Read bura-pabir 2 Samiwal 10 Bible Online

2 Samiwal 10 - bura-pabir bible

2 Samiwal 10

¹Aghəla nda antə Nahash na kuthlir Ammon ku mti, antə ɓzərni Hanun ku dlu tsiyari ka ndzi kuthli.

²Antə Dauda pəla akwa ɗəffari, “I ata hara ɓɗakkur aka Hanun na ɓzər Nahash, kamnyar baba'ni ku hara ali ɓɗakkur.” Antə Dauda ku thlentə buɗayeri arni ka da ra səzəmta Hanun ata kəra mtər baba'ni. Sakatə buɗayeri ar Dauda ku mwari adzə Hanun akwa tsəɗi Ammon ka da səzəmta ni,

³antə kwakunayeri ar Ammon ni pəla aka Hanun na mdərkəyir ɗa abbər, “Ga ana wuta apa Dauda ana nar olkur aka baba' ngə ya tə tsa thlentə mjirni ka da sə səzəmta ngə ni? Ai Dauda thlentə buɗayeri arni ala gə ni kamnyar ka da wulɓəla bərni ni, ka nggaɓəla ashirari, kamnyar ka da sə səm ni!”

⁴Hanun ku ngkəi mji tə Dauda thlentə ka shimta retar kumiya ɗa ka thlamta ləptər ɗa kəl ka mpurkuciva ɗa ka psi ɗa ka da təra.

⁵Amma da aɗi ngka avi wa, kamnyar da akwa ngga səli ka duna. Sakatə mdə pəla aka Dauda su na wutə mjirni ni, antə tsa thlentə mji laga ka ndər adzə mji tə mdə tsi səliyir ɗa ni abbər ka da ndzəndzi tsu ahar Yariko, har tar ma sakatə shishir kumiya ɗa ku ptsi ka kəla, kambəla da ngka avi.

⁶Mjir Ammon ku sənda abbər da ku ɓzamtə ɗəffa Dauda antə da ku ndzi dawarni, apani antə da ku ra hayatə sojayeri ar səl ar Siriya dəpu sərkumari ahar Bethrehob ka Zoba, dəpu kumnya suɗa ahar Tob ka dəpu pal akəla kuthlir Maaka.

⁷Sakatə Dauda ku nggata ata kəra su tə mjir Ammon akwa harari tsa ku thlentə Yowab ka shanga sojayeri ar Israila ka da mpa ɗa.

⁸Mjir Ammon ku ləɓəla ka ɗəmhədzi akwa nyarfur ləvəi akwa bərni, antə mjir Siriya na ahar Zoba ka Rehob, ka paktə ka mji na ahar Tob ka Maaka ku ɗəmhədzi ata bəbal na ata mnya mtakər di.

⁹Sakatə Yowab ku wuta abbər sojayeri ar dawarni ku ɗəmhədzi abwakəma ka abwahili ka da pwa ata kərari, antə tsa ku carɓəla sojayeri ar Israila na ɓɗakta shang ka pwi ɗa ka da kəɓa ka mjir Siriya.

¹⁰Tsa ku pwi mambila sojayeri arni akira ɓzərma'ni Abishai tə tsa ku pwi ɗa ka da kəɓa ka sojayeri ar Ammon.

¹¹Yowab ku pəla alari, “Ma ga wuta abbər mjir Siriya ata mula ali ka gə si dlar ra, antə ma mjir Ammon ata mula ala ga, I ata mwari ra dlar nga.

¹²Ka mwa ndzi ɓəɓal ka mwa mpa ka duna kamnyar mjir mburu ka bərniyayeri ar Hyel. Antə ka MTHLAKU hara su tə tsa hira!”

¹³Yowab kəga sojayeri arni ku ləkəma ka pwa ata kəra ɗa ka mpa antə mjir Siriya ku hwi.

¹⁴Sakatə mjir Ammon ku wuta abbər mjir Siriya akwa hwi antə da ku hwi tsuwa ka zhar Abishai ka ngka avi akwa bərni ni. Antə Yowab ku zhar mpa mjir Ammon ka ngka ahar Urushalima.

¹⁵Sakatə mjir Siriya ku wuta abbər mjir Israila ku nggyari ɗa, antə da ku tsaptə shanga sojayeri arɗa ata kəma duku.

¹⁶Kuthli Hadadezer ku thlentə mji ka da si ka mjir Siriya na abwar raghəi ka Thlyagha Yufiretis, antə da ku tsaptədzi ahar Helam akira Shobak na olər sojayeri ar Kuthli Hadadezer.

¹⁷Sakatə Dauda ku nggata ata kər antə tsa ku tsaptə sojayeri ar Israila ata kəma duku ka fəlɓəla Thlyagha Jodan ka mwari ahar Helam. Antə mjir Siriya ku ɗəmhədzər mpa ka Dauda. Antə da ku baɗitə mpa.

¹⁸Mjir Israila ku kədləghəl mjir Siriya. Akwa mpa ngəni Dauda kəga mjirni ku tsəgəi mjir wagənər taku ar Siriya aru murfa ka mjir taku dəpu nfwarkumari, ka dəkəi Shobak na olər sojayeri arɗa tə tsa ku mti akwa vəi mpa ni.

¹⁹Sakatə kuthlyayeri na akira Hadadezer ku wuta abbər mjir Israila ku nggyari ɗa, antə da ku kiɗə ka da shwalatədzi kəga mjir Israila ka da ndzi akira da. Antə mjir Siriya ku thlivər jaktə dlar mjir Ammon.