsa pəla, “Ka Kanana ndzi shushuwari! Tsa ata ndzi mafar mafayeri aka maɗama'ni.”

²⁶Tsuwa Nuhu pəla, “Ka huwa ndzi aka MTHLAKU na Hyelər Shem! Ka Kanana hara mafakur aka Shem.

²⁷Ka Hyel hara ka sur Yafeth jakjaka, Ka Yafeth ndzəndzi ata vəi duku ka Shem, tsuwa ka Kanana hara mafakur aka Yafeth.”

²⁸Aghəla yimər avava ni Nuhu ku jaktə hara məva aru makər ka ntəfkumari.

²⁹Hangkur shanga məvar Nuhu an aru əmdla ka ntəfkumari, antə tsa ku mti.