Read bura-pabir 2 Samiwal 12 Bible Online

2 Samiwal 12 - bura-pabir bible

2 Samiwal 12

¹Vir laga MTHLAKU ku thlentə naɓi Nathlan aka Dauda. Antə Nathlan ku mwari ka pəla alari, “Mji laga aɗi suɗa akwa di laga, mdə na duku ka gəna ka na dukwari mdər bwani.

²Mdə na ka gəna ni tsa ka thlayeri ka təmayeri hang ka duna,

³amma mdər bwani ni aɗi ka su wa tar mwalaɓzər təma duku daci tə tsa masta. Tsa ku wulwul ni antə tsa ku kəla akwa kutakəyirni kəga maɗankyarər ni. Tsa ana səm susəma tə tsa ana səma ka sa yimi akwa kwapərni. Tsa ana pəpəi akwa humbari. Ɓzər təma ni ku ndzi alari apa ngkwarni.

⁴Vir laga mətəpi laga ku si ahar mdər gəna ni. Mdər gəna ni aɗi hir kəta akwa nca mwaɓiyayeri arni ka tsa tsi ka hara susəma aka mətəpi ni wa. Ata vəyari tsa mwari ka kətə ɓzər təmar mdər bwani ni ka tsi ka namtə susəma aka mətəpiyirni kəgari.”

⁵Antə ɗəffa Dauda ku ɓzi ata kəra mdər gəna ni antə tsa pəla aka Nathlan, “I ku kahyel ka thləma MTHLAKU na ka mpika abbər mdə na hara su ngəni ni kalkal ka tsa mta!

⁶Antə kamnyar hara su ngəni ɗimi, na kula kətadzə ni, tar ka tsa ntə təma ni ka bwa nfwar.”

⁷Antə Nathlan pəla aka Dauda, “Ga an mdə ni! Antə nggədza su tə MTHLAKU na Hyelər Israila ku pəla, ‘I ku vəi nga kuthlir Israila, ka msərantə nga akwa tsiya Shawulu.

⁸I ku hamta ala gə kuthlikur arni kəga mwankirni akwa humba ga, ka vəi nga kuthlir Israila ka Yahuda. Ma ngəni an ka mzhi ngə wa, sakani I ku jakəngkər ala gə hangta ngəni.

⁹Kamnyar mi tə gə rutə ndərərna ri? Ga ku tsi Uriya na mdər Hitti ka katsakar ka kətə mwalankiɗa tə tsa ndzi mwalankiri. Ga ku zhar tə mjir Ammon ku tsi ni ka katsakar!

¹⁰Kamnyar ngəni mji na akwa nyarmbwar nga ata sə kurəmtadzi akwa mpa tədəku. Kamnyar tə ga ku rutə ra ka kətə mwalar Uriya ka tsa ndzi mwalankiri.’

¹¹MTHLAKU akwa pəla, ‘I ata hara ka mdə laga akwa kutakəyir nga sənta ala ga asar. Ga ata wutə sakatə I ata sə fatə mwankir nga akəla ga kəi hamta aka mdə damwa, antə tsa ata pi ka da təpci.

¹²Ga ku hara biku akwa vəi ɗuwari, amma I ata hara ka su ngəni hara təpci ka shanga Israila wuta.’ ”

¹³Antə Dauda pəla aka Nathlan abbər, “I ku hara biku aka MTHLAKU.” Nathlan shinau alari ka pəla, “MTHLAKU ku tifəmta ala ga, antə ga aɗi ata mtə wa.

¹⁴Amma ga ku kəlar laku aka dawayeri ar MTHLAKU ka da rutə ni, antə dwali ka ɓzəngkyar ngə ni mta.”

¹⁵Antə Nathlan ku təra ləha. Antə MTHLAKU ku hara tə ɓzər natə mwalar Uriya ya ni ku hara nggawa na mwavər.

¹⁶Dauda ku kiɗə Hyel abbər ka ɓzər ni wutə lapiyakur. Tsa ku nggəlar ta səm susəma, antə kəlara viri tsa ana pəpəi ata di.

¹⁷Mji ol'olər kutakəyirni ku mwari adzə ni ka kiɗə kərari ka tsa thlata, amma tsa nggəlar ta thlatə wala səm susəma kəga da.

¹⁸Aghəla sati pal antə ɓzər ni ku mti, antə buɗayeri arni ni akwa thlivər pəla alari su na hara. Da pəla, “Saka tə ɓzər ni tsu ka mpika, Dauda ku nggəlar ta ndəra ala mburu sakatə mburu gari alari. Laku madi tə ka mburu pəla alari abbər ɓzər ni ku mti ri? Nuhum tsa ata sə hara su na ata dəkəi kərni!”

¹⁹Sakatə Dauda ku wutə ɗa akwa cicuh su akwa daɓwa ɗa antə tsa nggaɓəla abbər ɓzər ni ku mti. Antə tsa yu ɗa abbər, “Ɓzər ni ku mtə ya?” Antə da pəla, “I tsa ku mti.”

²⁰Antə Dauda thlata ata di ka pəra, ka kəkərtə mal ka pali ləptərni. Antə tsa ku ləkwa mbwar MTHLAKU ka vəngkər səli. Sakatə tsa ku ngka avi, tsa yuwa ka mdə sənta alari susəma antə mdə ku sənta alari antə tsa səma.

²¹Kwakunayeri pəla, “Yeru anggaɓəla su tə ga akwa harari ni wa. Sakatə ɓzəngkyar ni tsu ka mpika, ga ku tuwa ni ka nggəlar susəma, amma təkəma sakatə tsa ku mti ga ku thlatə ka səm susəma!”

²²Dauda pəla, “I ku nggəlar səm susəma ka tuwa sakatə tsa ka mpika. I dzama abbər nuhum MTHLAKU ata kətadzə ra ka zhar ɓzər ni ka mpika.

²³Amma kulini tə tsa ku mti, kamnyar mi tə kəi hara asham ri? I amzhi jaktə səntə ni ka mpikə ya? I an ata sə mwari adzə ni, amma tsa amzhi jaktə ngka adzə ra wa.”

²⁴Antə Dauda ku shiktə mwalankiɗa Bathsheba, ka ləmbwa adzə ni ka pi ka tsa. Tsa ku yaɓəla alari ɓzər sal. Antə Dauda ku vəta alari thləm Solaman. Antə MTHLAKU ku hir ɓzər ni,

²⁵ka tsawa aka naɓi Nathlan ka tsa vəta alari thləm Yedidiya, “Kamnyar MTHLAKU hir ni.”

²⁶Yowab ku ləkəma ka mpa tə tsa abaka ngkəi Rabba na di kuthlikur ar Ammon.

²⁷Tsa ku thlentə mji aka Dauda ka pəla, “I ku pwa ata kəra Rabba ka mpa ka ngkəi vəi kə yimər ɗa.

²⁸Antə kulini ka gə tsaptə mambila sojayeri ar nga ka gə pwa ata kəra bərni ni ka mpa ka gə ngkəi ni. Ta I asə ngkəi di ni ka thləmi sə tuwa.”

²⁹Antə Dauda ku tsaptə sojayeri arni ka ləhar Rabba ka pwa ata kəra ri ka mpa ka ngkəi ni.

³⁰Antə Dauda vu tə mdə ntsui dzakwar kuthlikur ar kuthlir ɗa, ka tsangkər alari tsa na Kuthli Dauda ni. Tsuwa kəgəɓkur dinar ar dzakwar kuthli ni ku mwanta apa kilogram makkumari ka ntəfu. Tsuwa mdə dəɓatə dza dzakwar kuthlikur ni ka pelar dəɓa. Aghəla nda antə Dauda fatə shanga kariyayeri na hang tə tsa dlutsa akwa mpa akwa bərni nda ka sənta.

³¹Tsuwa Dauda ku fwaɓəla mjir bərni ni ka vu ɗa akwa hara kəthlər ka zartauwayeri, ka dəkayeri, kəga kəmayeri, wala vu ɗa akwa kəthlər ar tsa bulakər həi. Tsuwa tsa ku hara su ngəni ni aka shanga kauyayeri ar mjir Ammon. Antə Dauda ka shanga sojayeri arni ku ngka ahar Urushalima.