Read bura-pabir 2 Samiwal 1 Bible Online

2 Samiwal 1 - bura-pabir bible

2 Samiwal 1

¹Aghəla mtər Shawulu antə Dauda ku ngka ka ndzəndzi ahar Zigklag ar vir suɗa aghəla tə tsa ku nggyari mjir Amalek.

²Akwa vir na makərkur antə mdə laga ku si ka ləptərni thluhthluhwari ka bərbər ata kərari kamnyar ncantə ɗəffə ɓzəɓzəkur arni. Tsa thlata akwa nca sojayeri ar Shawulu. Tsa mwari ka ndla ata di akəma Dauda ka nar səli.

³Dauda ku yu ni, “Gə thlata ama ri?” Antə tsa shinau abbər, “I ku msəra akwa vəi mpar mjir Israila ka hwi.”

⁴Antə Dauda pəla, “Pəla ali su na hara!” Antə tsa pəla, “Sojayeri ar mburu ku hwi akwa vəi mpa, antə mdə ku tsəgəi mjir mburu hang. Wala Shawulu ka ɓzərni Jonathlan tsuwa ku mti.”

⁵Dauda yu mdə ni abbər, “Apa madi tə gə sənda abbər Shawulu ka ɓzərni Jonathlan ku mti ri?”

⁶Tsa shinau abbər, “I ata kəra Gar Gilbowa antə I wutə Shawulu ku perdzədzi adzə mwasərni ka wagənayeri ar takur mpa kəga mjir taku ar dawa akwa tsaɓəngkərdzi alari.

⁷Antə tsa shinardzi, ka wutə ra antə tsa kəga ra. Antə I pəla, ‘Naam zanuwa!’

⁸Antə tsa yuwa abbər I an wa ri, antə I pəla alari abbər I mdər Amalek.

⁹Antə tsa pəla, ‘Asəra azi ka ra tsi ra' Kamnyar I akwa ɗar bwani ka duna, wala tə mpikəi aɗi ləɓəla wa.’

¹⁰Apani antə I ku mwari ka tsi ni, kamnyar I ku sənda abbər ma tsa ku ndla tsa ata mta. Antə I kəli dzakwar kuthlikur na ata kərari ka ntsui liya na ata shahari, antə I sənta ala gə zanuwa.”

¹¹Antə Dauda thləhumta ləptərni kamnyar ɗəffə ɓzəɓza, antə shanga mjirni ku hara tsu apani.

¹²Da ku ndzi ka ɗəffə ɓzəɓza ka tuwa ka hara asham har tahaku kamnyar Shawulu ka Jonathlan ka Israila na mjir MTHLAKU, kamnyar mdə ku tsi ɗa hang akwa mpa.

¹³Dauda ku yu ɓzərdakwi na sənta alari labar ni abbər, “Gə thlata ama ri?” Antə tsa pəla, “I mdər Amalek, amma I ka ndzi akwa tsəɗiyir nga.”

¹⁴Dauda yu ni, “Apa madi tə gə mzhi tsi kuthli tə MTHLAKU an carɓəla ri?”

¹⁵Antə Dauda kəga pal akwa nca mjirni ka pəla, “Tsi ni!” Antə mdə ni ku tsa mdər Amalek ni ka tsi ni.

¹⁶Dauda pəla, “Ka mamshir nga ndzi ata kəra gə sur nga kamnyar tə gə ka mnya gə sur nga an pəla, ‘I an tsi mdə natə MTHLAKU an vəi.’ ”

¹⁷Dauda ku jikatuwar Shawulu ka Jonathlan,

¹⁸ka tsawa ka mdə thlipa aka mji na akwa Yahuda. Mdə ku rəbuta akwa Kakaɗər Yashar. Jika tuwa ni an apani:

¹⁹Ata garayeri ar Israila antə mji ol'olər yeru ku mti! Katsalayeri ar sojayeri ar yeru ku ndla!

²⁰Mda aɗiya psəmnya labar ngəni akwa Gath wa, wala akwa kuta diyir Ashkelon wa. Mda aɗiya hara ka maɗankwiyir Filistiya hara kucali wa. Mda aɗiya hir ka maɗankwiyir mji na kula səndə Hyel hara ɗəffu mwapu wa.

²¹Yimər Hyel wala kəlangkəu aɗiya təri ata garayeri ar Gilbowa wa, ka mtakər ɗa ndzi kula ya su, kamnyar anda partauwayeri ar katsalayeri ku hilantədzi, partau ar Shawulu aɗi tə mda afwavumta ka mal kəra wa.

²²Afər Jonathlan ana pəra wa Katsakar ar Shawulu an kula kətadzə Da ana kurəmta katsalayeri, ka tsəgəi dawayeri.

²³Shawulu ka Jonathlan, mji hir ɗa, da mji na msəra ka duna. Da ata kəma duku akwa mta, ka mpika ɗa ata kəma duku, akwa mta da ata kəma duku, da ɓəɓatu ta dukwayeri da ka duna ta tsəngiyayeri.

²⁴Mwankir Israila, ka giri tuwa kamnyar Shawulu! Tsa ku mbwadzə ala giri zhaɓi na dəɓadəɓari mamza, ka dəɓatə giri ka sur dəɓa ar dinar,

²⁵katsalayeri ar sojayeri ar yeru ku ndla, mdə ku tsi ɗa akwa mpa. Jonathlan ku pəpəi mtəmtari akwa garayeri.

²⁶I ku tuwa nga ɓzərmana Jonathlan! I hir nga ka duna. Hirkur nga ali ku ndzi surndata, ku təramta hirkur mwala.

²⁷“Katsalayeri ar sojayeri ku ndla, Kariyir mpar ɗa apumta, ka ndzi kula ampani.”