Read bura-pabir 2 Samiwal 13 Bible Online

2 Samiwal 13 - bura-pabir bible

2 Samiwal 13

¹Dauda ka ngkwarni aɗi dakwi na ka thləmari Tamar, tsa ngkwarma' Absalom. Tsuwa tsa ngkwarda Amnon. Amma Amnon ku hir ni.

²Amnon ku damitədzi har ka hara nggawa kamnyar tə tsa ku ngguktə ngkwa'da'ni Tamar. Kamnyar tə tsa aɗi səndə sal wa, mda akwa ɓəla ni. Antə ku ndzi mwavər aka Amnon ka tsa wutə ni.

³Amma Amnon ka pazhi laga shimnya na ka thləmari Yonadab, ɓzər Shamma na ɓzərma' Dauda.

⁴Yonadab pəla aka Amnon, “Ga ɓzər kuthli amma tədəku I ana wutə nga ka ɗəffə ɓzəɓza, man hara ri? Pəla ali bu.” Amnon pəla alari, “I hir Tamar na ngkwa' da'na.”

⁵Yonadab pəla alari, “Pəpəi ata vəi pəyir nga ka gə namta apa gə nggawa. Ma sakatə baba' nga ku sə wuli nga, ka gə pəla alari ‘Usa, I akwa bara ka ngkwa' da'na Tamar sə namtə ali susəma akəmi, ka tsa hamnya ali ka tsiyari kasha.’ ”

⁶Antə Amnon ku ra pəpəi, ka namta apa tsa nggawa. Sakatə Kuthli Dauda ku mwari ka tsa wuli ni, antə Amnon pəla alari, “Usa zhar ka Tamar si ka tsa namta ali kek laga azi, ata vəi tə I ata wutə ni, tsuwa ka tsa hamnya ali ka tsiyari kasha.”

⁷Antə Dauda ku thlenta aka Tamar akwa kutakəi ni, ka pəla, “Mwar aviyar ɓzərda' nga Amnon ka ra namta alari susəma.”

⁸Apani Tamar ku mwari ka wutə ɓzərdani Amnon apəpəi. Antə Tamar ku kətə mpwa ka hərtə ka namta alari kek ni ata ncari.

⁹Antə tsa ku kətə paranti ka puɓəla kek ni tsu ata nca Amnon, amma Amnon nggəlar ta səmari. Amnon pəla, “Ka shanga giri na ambwazi ni ləɓəla.” Antə shanga ɗa ku ləɓəla.

¹⁰Antə Amnon pəla aka Tamar, “Səntə ali susəm ni ambwa kəi səma akwa tsiya ga.” Antə Tamar ku kətə kek tə tsa ɓwatə ni ka mwanta aka ɓzərdani Amnon akwa mbwar piyirni.

¹¹Sakatə Tamar ku mwanta alari susəm ni ka tsa səma, antə Amnon ku tamtə ni ka pəla alari, “Asəra ka mwa pi ngkwadarna.”

¹²Tsa pəla alari, “Awa ɓzərda'na ga aɗiya ngka ra wa! Ga a sənda abbər mda aɗi ana hara su apani akwa Israila wa! Antə ga aɗiya vu ra akwa sur səli wa.

¹³Ka gə sənda abbər I ata ləkwa səli ba saka madi. Tsuwa ar nga ga ata ndzi sur kumshi akwa Israila. Usa ka gə gari aka kuthli antə I ku mbərsa tsa aɗi ata ngkatə ra ala gə wa.”

¹⁴Amma tsa aɗi psi thləm alari wa. Antə kamnyar tə tsa ku təramta ni ka duna antə tsa ku ngka ni ka pi ka tsa.

¹⁵Antə Amnon ku nggəlar Tamar ɗimi kamta, tə kulini tsa ku nggəlar ni ka təramta tə tsa hir ni sakanda. Antə Amnon ku pəla alari, “Thlatə ka ra ləɓəla!”

¹⁶Antə Tamar pəla, “Awa. Kədləɓəla ra ata ndzi ɗimi ta su tə ga ku hara ali.” Amma tsa aɗi psi thləm alari wa.

¹⁷Antə tsa ku kəga buɗarni ka pəla alari, “Ndəkərɓəla mwala ngəni ka gə tsau nyarmbwa ni.”

¹⁸Tamar ku hatə ləptu na saɓəl ka tsiyari saɓəl saɓəl, kamnyar an sur hata ar kwatamayeri na aɗi kəl sal katagu wa sakanda. Antə buɗar Amnon ku ndəkərɓəla ni ka tsau nyarmbwa ni.

¹⁹Tamar ku pungkər pənju aka kərari ka kwahəmta ləptər kwatamkur na saɓəl ni, ka pungkər tsiyari ata kərari ka ləkwa mwa ka tuwa.

²⁰Sakatə ɓzərma'ni Absalom wutə ni tsa ku yu ni, “Ngəni Amnon na ɓzərda' nga an ɓzamtə ngə nə ya? Ndzi ɗiɗi ata kər ngkwarma'na. Tsa ɓzərda' nga, ga aɗiya damitədzi wa.” Antə Tamar ku ndzəndzi shini aviyar Absalom ka ɗəffə ɓzəɓza.

²¹Sakatə Kuthli Dauda ku nggatə su na ku hara, ɗəffari ku ɓzi ka duna.

²²Antə Absalom ku nggəlar Amnon ka duna kamnyar tə tsa ku ngka ngkwarma'ni Tamar ka pi ka tsa antə tsa aɗi ana ndəra alari wa.

²³Aghəla məva suɗa sakatə mji na ana pa shishir təmar Absalom na ahar Baal Hazor adzə bərni Ifrayim ku hara, antə tsa ku kəga shanga maɗa' kuthli ka da mwari anda.

²⁴Tsa mwari adzə Kuthli Dauda ka pəla, “Ka barkar nga, I ka pa shishir təmarna. Ahara ka gə si kəga kwakunayeri ar nga akwa vəi səm susəm ni ya?”

²⁵Amma kuthli pəla, “Awa, ɓzərna wa, yeru ata sə vəngkər ala gə ghəra ma shanga yeru an mwari.” Absalom ku kəɗar kiɗə kərari, amma tsa aɗi hir wa. Antə tsa vədzə barka aka Absalom.

²⁶Amma Absalom pəla, “To ma apani, ga hir zhar ɓzərda'na Amnon ka tsa mwari ya?” Antə Kuthli yu ni, “Kamnyar mi tə ka tsa mwari ri?”

²⁷Amma Absalom ku ləkəma ka kiɗə kərari, tar tə tsa ku zhari Amnon ka mambila mainayeri mwari kəga tsa.

²⁸Antə Absalom ku tsawa aka buɗayeri arni, “Ka giri wulwula ma sakatə Amnon ku baɗitə wika, ka ma sakatə I ku pəla, Tsi giri Amnon, ka giri tsi ni. Giri aɗiya thlivər wa, I an tsawa ala giri ka giri hara. Ka giri ndzi ka katsalakur!”

²⁹Antə buɗayeri ni ku nu su tə Absalom ku tsawa antə da ku tsi Amnon. Shanga maɗa' Dauda na damwa ku fəgəlta kwaraləbandər arɗa ka hwi.

³⁰Sakatə da tsu ata laku, labar ni ku mzhitə thləma Dauda abbər, “Absalom ku tsəgəi shanga maɗa' kuthli, mda aɗi na msəra wala pal akwa nca ɗa wa!”

³¹Kuthli ku thlatə ka thləhumta ləptərni ka psəmta kərni ata di kamnyar ɗəffə ɓzəɓzəkur. Buɗayeri na ata kəma duku kəga tsa ku thləhumta ləptər ɗa tsuwa.

³²Amma Yonadab na ɓzər Shamma na ɓzərma' Dauda ku pəla, “Ka barkar nga, ga aɗiya tamata abbər da ku tsi shanga mainayeri wa. Təng Amnon an mti. Ga ata mzhi nggaɓəlari atar harar Absalom tsu akwa sakatə Amnon ku ngka ngkwarma'ni Tamar ka pi ka tsa.

³³Antə ga aɗiya tamata abbər mdə ku tsəgəi shanga maɗa' kuthli wa, təng Amnon antə mdə ku tsi ni.”

³⁴Absalom ku hwi. Təkəma mdə na akwa səka ku wutə dlamar mji akwa səghəi ata gar akwa lakur Horonayim. Tsa mwari ka pəla aka kuthli su tə tsa wuta.

³⁵Yonadab pəla aka Dauda, “Ndaga maɗa' nga akwa si tsu apatə I ku pəla ala ga.”

³⁶Tsa akwa kuri gari ni, təkəma maɗa' kuthli ku səvi ka baɗitə tuwa, antə Dauda kəga kwakunayeri tsuwa ku tuwa ka duna.

³⁷Amma Absalom ku hwi ka mwari adzə Talmai, ɓzər Ammihud, na kuthlir Geshur. Antə Dauda ku fəi akwa tuwa ɓzərni Amnon.

³⁸Apani Absalom ku hwi ka mwari ahar Geshur ka ndzəndzi anda ar məva makər.

³⁹Sakatə Dauda ku ngkaha hangkalari ata kəra mtər Amnon, kamnyar tsa ku kurtə mti, antə ɗəffari ku ngka adza Absalom.