Read bura-pabir 2 Samiwal 11 Bible Online

2 Samiwal 11 - bura-pabir bible

2 Samiwal 11

¹Akwa sakatə di ata mərta, sakatə kuthlyayeri ana ləkwa dləra, antə Dauda ku thlentə Yowab kəga sojayeri na ol'ola ka shanga mjir Israila. Antə da ku mwari ka dlərəmta mjir Ammon ka kalaktə bərni Rabba. Amma Dauda ku ndzəndzi akwa Urushalima.

²Vir laga ka mnya tahaku aghəla tə Dauda ku thlata akwa henər təpci ka ləmta ata kəra kəyirni akwa sa shambar. Antə tsa ku wutə mwala laga akwa pəra. Tsuwa mwala ni ɓɗaku, dakwi ka duna.

³Antə Dauda ku thlentə mdə laga ka tsa ra yuɓəla abbər tsa wa ri. Antə tsa ku nggata abbər, “Thləmari an Bathsheba ngkwar Eliyam, mwalar Uriya na mdər Hitti.”

⁴Dauda ku thlentə mji ka da si ka tsa, antə mwala ni ku si. Sakanda tsa haɗa kuri kəcirni. Antə Dauda ku pi ka tsa. Antə tsa ku ngka ka ləha.

⁵Aghəla nda mwala ni ku wuta abbər tsa ka hur, antə tsa thlentə ka pəla aka Dauda abbər tsa ka hur.

⁶Antə Dauda ku thlenta aka Yowab abbər, “Thlenta ali Uriya na mdər Hitti.” Antə Yowab ku thlentə ni aka Dauda.

⁷Sakatə Uriya ku si antə Dauda ku yu ni ata kəra lapiyakur Yowab kəga sojayeri arni ka laku tə mpa ni akwa mwa akwa.

⁸Antə tsa pəla aka Uriya, “Ləvəi ka mwalankiri namta ala gə susəma.” Uriya ku təra antə Dauda ku thlentə cautayeri aharngkiɗa.

⁹Amma Uriya pi tsu anyarfur kuthli kəga buɗayeri arni, tsa aɗi hir ləvəyar ngkiɗa wa.

¹⁰Sakatə Dauda nggata abbər Uriya aɗi ləvəi aharngkiɗa wa antə tsa yu ni, “Gə haɗa thlata akwa vəi ciju aghəla tə ga ku fəi aɓəla, kamnyar mi tə ga aləvi wa ri?”

¹¹Antə Uriya shinau abbər, “Akwati Alkawal ka sojayeri ar Israila ka ar Yahuda andzəndzi akwa tent, ka mdərkəyirna Yowab ka buɗayeri arni andzəndzi akwa mtaku. Apa madi tə I amzhi kəi səm ka sa ka pi ka mwalankiya ri? I ku kahyel ka barkar dəkəl abbər I amzhi hara su nayeri ni wa!”

¹²Antə Dauda pəla, “pəpəi azi ashina ma ɗəpa kəi salamtə nga ka gə ngka.” Antə Uriya ku pi akwa Urushalima vir nda.

¹³Dauda ku kəga ni ka susəma tə tsa səm ka sa har ka wika. Wala apani Uriya aɗi hir ləvəi aharngkiɗa wa, amma tsa pshari barkwarni ka pəpəi ata di akwa camər kəi kuthli.

¹⁴Səɓəla ɗəpari Dauda ku rəbutə wasika aka Yowab ka na aka Uriya ka tsa mwanta alari.

¹⁵Akwa wasika ni tsa rəbuta abbər, “Mwantə Uriya akəma akwa vəi tə mpa ni mwavər, ka giri hwi ka zhar ni ka mdə tsi ni.”

¹⁶Apani sakatə Yowab ku kalaktə bərni ni, antə tsa ku thlentə Uriya akwa vəi tə tsa ku sənda abbər dawayeri na katsala anda.

¹⁷Dawayeri ku səɓəla akwa kuta bərni ka mpa sojayeri ar Yowab, tə mji laga akwa nca sojayeri ar Dauda ku mti antə Uriya akwa nca ɗa.

¹⁸Antə Yowab ku thlentə labar mpa ni aka Dauda.

¹⁹Antə tsa pəla aka mdə tə tsa thlentə ni abbər, “Aghəla tə ga ku pəla aka kuthli shanga su na hara akwa vəi mpa ni,

²⁰nuhum ɗəffari ata ɓzi ka tsa yu nga abbər, ‘Kamnyar mi tə giri mwari kudzəhə ka bərni ka ra mpa ɗa ri? Giri aɗi sənda abbər da ata shishi afa ata kəra katangga wa ya?

²¹Giri aɗi ɗangtə apatə mdə ku tsi Abimelek na ɓzər Gideyon wa ya? Ahar Thlebez antə mda mwala ku ndzəhəngkər alari bur hadla ata kəra katangga ka tsi ni. Kamnyar mi tə giri mwari kudzəhə ka katangga ri?’ Ma kuthli ku yu nga apani, ka gə pəla alari, ‘Olər mpar nga, Uriya tsuwa ku mti.’ ”

²²Antə mdə ni ku mwari ka pəla aka Dauda su tə Yowab ku tsawa ka tsa pəla alari.

²³Tsa pəla, “Dawayeri ar mburu ɓəɓal ta yeru antə da ku səɓəla akwa kuta bərni ka mpa yeru ata hildi, amma yeru ku jaktə kədləghəl ɗa akwa nyarfur bərniyayeri arɗa.

²⁴Antə da ku shishi yeru ka afa ata kəra katangga, antə sojayeri na ol'ola ar nga ku mti. Ka tsuwa Uriya na mdər Hitti ku mti.”

²⁵Dauda pəla aka mdə ni, “Ka gə dunautə Yowab, tsa aɗiya damitədzi ata kəra su na ku hara wa. Kamnyar akwa mpa mda andzi kula mtə wa. Pəla alari ka tsa ɗəmhə mpa na ola ata kəra bərni ni ka tsa ngkəi.”

²⁶Sakatə Bathsheba mwalar Uriya ku nggata abbər salngkiɗa ku mti, antə tsa ku tuwa ni.

²⁷Aghəla vir kuri tuwarni, antə Dauda ku thlentə ka Bathsheba si akwa kəyir kuthli, tsa ku ndzi mwalankiɗa ka yaɓəla alari ɓzər sal. Amma su tə Dauda hara ni aɗi kəskəra MTHLAKU wa.